“Tukuy runaswan allimpi kausakuychej”
1. Wasiyoj phiñakojtin ¿ima yuyaychaytaj Bibliamanta yuyarikunanchej tiyan ?
1 Jehovaj llajtanqa tukuywan allimpi kayta munan, willayninchejtaj chayta rikuchin (Isa. 52:7). Wakin kuti runaspa punkunkuta takajtinchej phiñakunku. Jinapi rikukuspa ¿imataj yanapawasunman sonqo tiyasqas kanapaj? (Rom. 12:18).
2. ¿Imaraykutaj yuyayniyoj kananchej tiyan?
2 Yuyayniyoj kana. Wakinkunaqa cheqa kajman churanakusqankurayku phiñakunku, wakinkunataj waj imasrayku manataj willayninchejraykuchu. Ichapis chʼampaykunasninrayku phiñasqa kashajtin chayarqanchej, chaywanpis willaynichejrayku phiñakojtinpis, kayta yuyarikuna: Paykunaqa ichapis noqanchejmanta mana allintachu yachanku (2 Cor. 4:3, 4). Yuyayniyoj kayqa sonqo tiyasqa kanapaj yanapawasun, nitaj noqanchejwan phiñasqa kasqankutachu yuyasun (Pro. 19:11).
3. Wasiyojta jatunpaj qhawasqanchejta, ¿imaynatá rikuchisunman?
3 Jatunpaj qhawasqaykita rikuchiy. Willaypi ashkha runasqa creeyninkupi sinchʼi sayasqa kanku (2 Cor. 10:4). Chayrayku uyarinawanchejtachus manachus paykunamantaña kashan. Imapichus creesqankutataj mana pisipaj qhawasunchu nitaj paykunamanta astawan yachasqanchejta rikuchisunchu. Ripunanchejta niwajtinchejtaj, kʼachamanta ripusun.
4. Kʼacha simiwan parlay ¿ima niyta munan?
4 Kʼacha simiwan parlay. Noqanchejmanta sajrata parlajtinkupis llampʼu sonqowan, kʼacha simiwan kutichisun (Col. 4:6; 1 Ped. 2:23). Paykunawan siminakunamantaqa imamantachus parlayta munasqankumanta parlarisunman. Ichapis kʼachamanta tapurisunman imaraykuchus mana uyariyta munawasqanchejta, chaywanpis wakin kutispi mana astawan phiñachinapaj allin kanman kʼachamanta ripunanchej (Pro. 9:7; 17:14).
5. ¿Imaraykutaj willaypi kʼachamanta parlarina tiyan?
5 Kʼachamanta parlasun chayqa, wasiyojqa ichapis yuyarikonqa imaynatachus parlasqanchejta, waj kutipi waj hermano willajtintaj uyariyta atinman (Rom. 12:20, 21). Churanakuwajtinchejpis, ichapis qhepaman hermanonchejman tukunman (Gál. 1:13, 14). Kʼachamanta parlaspa, phiñakuyninchejwantaj mana atipachikojtinchejqa Jehovata jatunchasun, yachayninchejta allinta rikuchisun ima, chay runa yachakuyta munajtinpis manapis (2 Cor. 6:3).