Tapuykuna

◼ Tantakuypi chayri willaypi kashaspa celularta apaykachanamanta, ¿imatataj Biblia yuyaychan?

“Tukuy imapis tiempoyojlla.” (Ecl. 3:1.) Celularqa ima ratollapis wajkunawan parlarinapaj chayri mensajesta apachinapaj yanapawanchej. Chaywanpis cristianosqa, celularta wakin kutis chʼinyachina tiyan. Sutʼincharinapaj, tantakuyninchejqa Jehovata yupaychanapaj, paymanta yachakunapaj, kallpachanakunapaj ima (Deu. 31:12; Sal. 22:22; Rom. 1:11, 12). Chayrayku allin kanman, tantakuypi kashaspa celularninchejta wañuchinanchej, mensajestapis wasinchejman ripushaspa leerinanchej. Celularninchej japʼichisqa kanan kajtintaj, mana chʼajwananpaj jina churana.

Tukuy imata “ruwan[a] evangeliorayku” (1 Cor. 9:23). Wakin kutispeqa, willaypi kashaspa celularta apaykachayqa sumaj. Sutʼincharinapaj, willayman orqhoj hermanoqa, waj lugaresman kachasqan hermanosta wajyarinman, maypiñachus willashasqankuta yachananpaj. Chantapis ichá uj hermano, Bibliamanta yachachisqan runaman chayri yachakuyta munajman kutinanpaj wajyariyta munanman, astawanraj chay runa karupi tiyakojtin. Chaywanpis Diosmanta willashajtinchej, celularninchej pantachinawanchejta mana saqenachu (2 Cor. 6:3). Chantapis mana allinchu kanman, willaypi hermanosta suyashaspa, celularnejta parlarinanchej chayri mensajesta apachinanchej. Astawanqa hermanosninchejmanta interesakuna, nitaj waj imaspi yuyayninchejta churanachu.

Wajkunaj allinninkuta maskʼana (1 Cor. 10:24; Fili. 2:4). Wakenqa willamunapaj tantakuyman tardeta chayallanku, “hermanosta wajyarispa chayri mensajeta apachispa maypichus willashasqankuta yachallasaj”, nispa. Ni jaykʼaj jinata yuyanachu. Tarde chayajtinchej, willayman orqhoj hermanoqa, wakin kutis piwanchus willanata watejmanta kamachinan tiyan. Jinapis wakin kuti, ichá mana tiemponpi chayayta atisunchu. Chaywanpis tiemponpi chayanapaj kallpachakojtinchejqa, wajkunaj allinninkuta maskʼasqanchejta rikuchisun, nisunman Jehovaj wakichisqanta, willayman orqhoj hermanota, willaypi kajkunata ima jatunpaj qhawasun.