JOVENESPA TAPUKUYNINKU
Niraj uj mensajeta apachishaspa, ¿imaspitaj tʼukurinay tiyan?
:-) Mensajesqa amigosniyki imaynachus kashasqankuta yachanaykipaj yanapasunki.
:-( Apachisqayki mensajesqa, amigosniykiwan phiñanachisunkiman, nitaj allinpajchu qhawachisunkiman.
Kaypi yachakusunchej niraj uj mensajeta apachishaspa, kay kinsa imaspiraj tʼukurinanchej kasqanta.
Chantapis kaypi kallantaj:
Pimán apachishanki
Ichapis ashkha jóvenes jina, mensajeta apachinaykipuni kasqanta yuyanki. Mensajesta apachispaqa, pikunajtachus numerosninta japʼinki, chaykuna imaynachus kashasqankuta yachayta atinki. Mensajesta apachisqaykitataj tatasniyki yachananku tiyan.
“Tatayqa mana munanchu hermanaywan noqawan, celularnejta joveneswan parlanaykuta. Parlayta munaspaqa wasiykoj salanpi kaj telefononejta parlanayku tiyan, nitaj sapallaykuchu” (Lenore).
Kayta yachanayki tiyan: Celularniykej numeronta pillamanpis qonaykeqa mana allinchu kanman.
“Tukuyman numeroykita qonki chayqa millay mensajesta, millay fotosta apachimusunkuman” (Scott).
“Uj jovenwan chayri uj sipaswan sapa kuti mensajesta apachinakuspaqa, usqhayllata chay joventa chayri chay sipasta munakuyta qallariwaj, payllapiñataj yuyawaj” (Steven).
Biblia nin: “Yuyayniyojqa sajra kajta rikuspa, pakakun”, nispa (Proverbios 22:3). Allin yuyaywan imatapis ruwanki chayqa mana ima llakiypipis rikukunkichu.
Kayqa pasarqapuni: “Uj amigoywanqa sapa rato mensajesta apachinakoj kayku. Yuyarqanitaj amigoslla kasqaykuta. Uj diataj munakuwasqanta niwarqa. Kunanqa reparani paywan masichakusqay, mensajesta payman apachisqay mana allinchu kasqanta” (Melinda).
Kaypi tʼukuriy: Amigon munakuyta qallarisqanta nejtin, ¿amigosllapunichu karqanku?
¿Imatá ruwanantaj allin kanman karqa?: Amigosllapuni kanankupaj, ¿imatataj Melinda mana ruwananchu karqa?
Imatá apachishanki
Apachimususqanku mensajesta leeyqa may sumaj, apachiytaj aswan fácil. Ajinallatataj mensajesta apachisqaykeqa usqhayllata waj jinamanta entiendekunman.
Kayta yachanayki tiyan: Mensajesta apachisqaykeqa, waj jinamanta entiendekunman.
“Mensajespeqa mana reparayta atinchejchu, mensajeta apachimuwanchej chay runa kusisqachus, phiñasqachus kashasqanta. Wakin kutis dibujitustawan apachimuwajtinchejpis manapuni reparayta atinchejchu. Chayraykutaj mensajesqa waj jinamanta entiendekuyta atinman” (Briana).
“Ashkha sipaskunaqa jovenesman mensajesta apachisqankurayku mana allinpajchu qhawachikunku” (Laura).
Biblia nin: “Cheqan runaqa kutichinampaj sumajtaraj yuyaychakun” (Proverbios 15:28). Kay versiculomanta yachakuwaj, niraj uj mensajeta apachishaspa, imatachus apachishasqaykita allinta qhawariyta.
Ima rato apachishanki
Mensajesta apachishaspa chayri leeshaspaqa wajkunata respetasqaykita rikuchiy. Imaynatachus chayta ruwanaykitataj yachankiña, chayman jinataj ruway.
Kayta yachanayki tiyan: Wajkunata mana respetankichu chayqa, runas yuyanqanku machu machu kasqaykita, nitaj qanwan kayta munanqankuchu.
“Wajkunawan khuska mikhushaspa chayri pillawanpis parlarishaspa mensajesta apachej churakusun chayqa, pisipaj qhawasqanchejta rikuchisun. Noqapis chaypi pantarqani” (Allison).
“Autota manejashaspa mensajesta apacheyqa peligroso, imaraykuchus chayta ruwaspaqa accidentakuwaj” (Anne).
Biblia nin: “Kay pachapeqa tukuy [imapaj tiempo tiyan]. Uj tiempoqa tiyan chʼinyanapaj, uj tiempotaj parlanapaj”, nispa (Eclesiastés 3:1, 7). Chantapis tiempo tiyallantaj mensajesta leenapaj, mensajesta apachinapajpis.
Ruwayta atinapaj jina yuyaychaykuna
Pimán apachishanki
;-) Tatasniykita kasukuy (Colosenses 3:20).
;-) Ama pillamanpis celularniykej numeronta qoychu. Chaytataj kʼachallamanta niy. Chayta ruwayqa aswan qhepaman yanapasonqa.
;-) Uj sipasman chayri jovenman mensajesta apachishaspaqa, ama kʼacha simiwanpis parlashawaj jina mensajesta apachiychu. Manaraj piwanpis rejsinakuyta munashaspa, chay jina mensajesta uj sipasman chayri jovenman apachinki chayqa, mayta llakichinki.
“Tatasneyqa yachanku celularniyta munasqankuman jina apaykachashasqayta. Chayrayku tatasniy mana qhawankuchu pikunaj numerosnintachus celularniypi japʼisqayta” (Briana).
Imatá apachishanki
;-) Niraj uj mensajeta apachishaspa tapurikuy: “¿Allinchu kanman kay mensajeta apachinay?”, nispa. Ichapis aswan allin kanman wajyarinayki chayri paywanpuni parlarinayki.
;-) Imastachus uj runawan parlashaspa mana niwajchu chaykunataqa, ama uj mensajepi apachiychu. Sara sutiyoj sipasqa 23 watasniyoj, nintaj: “Imastachus uj runaman mana uyanpi niyta atinkichu chaytaqa, ama uj mensajepi apachiychu”, nispa.
“Pillapis uj millay fotota apachimusojtenqa tatasniykiman willay. Chayta ruwajtiyki tatasniykeqa qanpi atienekonqanku, yanapasonqankutaj” (Sirvan).
Ima rato apachishanki
;-) Maykʼajchus celularniykita apaykachanaykita qhawarikuy. Olivia sutiyoj sipas nin: “Mikhunay kajtin, Bibliata leenay kajtin chayri tareasniyta ruwanay kajtenqa, mana celularniyta japʼinichu. Tantakuykunapi kashaspataj apagani. Ajinamanta mensajesta apachimuwasqankuta mana qhawaykunichu”, nispa.
;-) Wajkunata respetay (Filipenses 2:4). Wajkunawan parlarishaspaqa ama mensajesta leeychu, nitaj mensajesta apachiychu.
“Amigosniywan kashaspaqa, uj mensajeta apachinaypuni kajtillan apachini. Nillataj mana rejsisqay runasman celularniypa numeronta qonichu” (Janelly).