Revistasta sapa kuti japʼikojman yachachiyta qallarina
1. ¿Imaraykú Jehovaj llajtan, leeyta munajkunaman revistasta sapa killa saqenata niwanchej?
1 Ashkha runas, mana Bibliamanta yachachinata munankuchu. Chaywanpis revistasninchejta leeriyta munanku. Chayrayku Jehovaj llajtanqa, revistasta paykunaman sapa killa saqenata yuyaychawanchej. ¿Imapaj? Revistasninchejta leejkuna, pisimanta pisi Bibliamanta yachakuyta munanankupaj (1 Ped. 2:2, 3). Ashkhas, revistasninchejta leesqankurayku Bibliamanta yachakuyta qallarerqanku.
2. Revistasta japʼikoj yachakuyta munananpaj, ¿imatá ruwasunman?
2 Mujuta qarpana. Revistasta saqeytawan ripunamantaqa, chay runawan astawan parlarina. Jinamanta imaynatachus kausakusqanta, imachus llakichisqanta, imapichus creesqanta ima yachasun. Chayta yachaspaqa, imamantachus, imaynatatajchus parlananchejta yachasun (Pro. 16:23). Sapa rinapaj wakichikuna. Revistasmanta uj yachachiyta ajllaspa, uj versiculowan sutʼinchasunman. Ajinamanta runaspa sonqonkupi tarpusqa mujuta qarpasunchej (1 Cor. 3:6). Maykʼajchus risqanchejta, ima revistatachus saqesqanchejta, imamantachus parlarisqanchejta, ima textostachus leeripusqanchejta ima anotakunapuni.
3. Revistasta japʼikojman, ¿killapi mashkha kutita kutisunman?
3 ¿Mashkha kutita kutisunman? Sapa kuti revistasta japʼikojman, revistasta killapi ujta apanchej. Chaywanpis yachakuyta munasqanman jina, chayri atisqanchejman jina, waj kutispi rillasunmantaj. Uj chayri iskay semananman kutispa, nisunman: “Saqerqayki chay revistaspi uj sumaj yachachiyta leerqani. Chayta rikuchiyta munarqayki”, nispa. Chayta nejtinchej, ichá chay yachaqanata leeriyta munanqa. Leesqantaña niwajtinchejtaj, imatachus chaymanta yuyasqanta tapurisunman. Chantá chay yachaqanamanta astawan parlarisunman. Publicacionesninchejta leeyta miskʼichikojmantaj, chay killa ima publicacionwanchus willashanchej chayta saqesunman.
4. Revistasta japʼikojman yachachiyta qallarinapaj, ¿imatá ruwasunman?
4 Mana suyanachu revistasta japʼikoj, “Bibliamanta yachachiway” ninawanchejta. Astawanpis noqanchej tapurina. Qallariypi mana yachachinata munajtinpis, Torremanta Qhawaj revistapi “Bibliaj kutichiykunasnin”, nisqa yachaqanamanta wakin kutis parlarisunman. Munajtintaj astawan sutʼincharisunman. Jinamanta ichá punkullanpi Bibliamanta yachachiyta qallarisun. Mana jina kajtinpis, yachakuyta munananpaj revistasta apanallapuni.