Horanpipuni chayanapaj kallpachakuna
1. Jehová tukuy imata horanpi ruwasqanmanta, ¿imatá yachakusunman?
1 Jehovaqa tukuy imata horanpi ruwan. Kamachisninta “maychus tiempompi” yanapan (Heb. 4:16, Qheshwa Biblia). Yachachiykunasnintapis “horampi” qowanchej (Mat. 24:45). Chayrayku phiñakuynin pʼunchay tiemponpi jamunanmanta, mana iskaychakunchejchu (Hab. 2:3). Jehová tukuy imata horanpi ruwasqanqa, ¡mayta yanapawanchej! (Sal. 70:5.) Jinapis pantaj runas kasqanchejrayku, ruwanasninchejrayku ima, mana tukuy imata horanpi ruwayta atinchejchu. ¿Imaraykú imatapis horanpi ruwayman yachakuna tiyan?
2. Mayllamanpis horanpi chayasqanchej, ¿imaraykutaj Jehovata jatunchan?
2 Kay tukukuy pʼunchaykunapi, runasqa paykunallapi yuyanku, munayninkuwan atipachikunku, nitaj imatapis horanpi ruwankuchu (2 Tim. 3:1-4). Chayrayku llankʼayninchejman, tantakuyninchejman, chayri mayllamanpis horanpi chayajtinchej, runasqa reparanku. Chaytaj Jehovata jatunchan (1 Ped. 2:12). ¿Llankʼayman horanpipunichu chayanchej? ¿Diosta yupaychanapaj ruwanasmanrí? Tantakuy niraj qallarishajtin, nisunman Diosman takinapaj, mañakuyta uyarinapaj ima chayasun chayqa, Tatanchej Jehová jina imatapis ruwayta munasqanchejta rikuchisun (1 Cor. 14:32, 33, 40).
3. Horanpi chayaspa, ¿imaraykutaj wajkunaj allinninkuta maskʼanchej?
3 Horanpi chayaspaqa, wajkunaj allinninkuta maskʼasqanchejta rikuchinchej (Fili. 2:3, 4). Tantakuy chayri willamunapaj tantakuy niraj qallarishajtin chayaspaqa, hermanosta uyarejta saqenchej. Mana horanpi chayasparí, tiemponchej wajkunaj tiemponkumanta aswan valorniyoj kasqanta nishasunmanpis jina. Horanpipuni maymanpis chayaspaqa, juntʼaj runas, kʼuchis, atienekunapaj jinataj kasqanchejta rikuchinchej.
4. Mayllamanpis qhepatapuni chayanchej chayqa, ¿imatá ruwasunman?
4 Mayllamanpis qhepatapuni chayanchej chayqa, imaraykuchus chayta ruwasqanchejta tapurikuna. Ruwanasninchejta horanpi juntʼanapaj, tiemponchejta allinta tʼaqana (Ecl. 3:1; Fili. 1:10). Jehovaj yanapanta mañakuna (1 Juan 5:14). Mayllamanpis horanpi chayaspaqa, kay iskay jatun kamachiykunata juntʼanchej: Jehovata, runa masinchejta ima munakuyta (Mat. 22:37-39).