Tapuykuna

◼ Wawas creeypi wiñanankupaj, ¿imatá yachakunanku tiyan?

Cristiano tatasqa, wawasninkuta Jehovaj yachachiyninpi, kʼamiyninpitaj uywanankupaj, mayta kallpachakunku (Efe. 6:​4). Ashkhas, sapa paqarin chay pʼunchaypaj textota wawasninkuwan ukhunchanku, sumajta yanapakusqanrayku. Waj familiasqa, Diosta yupaychashaspa chayri waj kutispi, Bibliamanta orqhosqa videosta qhawanku, chaymantataj parlanku. Manaqa Los jóvenes preguntan nisqa yachaqanasta ukhunchanku, Bibliamanta uj dramata jina ruwanku chayri waj imasta ruwanku. Jinapis wawasninku wiñay tukusqa cristianos kanankupajqa, Bibliaj ukhu yachachiynintapis rejsinanku tiyan (Heb. 6:​1, 2).

Imastachus runasman yachachisqanchejpi tʼukurina. Runawan qallariypi parlarishaspa chayri kutispa, ¿Imatapunitaq Biblia yachachin? librowan yachachinapaj kallpachakunchej. Tukuspataj, ‘Diospa munakuyninpi kallaychikpuni’ librowanñataj yachachinchej. ¿Imaraykutaj? Yachachin libroqa, Bibliaj yachachiykunasninta runasman rejsichin. ‘Diospa munakuynin’ librotaj, yachakojta Biblia yuyaychasqanman jina kausananpaj yanapan. Jinamantataj mosoj cristianosqa, Cristopi “saphinchasqas”, “creeypi” kallpa­chasqastaj kanku (Col. 2:​6, 7). Chayrayku allin kanman wawasninchejtapis chaykunawan yachachinanchej. Paykunaqa yachananku tiyan: Dios juchamanta rantiwasqanchejta, Reinomanta, maypichus wañusqas kashasqankuta, imajtinchus Dios ñakʼariy kananta saqesqanta, imaraykutajchus ninchej kay pacha tukukuyninpi kashasqanta. Yachanallankutaj tiyan, Jehovaj testigosnin cheqata yachachisqanchejta. Bibliaj yuyaychaykunasnintapis entiendenanku tiyan, “reparanankupaj imachus allin, imatajchus mana allin kasqanta” (Heb. 5:​14). Jinapis tatasqa, wawasninkoj edadninkuman jina, japʼeqasqankuman jinataj yachachinanku tiyan. Wakin wawasqa, Bibliaj ukhu yachachiyninta juchʼuymantaña entiendenku (Luc. 2:​42, 46, 47).