¡Agostoqa jatun killa kanqa!
Jallpʼantinpi uj mosoj tratadota jaywasunchej
1. ¿Imatataj agosto killa Jallpʼantinpi ruwasunchej?
1 Diospa Reinon kamachiyta qallarisqanmantapacha 100 watasña kanqa. Chayrayku agosto killapi, Jallpʼantinpi astawan willaspa Jehovata jatunchasunchej. Chay killapi, ¿Maypitaj sumaj yachachiykunata tariwaj? nisqa mosoj tratadota tukuyman jaywamusun. Kay tratadoqa runasta yanapanqa, tapuykunasninkoj kutichiyninta Bibliapi maskʼanankupaj. Chantapis imaynatachus Internetpi jw.org nisqa yanapasqanta sutʼinchan.
2. Jehová Diosta “kusiywan qhaparispa” Jallpʼantinpi yupaychanapaj, ¿imatá ruwasunman?
2 Kusiywan qhaparispa yupaychana. Agosto killapi precursor auxiliar kayta munajkunaqa, 30 horasta willayta ajllayta atenqanku. Jinamanta tukuypis astawan willamuyta atisunchej. Chantapis agostoqa, phishqa viernesniyoj, phishqa sabadosniyoj, phishqa domingosniyojtaj. Chayrayku semanantinta llankʼajkuna, colegioman chayri escuelaman rejkunapis, precursores auxiliares kayta atinkuman. Bibliamanta mayqen yachakojpis chayri mayqen wawaykipis, willaj llojsinanpaj wakichisqaña chayqa, ancianosta umachaj hermanowan parlariy. Yachakojkunaqa chay killapi willayta qallarispa, ¡mayta kusikunkuman! Wakin precursores regularesqa, horasninkuta juntʼasqankurayku agostopi samarikuyta yachanku. Chaywanpis allin kanman, paykunapis chay killapi astawan willanankupaj tiemponkuta tʼaqananku. Familiasqa kunanmantaña wakichikunkuman, Jehová Diosta “kusiywan qhaparispa” Jallpʼantinpi yupaychaysikunankupaj (Esd. 3:11; Pro. 15:22).
3. Agosto killapi, ¿imaspitaj yapakuyta munanchej?
3 Jallpʼantinpi ajinata willakorqaña chaypis, agosto killapi ni jaykʼaj rikukorqa jina astawan willakunanta munayku. Chayrayku kallpachakuna, ni jaykʼaj jina astawan horasta willanapaj, astawan willajkuna kanapaj, astawan precursores auxiliares kanapajtaj. Jehovamanta mañakuyku, agosto killapi ni jaykʼaj jina Jallpʼantinpi willamunapaj wakichikusqanchejta bendecinanta (Mat. 24:14).