Profetasmanta yachaqakuna: Nahúm
1. ¿Imatá Nahúm libromanta yachakunchej?
1 Profeta Nahúm nerqa jina, Nínive llajtaqa kunankama raqaypacha kashan. Chaytaj rikuchin Jehová enemigosninmanta vengakusqanta. Paymanqa ni pí sayaykuyta atinmanchu (Nah. 1:2, 6). Nahumpa profecianmanta sumajta yachakoyqa willaypi yanapawasun.
2. ¿Imaraykú willayninchej allin kasqanta nisunman?
2 Runasta sonqochana. Nahúm librota leerispa, ichá nisunman Nínive chinkachisqa kanallanmanta parlasqanta. Niniveqa Asiriajta ujnin llajtan karqa chaypitaj sajra runas tiyakoj kanku (Nah. 1:1; 3:7). Jinapis Nahumpa nisqasnenqa Jehovaj llajtanpaj sumaj willaykuna karqa. Nahúm suteqa “Sonqochaj” niyta munan. Nahumqa judío masisninman nerqa enemigosninku chinkachisqa kanankuta. Nillarqataj Jehová ‘llakiypi kajkunapaj pakakunanku kasqanta’ (Nah. 1:7). Noqanchejpis runasman sumaj willaykunata willashanchej, Jehovapi pakakunankupajtaj yanapashanchej (Nah. 1:15).
3. ¿Imaynatá Nahúm jina kikinchaykunawan yachachisunman?
3 Kikinchaykunawan yachachina. Nahumtaqa Jehová Dios yuyaycharqa Nínive llajtata, Egiptomanta Tebas llajtawan kikinchananta. Tebas llajtataqa asirios chinkacherqanku. Ninivepis chinkachisqallataj kanan karqa (Nah. 3:8-10). Runaswan kay sajra pacha chinkayninmanta parlashaspa, Bibliaj profeciasninmanta parlarina. Ajinamanta rikuchisun, Jehová tukuy nisqanta juntʼasqantapuni. Sutʼincharina kay 632 watapi, Jesús niraj jamushajtin, babilonioswan medoswan Niniveta chinkacherqanku. Sinchʼi parasqanrayku Tigris mayoj yakusnin ashkhayaykuspa, Ninivej perqasninta thuñiykorqa. Chay jinamanta Niniveta atiparqanku. Chaytaj rikuchin Jehová nisqanman jina juntʼakusqanta (Nah. 1:8; 2:6).
4. ¿Imaynatá willashaspa entiendenapaj jina parlarisunman?
4 Entiendenapaj jina parlarina. Nahumqa profecianta entiendenapaj jina, sumajta sutʼincharispa qhelqarqa (Nah. 1:14; 3:1). Noqanchejpis runa entiendeyta atinanpaj jinalla parlananchej tiyan (1 Cor. 14:9). Ñaupa kutirayku imaraykuchus visitarishasqanchejta ninanchej tiyan. Bibliamanta yachakojkunata Jehovapi, Palabranpi ima atienekunankupaj yanapana. Chantá imaynatachus yachakusqanku kausayninkupi yanapasqanta yachachina (Rom. 10:14).
5. ¿Imaraykutaj Nahumpa profecian sonqochawanchej?
5 Nahumqa, Jehovaj nisqasnin juntʼakunanpi atienekoj. Chaytaj qhelqasqan libropi rikukun. Satanaspa sajra pachan chinkachisqa kanankama Jehovaj nisqasnin sonqochawanchej. “Payqa mana iskay kutitachu enemigosninmanta vengakonqa” (Nah. 1:9).