¿Imapaj willayman llojsinapaj tantakuykunata ruwakun?
1. ¿Imapajtaj willayman llojsinapaj tantakuykunata ruwakun?
1 Jesusqa uj kutipi 70 discipulosninta kallpachananpaj paykunawan tantakorqa, niraj willajta kachashaspa (Luc. 10:1-11). ¿Imaynatá kallpacharqa? Mana sapallankuchu kanankuta yuyarichispa, Jehová Dios paykunata yanapashasqanta nispataj. Chantapis willayninkuta juntʼanankupaj imastachus ruwanankuta kamacherqa. “Iskaymanta” iskaytaj kacharqa. Kay tiempopipis, willayman llojsinapaj tantakuytaqa ruwakun, kallpachanawanchejpaj, willayta yachachinawanchejpaj, wakichinawanchejpajtaj.
2. Abril killamantapacha, ¿mashkha minutostataj willayman llojsinapaj tantakuyta ruwakonqa?
2 Kunankamaqa willayman llojsinapaj tantakuyta 10 chayri 15 minutosta jina ruwanchej. Chay minutospitaj hermanosta qotuspi tʼaqakun, maypichus willakunanta nikun, uj hermanotaj Diosmanta mañakun. Chaywanpis abril killamantapacha, chay tantakuytaqa 5 chayri 7 minutosllataña ruwakonqa. Waj tantakuy pasayta ruwakun chaytaj, aswan pisiraj kanqa. Imaraykuchus hermanosqa, Diospa Palabranta uyarispa kallpachasqa kanqanku. Willayman llojsinapaj tantakuy pisillaña kajtin hermanosqa, aswan horasta willayta atenqanku. Chantapis niraj chay tantakuyman chayashaspa willayta qallarej precursorespaj, waj hermanospajpis, mana ancha unaychu kanqa.
3. ¿Imaynatá willayman llojsinapaj tantakuykunata wakichikunan tiyan?
3 Willayman llojsinapaj tantakuytaqa hermanosta yanapananpaj jina wakichikunan tiyan. Ashkha qotuchakuykunapeqa reparakun, willayman llojsinapaj qotus tukuyninku mana uj lugarllapichu tantakunanku aswan allin kasqanta. Ajinamanta hermanosqa mana ancha karutachu rinanku kanqa. Chantapis willamunapaj kamachej hermanosqa, usqhayllata hermanosta kachanqanku, qotunkupi kajkunatataj yanapanqanku. Ancianosqa imachus hermanospaj allin kasqanta ajllanqanku. Chantapis hermanosqa niraj chay tantakuyta uj mañakuywan tukuchashaspa, maymanchus willaj rinankuta, piwanchus rinankutapis yachanankuña tiyan.
4. ¿Imaraykú willayman llojsinapaj tantakuy, waj tantakuykunasninchej jinallataj?
4 Waj tantakuykunasninchej jinallataj. Chay tantakuykunamanqa willayman llojsej hermanoslla rinku. Chaywanpis waj tantakuykunasninchejta jinallataj qhawananchej tiyan, Jehovallataj qowasqanchejrayku. Imajtinchus purajmanta munanakunapaj, allin ruwaykunata ruwanapajtaj yanapawanchej (Heb. 10:24, 25). Chayrayku chay tantakuyta ruwajkuna, allin wakichisqa rinanku tiyan, Jehovata jatunchananpaj, chaypi kajkunatapis kallpachananpaj. Atikusqanman jina, willayman llojsej hermanosqa chay tantakuyman rinankupaj kallpachakunanku tiyan.
Willayman llojsinapaj tantakuykunata waj tantakuykunasninchejta jinallataj qhawananchej tiyan
5. 1) ¿Imaynatá superintendente de servicio nisqa hermano willayman llojsinapaj tantakuyta wakichin? 2) ¿Imaynatá willayman llojsinapaj tantakuyta hermanas ruwankuman? (Sojta paginata qhawariy.)
5 ¿Imaynatataj willamunapaj kamachej hermano wakichikunman? Uj tantakuypi yachachinapajqa sumajta wakichikunchej. Imajtinchus ñaupajmantaña chayta ruwananchejta yachanchej. Willayman llojsinapaj tantakuypajpis ajinallatataj wakichikuna tiyan. Willayman llojsinapaj qotus mana uj lugarllapichu tantakojtinku, sapa qotupi kamachej hermano, yanapajnin ima chay tantakuyta ruwanqa. Chaywanpis tukuy hermanos uj lugarllamanta llojsejtinkoqa, superintendente de servicio nisqa hermano, pichus chay tantakuyta ruwananta nenqa. Wakin superintendente de servicio nisqa hermanosqa, uj programata chaypaj ajllasqa hermanosman qonku, ujtataj tableroman churanku. Chay tantakuy allin kananpajqa chay hermanos allin yachachejkuna, wakichejkunataj kananku tiyan. Chayrayku superintendente de servicio nisqa hermanoqa, chay hermanosta allinta ajllanan tiyan. Wakin pʼunchaykuna mana uj anciano, siervo ministerial chayri uj bautizasqa hermano willayman llojsinapaj tantakuyta ruwananpaj kanchu chayqa, superintendente de servicio nisqa hermano sumaj wakichisqa hermanata chay tantakuyta ruwananta ninman. (“Uj hermana chay tantakuyta ruwanan kajtin” nisqata qhawariy.)
6. ¿Imaraykutaj allinta wakichikunan tiyan chay tantakuypi kamachej hermano?
6 Diosmanta Parlayta Yachanapaj tantakuypi chayri Willayta Yachanapaj Tantakuypi parlarinanchej kajtin sumajta wakichikunchej. Nichá tantakuyman rishasparajchu imatachus ninanchejpi tʼukurishasunman. Uj hermano willayman llojsinapaj tantakuyta kamachinan kajtenqa, kikillantataj wakichikunan tiyan. Chay tantakuy pisi tiempollataña kanan kasqanrayku, chaypi kamachej hermanoqa allinta wakichikunan tiyan hermanosta yanapananpaj, maychus tiemponpitaj tukunanpaj. Chantapis niraj chay tantakuy qallarishajtin maypichus hermanos willanankuta yachananña tiyan.
7. ¿Imamantá willayman llojsinapaj tantakuypi parlakunman? (Sojta paginapi kaj recuadrota qhawariy.)
7 ¿Imamantá parlakunan tiyan? Allin kamachi yuyayniyojqa mana ninchu imamantapunichus chaypi kamachej hermano parlananta mana tukuynejpichu kikinta willakusqanrayku. “Willayman llojsinapaj tantakuypi imasmantá parlakunman” nisqa recuadro chayta rikuchishan. Chay tantakuykunapeqa, willayman llojsejkuna parlarinanku tiyan. Chantá wakin kutitaj uj hermano uj rikuchiyta ruwanman chayri Diosmanta willanapaj wakichikusqan videosmanta ujta jw.org nisqapi rikuchinman. Chay tantakuypi kamachejqa wakichikushaspa tʼukurinan tiyan, chay pʼunchay willayman llojsejkunata imachus kallpachananpi, yanapananpitaj.
Chay tantakuypi kamachejqa wakichikushaspa tʼukurinan tiyan, chay pʼunchay willayman llojsejkunata imachus kallpachananpi, yanapananpitaj
8. Sabadospi, domingospipis, willayman llojsinapaj tantakuypi, ¿imasmantá parlarikunman?
8 Sabadospeqa ashkha hermanos Torremanta Qhawaj, ¡Despertad! revistaswan willanku. Wakintaj chay pʼunchaylla llojsiyta atisqankurayku, Familiapi Diosta Yupaychanapaj Chʼisipi wakichikusqankumanta ichá mana yuyarikunkumanchu. Chayrayku allin kanman chay tantakuypi kamachej hermano Reinomanta Willayninchej hojitapi yuyaychakusqanman jina yuyarichinan. Chantapis chay lugarpi imastachus uyarikusqanmanta chayri ima fiestachus kasqanmanta parlarillanmantaj. Chantá revistata japʼikojman kutinamantapis. Chantapis, uj hermanota pichus chay killamanta revistawanña willashan, imaynatachus saqenamanta chayri imaynachus rishasqanmanta parlarinanta ninman. Domingospeqa kikillantataj ruwakunman. Chantá parlakullanmantaj, imaynatachus waj pʼunchaykunapi wakin publicacioneswan willanamanta, nisunman Sumaj willaykuna, Diosta uyariy folletoswan jina chayri Yachachin librowan jina. Chay publicacioneswanqa runasman Bibliamanta yachachinchej.
9. Uj invitacionwan chayri uj mosoj tratadowan willananchej kajtin, ¿imamantá semana tukukuyta willayman llojsinapaj tantakuypi parlakunman?
9 Uj invitacionwan chayri uj mosoj tratadowan willananchej kajtin, willamunapaj kamachej hermanoqa semana tukukuyta, revistastawan khuska saqenamanta parlarinman. Chayri pillapis astawan yachakuyta munajtin, imatachus ruwanamanta parlarillanmantaj. Chantapis chay kutispi astawan willay, imaraykuchus sumaj kasqanta hermanos nisqankumanta.
10, 11. ¿Imaraykutaj tukuy hermanos chay tantakuypaj wakichikunanku tiyan?
10 ¿Imaynatataj hermanos wakichikunkuman? Willayman llojsejkuna ñaupajmantaña wakichikusun chayqa, willayman llojsinapaj tantakuypi yachakusqanchej sumajta yanapawasun. Chaypajtaj ichá familiapi Diosta yupaychayninchejpi willaj llojsinapaj wakichikusunman. Ajinamanta hermanosninchejwan chaymanta parlarinanchejpaj. Chantapis niraj tantakuy qallarishajtin necesitasqanchej publicaciones kapunawanchejña tiyan. Ajinamanta maypichus willananchej kashan chayman usqhayllata chayasun.
11 Chantapis waj tantakuykunasninchejman jinallataj, niraj qallarishajtin chayanapaj kallpachakuna. Imajtinchus qhepata chayaspaqa, willayman llojsinapaj kamachej hermano imatachus ruwayta munashasqanta pantachisunman. ¿Imaynamantá? Ichá chay hermanoqa niraj hermanosta kachashaspa tukuy imata qhawarinña. Chayrayku pisilla kajtinkoqa, tukuyninkuta maypichus mana tukorqankuchu willayta chayman kachanqa. Karuman rinanku kajtintaj, mana autoyoj kajkunata, autoyoj kajkunawan kachanqa. Chantapis manchachikunapaj jina kaj lugaresman willaj rina kajtenqa, wakin hermanosta nenqa maypichus hermanas willashanku chaynejllapi qhepakunankuta chayri paykunawan willanankuta. Uj hermano onqosqa kashanman chaytaj ichá kachanqa puriyta atinanpaj jina kajnejllata. Chantá unaytaña willaj hermanosta, niraj unaytachu willajkunawan kachanqa. Chaywanpis qhepata chayajtinchejqa, watejmanta piwanchus willananchejta ajllanan kanqa, ajinamanta ruwashasqanta pantachisunman. Ichá imapis kanmanpuni qheparikunanchejpaj jina. Chaywanpis chayman yachaykusqaña kanchej chayqa, ichapis chay tantakuyta pisipaj qhawashanchej, ¿manachu kallpachakunanchej kanman?
12. Kikin hermanosllawanpuni llojsinchej chay, ¿imatá ruwasunman?
12 Wakin hermanosqa, uj hermanowan willaj llojsinankupaj parlasqaña kanku chayri kamachej hermano piwanchus kachananta suyakunku. Chaywanpis, kikin hermanosllawanpuni llojsinchej chayqa, ichá wajkunawan willanapaj kallpachakusunman (2 Cor. 6:11-13). Wakin kutitaj, niraj unaychu willashajwan willaj llojsisunman, sumaj yachachej kananpajtaj yanaparisunman (1 Cor. 10:24; 1 Tim. 4:13, 15). Chay tantakuypeqa sumajta uyarina, kasukuna, maymantachus qallarinanchejta niwasqanchejtapis. Chay tantakuy tukukojtenqa niwasqanchejman jina ruwanapaj kallpachakuna, usqhayllatataj rina.
13. Tukuy ruwananchejta juntʼasun chay, ¿imaynatá willayman llojsinapaj tantakuy yanapawasun?
13 Jesuspa 70 discipulosnenqa willasqankumanta “kusisqa” kutimorqanku (Luc. 10:17). Jesusqa niraj paykunata willaj rinankupaj kachashaspa, paykunawan tantakorqa. Chaytaj willayninkupi allin rinanpaj yanaparqa. Kay tiempopis willayman llojsinapaj tantakoyqa kikillantataj yanapawanchej. Tukuy ruwananchejta juntʼasun chayqa, chay tantakuykuna kallpachawasun, yachachiwasun, tukuy runasman willananchej kasqan kamachiyta juntʼananchejpajtaj yanapawasun (Mat. 24:14).