Willayman llojsinapaj qotus, ¿imaspitaj yanapawanchej?
1. Libromanta Yachaqanapaj tantakuypi jina, ¿ima yanapastataj willayman llojsinapaj tantakuypi japʼillanchepuni?
1 Qotuspi Libromanta Yachaqanapaj tantakuymanta, ¿imastataj yuyarikunki? Chay qotuspeqa, pisilla tantakoj kanchej, tukuytaj rejsisqalla kaj kanchej, Jehová Diosta yupaychaypi yanapaj amigostataj tariyta atillaj kanchej (Pro. 18:24). Librota yachaqanapaj tantakuymanta yachachej hermanoqa, sapa ujninchejta astawan yanapawaj kanchej (Pro. 27:23, 24; 1 Ped. 5: 2, 3). Kunanpis chay yanapasta japʼillanchejpuni willayman llojsinapaj tantakuykunapi.
2. ¿Imatá qan ruwawaj qotuykimanta hermanoswan astawan masichakunaykipaj?
2 Qotuykiwan llojsiy. Willayman llojsinapaj qotuspeqa, libromanta yachaqanapaj tantakuypi mashkhachus tantakoj kanchej, jinallataj tantakunchej. Hermanosninchejwan “uj sonqolla” willamusqanchejrayku astawan ujchasqa kanchej (Fili. 1:27). Qotuykimanta mashkha hermanoswanñataj, ¿willaj llojsinki? ¿Manachu tukuywan llojsinaykipaj kallpachakuwaj? (2 Cor. 6:13.) Chantapis, wakin kuti qotuykimanta hermanosta mikhurinaykichejpaj chayri Familiapi Diosta Yupaychanapaj Chʼisi tantakuyman wajyariwaj. Wakin qotuchakuymanta, qotusqa, ujtaj ujtaj umallirichej hermano jamojtin mikhurinanpaj wajyarinku. Uj qotu wajyarinan kajtenqa, chay qotumanta tukuyninku tantakunku mikhurinankupaj, parlarinankupaj ima, umallirichej mana qhepakojtinpis.
3. ¿Ima yanapastataj willayman llojsinapaj qotuspi japʼinchej?
3 Semanapi iskay kutillataña qotuchakuypi tantakusqanchejqa, mana ninayanchu ancianos willajkunata pisillataña yanapanankuta. Willamunapaj kamachej hermanosqa, hermanosta sumaj willaj kanankupaj, kallpachanankupaj, yanapanankupaj ima churasqas kashanku. Willamunapaj kamachej hermanowan manaraj willayman llojsinkichu chayqa, ¿manachu paywan llojsinaykipaj parlariwaj? Chantapis sapa killa, semana tukukuyta, superintendente de servicio nisqa hermano, qotusta waturin. Juchʼuy qotuchakuykunapeqa, willayman llojsinapaj qotus pisilla kajtin, sapa qotuta watapi ichá iskay kutillata waturenqa. Superintendente de servicio nisqa hermano, qotuykita waturejtin, ¿willaj llojsinkichu?
4. a) Willayman llojsinapaj tantakuy, ¿imaynatá wakichikunan tiyan? b) ¿Imaraykutaj wasinchejmanta llojsinankuta ninapaj tʼukurisunman?
4 Wakin kutis qotuchakuy, semana tukukuyta willayman llojsinapaj qotuspi tʼaqakusqankoqa may sumaj. Ashkha lugaresmanta willayman llojsiyqa may sumaj, imaraykuchus hermanosqa willayman llojsinapaj tantakuyman, willakunan kashan chaymanpis chayayta atillanqanku. Chantá qotuspi willajkuna pisilla kasqankurayku, willayman usqhayta llojsiyta atenqanku. Willamunapaj kamachej hermanoqa, qotunmanta kajkunata kamachiyta atillanqa. Chaywanpis atikusqanman jina iskay chayri aswan qotus ujllapi llojsiyta atinkuman. Sapa killa ñaupaj kaj sabadota, chayri Torremanta Qhawaj revista ukhunchaytawan, qotuchakuy willayman llojsinan kajtenqa, qotusninchejmanta kajkunawan tiyakunanchej allin kanman. Jinamanta qotunchejta kamachej hermanoqa, piwanchus llojsinanchejta niraj Diosmanta mañakushajtinchej niyta atiwasun. (“¿Wasiykimanta llojsinankuta munawajchu?”, nisqa recuadrota leey.)
5. Manaña Librota ukhunchanapaj qotuspi tantakuspapis, ¿imamantataj mana iskaychakusunchu?
5 Manañapis Librota ukhunchanapaj qotuspi tantakunchejchu, Jehovaqa, munayninta ruwanapaj imatachus necesitasqanchejta qollawanchejpuni (Heb. 13:20, 21). Payqa, ni imata pisichiwasunchu (Sal. 23:1). Willayman llojsinapaj qotusqa, ashkha bendicionesta japʼinapaj yanapawanchej. Chayrayku qotusninchejwan willamunallapuni imaraykuchus “ashkhata tarpoj[qa] ashkhallatataj oqharenqa” (2 Cor. 9:6).
[6 paginapi recuadro]
¿Wasiykimanta llojsinankuta munawajchu?
Wakin qotuchakuykunaqa, semana tukukuyta willayman llojsinankupaj qotusta ujchaykunku, wasita llojsinankupaj mana tarisqankurayku. Willayman llojsinapaj tantakuyman riyqa, qotuchakuyman riy jinallataj kasqanrayku, wasinchejpi ruwakunanqa may sumaj. ¿Wasiykipi chay tantakuy ruwakunanta munawajchu? Chaypajqa mana sumaj wasiyojpunichu kanayki tiyan. Ancianosqa, maypichus wasiyki kasqanman jina, librota ukhunchanapaj tantakuy maypichus ruwakunanta ajllaj kanku, ajinallatataj ajllanqanku. Wasiykipi chay tantakuy ruwakunanta munanki chayqa, qotuykimanta willamunapaj kamachej hermanowan parlariy.