¿Imatá Bibliamanta yachakusunman? nisqa folletowan yanapachikuna
1. ¿Ima mosoj folletotataj japʼerqanchej?
1 Kay 2014 watapi “Ñaupajtaqa Diospa Reinonta maskʼana” nisqa jatun tantakuypi, ¿Imatá Bibliamanta yachakusunman? nisqa mosoj folletota japʼerqanchej. ¿Imaynatá yanapawasunman runaswan parlarinapaj wakichikushajtinchej? Kay folletoqa Razonamiento nisqa libro jina. Sapa tapuypa uranpitaj ashkha textos rikhurin. Chayrayku Bibliamanta yachachinapaj sumajta yanapawasunman.
2. ¿Imaynatá willasunman ¿Imatá Bibliamanta yachakusunman? folletowan?
2 Ichapis 8 kaj tapuymanta parlaspa nisunman: “Vecinosniykiwan parlarispa reparayku paykuna kayta tapukusqankuta: ¿Dioschu juchayoj runa ñakʼarinanpaj? [Wakin lugarespi folletomantapacha rikuchiy astawan yanapawasunman.] ¿Imatá qan yuyanki? [Kutichinanta suyariy.] Bibliaqa chayman kutichin”. Chantá folletopi qhelqasqa kaj textosta wakinta chayri ujllatapis leeripusunman, sutʼincharisunmantaj. Astawan yachayta munan chayqa, folletomanta ñaupaj paginanpi 20 tapuykuna rikhurisqanta rikuchisunman. Qhepan kutipitaj mayqellanmantapis parlarinanchejta nisunman. Chantapis ima publicacioneswanchus Bibliamanta yachachiyta qallarinchej chayta saqesunman, chaymantataj astawan sutʼinchashasqanta nisunman.
3. Maypichus Cristopi mana creejkuna tiyakunku chaypi, ¿imaynatá mosoj folletowan willasunman?
3 Kay folletoj 4, 13-17 kaj tapuykama, maypichus Cristopi mana creejkuna tiyakunku chaypi willanapaj yanapawasunman. Ichá 17 tapuymanta nisunman: “Familiasta yanapariyta munaspa waturishayku. Reparaykutaj sapa kuti aswan llakiypi rikukusqankuta, ¿imatá niwaj? [Kutichinanta suyariy.] Ashkha qhariwarmikuna kay yuyaychayman jina kausakunankupaj kallpachakunku ‘Warmeqa qosanta jatunpaj qhawachun tukuy imapi’. [Mana ninaykipunichu tiyan Efesios 5:33 chayta nisqanta. Uj warmiwan parlarishanki chaytaj Efesios 5:28 nisqanta niwaj.] Kay yuyaychayman jina kausay, ¿qhariwarmikunata yanapanmanchu?”
4. Cristopi mana creejkunawan parlaspa, ¿imatá niraj ripushaspa nisunman?
4 Niraj ripushaspataj qhepan kutipi chaymanta astawan parlarinapaj kutinanchejta nisunman. Kutispataj parlarisharqanchej chaymanta waj textotañataj sutʼinchasunman. Yachakusqanman jina chay yuyaychaykuna Bibliamanta orqhosqa kasqanta sutʼinchasunman. Imamantachus parlarisqanchejman jina, imatachus Bibliamanta yuyasqanman jinataj uj publicacionta saqesunman. (Reinomanta Willayninchejpi, 2013 diciembre killamanta 3-6 paginasta qhawariy.)