¿Imatapunitaq Biblia yachachin? librowan yanapachikuna

Bibliamanta yachachisqanchej runasqa, Bibliaj nisqanta yachakuspa chayman jina kausakunku, Diosta yupaychaypitaj ñauparinku (Sal. 1:1-3). Noqanchejtaj yanapasunman Yachachin librowan, chay libroqa sumaj wakichisqa kashan.

Tapuykuna. Sapa yachaqanaj qallariyninpi tapuykuna tiyan, chay tapuykunamantaj chay yachaqanapi kutichikun. Chay tapuykunaqa imamantachus yachakunan kashan chayta yachananpaj. Chantapis yanapawanchej yachakoj imatachus yuyasqanta yachanapaj. Wakin imaspi pantarpajtenqa, mana chay ratochu sutʼinchananchej tiyan. Astawanpis mayqen parrafopichus chaymanta parlashan chayta ukhunchashaspa sutʼincharisunman (Pro. 16:23; 18:13).

Yapa. Yachachin libroj tukukuyninpeqa wakin yachaqanasmanta astawan sutʼinchashan, chaytaj yapa nisqa. Bibliamanta yachakoj uj yachaqanata allinta entiendejtenqa, sapallanpi chaymanta sutʼinchaj yapanta leerinanta nisunman. Qhepan kutipitaj imatachus entiendesqanta tapurisunman. Atispaqa, yachakojwan ukhuncharisunman tukuyninta chayri wakillantapis. Parrafosta leerisunman, wakichikusqanchejman jinataj tapurisunman.

Yuyarinapaj. Sapa yachaqanaj tukukuyninpi uj recuadro tiyan yuyarinapaj. Chaypeqa yachaqanaj qallariyninpi rikhurej tapuykunaman kutichishan. Chay recuadrota ukhunchaspaqa yachanchej, Bibliamanta yachakoj imatachus entiendesqanta, chantapis sutʼinchayta atisqantachus manachus chayta. Chay recuadropi nisqanta, versiculosta ima leeriytawan, yachakojta nisunman: “Kay versiculosman jina, ¿imaraykutaj kaypi nisqan cheqapuni?”, nispa (Hech. 17:2, 3).