Diosninchejqa munakuwanchej, llakikuwanchejtaj

1. DIOSNINCHEJQA INTITA LLOJSICHIMUN

¿Imaynataj kausay kanman mana inti llojsimojtin? Inteqa yanapan sachʼaspa hojasnin, tʼikasnin, poqoynin ima wiñananpaj. Chantapis inti kasqanrayku sachʼasqa saphisninkunejta jallpʼamanta yakuta chʼonqayta atinku, chay yakutaj hojasninkukama chayan, chaymantataj vausispa llojsipun.

Uj orqo kinraypi té plantasqa patamantapacha rikukun.

2. DIOSNINCHEJQA PARACHIMUN

Dios parachimusqanrayku jallpʼapeqa tukuy ima poqon mikhunanchejpaj. Diosqa cielomanta parachimun, tiemponpi ashkhata poqochin, mikhuna patapi uywawanchej, sonqosninchejtataj kusiywan juntʼachin.

Uj pʼesqetu uj plantaj ramanpi sayashan uj poqoysitutataj siminwan japʼiyta munashan.

3. DIOSNINCHEJQA MIKHUNATA, ROPATA IMA QOWANCHEJ

Tatasqa familiankuman mikhunata, ropata ima qonankumanta llakikunku. Bibliataj nin: “Allinta qhawariychej pʼisqosta: Mana tarpunkuchu, nitaj ruthunkuchu, nillataj pirwaspipis jallchʼankuchu. Cielopi kaj Tataykichejtaj paykunata mikhuchin. ¿Manachu qankunaqa aswan valorniyoj kankichej chay pʼisqosmanta nisqaqa?”, nispa (Mateo 6:25, 26).

‘Qhawariychej imaynatachus campo tʼikas wiñasqankuta. Cheqatapuni niykichej: Ni Salomonpis tukuy qhapaj kayninpi, ujnin tʼika jinallapis ropata churakorqachu. Campo qhoraqa kunan kashan, chay qhoratachus Dios ajinata pʼachallichin chayqa, ¿manachu astawanraj qankunataqa pʼachallichisonqachej?’ (Mateo 6:28-30).

Diosqa qowanchej mikhunata, ropata ima, chayrayku waj imasta necesitasqanchejtapis qollawasunmantaj. Diospa munayninta ruwanapaj kallpachakojtinchejqa, mikhunata conseguinapaj kallpachakojtinchej bendeciwasun chayri trabajota tarinapaj yanapawasun. Ajinamantataj necesitasqanchejta rantinapaj kapuwasun (Mateo 6:32, 33).

Intita, pʼesqosta, tʼikasta, parata ima qhawarispaqa, astawan Diosta munakunchej. Qhepan yachaqanaspi yachakusun imatachus Diosninchej ruwasqanta runaswan parlananpaj.