Sinchʼita llakikojkunaqa astawan yapakushanku
“Ni imata ruwashaspapis llakikushallanipuni”.
“Kusisqa kashajtiypis llakikuni. Piensani ujllata sinchʼi llakiy japʼinawanta”.
“Kunan diallamanta llakikuyta munaspapis, killantinmanta llakikuni”.
Ajinata ninku anchata llakikusqankurayku onqosqa runas. ¿Qanpis chay runas jinallatajchu llakikunki? Chayri, ¿rejsinkichu pillatapis ajinata llakikojta?
Jina kajtenqa mana qanllachu ajina kanki. Jallpʼantinpi may chhika runas imaymana llakiywan onqoykunku, chayri familiankumanta pillapis ajinapi rikukusqanrayku sufrinku.
Kay tiempopi ‘kausayqa may llakiy, maytataj sajrayashan’. Chayrayku ashkha imas llakichiwanchej, sufrichiwanchejtaj (2 Timoteo 3:1). Yachakusqanman jina, mundo enteropi sapa pusaj runasmanta uj runa llakiywan onqoykun. COVID onqoy kasqanraykutaj, 2020 watapi sinchʼi llakiy onqoywan kajkunaqa 78 milloneswan jina yapakorqanku.
Chayta yachananchej sumaj kajtinpis, astawan yachayta munanchej imatachus noqanchej, chayri familiaresninchej ruwananchej kasqanta allillan kananchejpaj.
¿Imaynataj mana anchata llakikojkuna kanku?
Chay jina runasqa kusisqa kausakunku, sapa día ruwanasninkutapis ruwayta atillanku. Mana llakiykunawan atipachikunkuchu, trabajonkuta sumajta ruwanku, sonqo juntʼasqataj kausakunku.
¿Imaraykutaj wakin runas anchata llakikunku?
MANA juchachu ajinata llakikoyqa.
Tukuy tiempo anchata llakikoyqa UJ ONQOY. Ajinata llakikoj runasqa manaña sano runas jinachu yuyanku, imatapis ruwarpariyta munallanku.
Ajina runasqa wajkunawan mana allinta kausakuyta atillankuchu, nitaj ruwanasninkutapis sumajta juntʼayta atinkuchu.
Chay onqoyqa pitapis japʼirparillanman ima edadniyoj kajtinpis, maymanta kajtinpis, escuelayojchus manachus kajtinpis, ima religionniyoj kajtinpis, wajcha chayri qhapaj kajtinpis.
Yanapata maskʼay
Wakin runasqa allillan kashaspa ujllata sinchʼita llakikunku, waqanku chayri rabiakunku. Wakintaj mana mikhunkuchu chayri anchatañataj mikhunku, manaqa mana puñunkuchu chayri puñuyllawan atipachikunku. Wakintajrí tukuy tiempo llakisqalla kanku chayri anchata phutikunku. Ichapis qan ajina kashanki chayri mayqen familiarniyki manaqa amigosniyki ajina kashanku. Jina kajtenqa ichapis doctorman rinaykichej kanqa. Ajinamanta yachankichej imaraykuchus ajina kashasqaykichejta, imatachus allinyapunaykichejpaj ruwanaykichejtapis. Chanta, ¿imatawan ruwawajchej?
Jallpʼantinmanta aswan yachayniyoj runaqa Jesucristo karqa. Paytaj nerqa: “Sano runasqa mana doctorta necesitankuchu, onqosqaslla necesitanku”, nispa (Mateo 9:12). Chayrayku sichus reparakunki tukuy tiempo llakisqalla kasqaykita chayqa, allin kanman usqhayllata doctorman rinayki. Imaraykuchus payqa yanapasunkiman manaña ajina llakisqalla kanaykipaj, jinallataj watejmanta allillan, kusisqataj kanaykipaj.a
Bibliaqa mana jampismanta parlaj librochu. Jinapis imatachus nisqanqa, mana anchata llakikunapaj, allillan kanapajtaj yanapawasunman. Qhepan paginaspi chaymanta parlakonqa. Chayrayku allinpuni kanman leerinayki.
a Kay revistaqa mana ninchu ima tratamientotapunichus ruwana kasqanta. Sapa uj sumajta piensarikuspa imatachus ruwananta ajllanan tiyan.