4 | Bibliaqa sumajta yanapasunkiman

¿Imaraykutaj Bibliata leena?

Bibliaqa mana jampismanta parlaj librochu. Jinapis yuyaychaykunasnenqa llakiywan onqosqa kajkunata mayta yanapanman. Wakin versiculosta qhawarina.

¿Imaynatá Biblia yanapawanchej?

“Sano runasqa mana doctorta necesitankuchu, onqosqaslla necesitanku” (MATEO 9:12).

Bibliaqa niwanchej wakin kutis doctormanpuni rina kasqanta. Anchata llakikojkunamanta ashkhasqa, doctorman riytawan allinyarinku. Imajtinchus doctorqa paykunaman nin imaraykuchus ajina kashasqankuta, uj tratamientotataj qon.

“Cuerpo ejerciciota ruwajtin, allin” (1 TIMOTEO 4:8, Mosoj Testamento, 1985).

Tiempochakuna, kallpachakunataj sapa kuti ejerciciosta ruwanapaj, sumaj alimentosta mikhunapaj, sumajta puñunapaj ima. Ajinamanta niña anchata llakikusunchu.

“Kusisqa sonqoqa sumaj jampi. Llakisqa sonqotaj kallpata tukuchin” (PROVERBIOS 17:22).

Kallpachanawanchejpaj jina versiculosta leerispa, atisqanchej imasllata ruwaspapis, aswan kusisqa kasun. Allin imaspi yuyajtinchej, problemasninchejpis allinyapunanpi yuyajtinchejqa, llakiywan onqosqa kaspapis ichá allillan kasun.

‘Kʼumuykukoj runaqa yachayniyoj kanqa’ (PROVERBIOS 11:2).

Wakin kutisqa ichapis wajkuna yanaparisunankuta necesitanki. Chayrayku yanapayta munasojtinkoqa yanapachikuy. Amigosniykiwan familiaykiwanqa yanapayta munasunku. Jinapis ichá mana yachankuchu imaynatachus yanapasuyta. Chayrayku paykunaman sutʼita niy imatachus necesitasqaykita. Pero ama yuyaychu tukuy ima nisqaykitapuni ruwanankuta, yanaparisusqankumantataj agradekuypuni.

Bibliaqa anchata llakikojkunata yanapanman

Nicola nin: “Manapuni allinchu kasharqani, chayrayku doctorman rerqani. Doctorataj imaraykuchus ajina kashasqayta niwarqa. Ajinapi yacharqani mana sanochu kashasqayta. Chantapis ima tratamientotachus ruwanayta niwarqa” (Payqa kusisqalla kashaspa ujllata llakikun [trastorno bipolar]).

Pedro nin: “Señoraywan sapa día Bibliata leesqaykoqa mayta yanapawan. Imatachus leesqaykutaj chay día allin imaspi yuyanaypaj yanapawan. Wakin días sinchʼi llakisqa kashajtiy, uj versiculota yuyarikunipuni. Chaytaj mayta sonqochawan” (Payqa sinchʼi llakiywan onqosqa kashan [depresión]).

Ji-yoo nin: “Qallariypeqa onqoyniymanta wajkunaman willariyta pʼenqakoj kani. Jinapis ujnin amigayqa sumajta uyariwaj, noqawantaj kʼacha kaj. Ajinamanta aswan allinña karqani, repararqanitaj mana sapaychu kashasqayta” (Payqa llakikusqanrayku anchata mikhun [trastorno alimenticio]).

Timoteo nin: “Bibliata leesqayqa yanapawarqa maychus kajllata trabajanaypaj, sumajtataj samarikunaypaj. Bibliaj yuyaychaykunasenqa mana llakiyniywan atipachikunaypaj yanapawarqa” (Payqa anchata llakikun mana allin yuyaykuna atipasqanrayku [trastorno obsesivo compulsivo]).