3 | Diospa kamachisninmanta yachakuy

BIBLIA NIN: Unay tiempomanta Diospa kamachisnenqa ‘noqanchej jinallataj karqanku’ (SANTIAGO 5:17).

¿Imajtín paykunamanta parlanchej?

Bibliamanta ashkha qharis warmispis imaymana llakiykunasniyoj karqanku. Paykunamanta leerispaqa ichapis reparasun, llakiyninchejqa llakiyninkuman rijchʼakullasqantataj.

¿Imaynatá Biblia yanapawanchej?

Sinchʼi llakisqa kashaspaqa wajkuna entiendenawanchejta munanchej. Unay tiempo Diospa kamachisninmanta leerispaqa, ichapis reparasun paykuna jinallataj yuyasqanchejta chayri llakikusqanchejta. Ajinamantataj yachasun, mana noqallanchejchu phutikusqanchejta chayri sinchʼita llakikusqanchejta.

Ichá maykʼajllapis nerqanchej: “Manañapuni aguantayta atinichu, wañupullaymanñapis”, nispa. Bibliaqa willawanchej Moisés, Elías, David, waj runas ima ajinallatataj nisqankuta sinchʼi llakisqa kashaspa, chayri kausayninkuwan saykʼusqaña kashaspa (Números 11:14; 1 Reyes 19:4; Salmo 55:4).
Bibliaqa Anamanta parlallawanchejtaj. Payqa mana wawasniyoj kayta atisqanmanta sinchʼita llakikoj, jinallataj warmi masin asipayaspa burlakusqanmantapis (1 Samuel 1:6, 10).
Bibliaqa Jobmanta parlallantaj. Ichapis kausayniyki paypa kausaynin jina kasqanta yuyawaj. Jobqa Diospi sinchʼita creespapis mayta llakikusqanrayku nerqa: “Amisqaña kani kausayniywan. Niña kausayta munanichu”, nispa (Job 7:16).

Tukuy chay runasqa llakiyninkuta atipayta aterqanku. Paykunamanta yachakuspaqa noqanchejpis llakiyninchejta atipayta atillasunmantaj.

Kevinqa Bibliawan yanapachikorqa

Kusisqalla kashaspa ujllata sinchʼita llakikuni

“Casi 50 watasniyoj kashajtiy uj onqoyniyoj kasqayta niwarqanku. Chay onqoyniyoj kasqayrayku, kusisqalla kashaspa ujllata sinchʼita llakikuyta qallarini. Wakin diasqa tukuy imata ruwanaypaj kallpay tiyan, wakin diastaj wañupullaytaña munani”.

Biblia yanapawan

“Apóstol Pedroman rijchʼakusqayta yuyani. Payqa pantasqasninrayku wakin kutis ni imapaj valesqanta yuyaj. Jinapis chayllapi yuyananmantaqa payta munakoj amigosninwan yanapachikoj. Noqapis onqoyniyrayku wakin diasqa mana allinchu kani. Pantasqasnillaypi piensani, ni imapaj valesqaytataj yuyani. Jinapis Pedro jina amigosniywan yanapachikunaypaj mayta kallpachakuni. Paykunaqa onqoyniywan mana atipachikunaypaj yanapawanku.

”Rey Davidpipis piensarillanitaj. Payqa llakiykuna qhatirisqanrayku, juchasninrayku ima sinchʼita phutikorqa. Noqapis wakin kutis imatapis parlarparisqaymanta chayri ruwarparisqaymanta pay jinallataj phutikuni. Chayrayku imatachus David 51 Salmopi qhelqasqanqa mayta sonqochawan. Chay Salmoj 3 versiculonpi nerqa: ‘Allinta yachani mana kasukusqayta. Chay juchaytaqa mana qonqayta atinichu’, nispa. Noqapis sinchʼi llakisqa kaspa ajinapuni kani, ni imapaj valesqayta yuyani. Jinapis 10 versiculopi tʼukurini. Chaypi nin: ‘Diosníy, llimphu sonqota qoway. Allin sonqota qoway, kasukoj sonqota’, nispa. Chantá Diosmanta mañakuni: ‘Diosníy, amaña sonqoy juchachanawanpaj yanapariway ari’, nispa. 17 versiculopi nisqantaj mayta sonqoyta tiyaykuchin. Chaypi nin: ‘Diosníy, qanqa mana wijchʼuyta yachankichu sonqon pʼakisqa, sonqon nanasqa runataqa’, nispa. Kay versiculota sapa kuti leespa, yuyarikuni Jehová mayta munakuwasqanta.

”Davidpi, Pedropi ima sapa kuti piensarini, jinallataj imastachus Dios qowasqanpipis. Chayqa yanapawan allin kausay kanantapuni yuyanaypaj. Bibliaj nisqasnin juntʼakunanpipuni creesqayrayku llakiyniywan mana atipachikunichu, nitaj saykʼupunichu”.