2 | ‘Diosmanta Qhelqasqaqa sonqochakunapaj’

BIBLIA NIN: “Ñaupa tiempopi qhelqakusqanqa, yachachinawanchejpaj qhelqasqa karqa, jinallataj suyakuyniyoj kananchejpaj. Imaraykuchus Diosmanta Qhelqasqaqa sinchʼita sayanapaj, sonqochakunapaj ima yanapawanchej” (ROMANOS 15:4).

¿Ima niytataj munan?

Bibliaqa mana allin yuyaykunata atipanapaj yanapawanchej, sonqochawanchej, kallpachawanchejtaj. Chantapis niwanchej tukuy llakiykuna tumpamantawan chinkananta.

¿Imaynatá Biblia yanapawanchej?

Tukuypis llakikuyta chayri phutikuyta yachanchej. Jinapis llakiywan onqoykojkunaqa sapa diapuni llakisqa kanku. ¿Imaynatá Biblia paykunata yanapanman?

Bibliapeqa may chhika kʼacha palabras tiyan. Chaykunataj mana allin yuyaykunata umanchejmanta orqhonapaj yanapawasunman (Filipenses 4:8). Bibliata leerejtinchejqa sonqonchej tiyaykonqa, niñataj anchata llakikusunchu (Salmo 94:18, 19).
Bibliata leespaqa mana pisipaj qhawakusunchu, nitaj yuyasunchu ni imapaj valesqanchejta (Lucas 12:6, 7).
Bibliaqa niwanchej mana sapallanchejchu kashasqanchejta. Chantapis nillawanchejtaj, Tatanchej Jehová imaynachus kashasqanchejta sumajta entiendesqanta (Salmo 34:18; 1 Juan 3:19, 20).
Bibliapi nin Diosqa pisimantawan tukuy llakiykunasninchejta qonqachinawanchejta (Isaías 65:17; Apocalipsis 21:4). Chayrayku mana allin yuyaykuna jamuwajtinchej chayri sinchʼi llakisqa kashanchej chayqa, Bibliaj nisqanta yuyarikuna. Chaytaj ñaupajllamanpuni rinapaj kallpachawasun.

Jessicaqa Bibliawan yanapachikorqa

Sinchʼita llakikusqayrayku onqoykuni

“25 watasniyoj kashajtiy ujllata mal churakorqani. Doctorestaj niwarqanku sinchʼita llakikusqayrayku onqoykusqayta. Ujllata umayman jamuwaj kausayniymanta llakiy yuyaykuna, nitaj imata ruwayta atejchu kani chaykunata chinkachinaypaj. Doctoresqa niwarqanku ñaupajta sinchʼi llakiyta kausakusqayrayku ajina yuyaykuna umayman jamuwasqanta, chayrayku tukuy tiempo llakisqalla kasqayta. Allinyakapunaypajqa tabletastapuni tomanay karqa. Chantapis doctorman rerqani imaraykuchus ajina llakisqalla kasqayta yachanaypaj, imatachus ruwanaypajpis.

Biblia yanapawan

“Manchay llakisqa kaspaqa ujllata mancharikoj kani, phutikoj kani, ni puñuytapis atejchu kani. Wakin tutasqa sinchʼita llakikusqayrayku imaymana yuyaykuna umayman kutin kutita jamuwaj. Jinapis Salmo 94:19 nin jina, Diosninchejqa phutisqa kashajtinchej sonqochawanchej, sonqonchejtapis tiyaykuchin. Chayrayku camay chaypeqa uj Biblia kapuwajpuni, jinallataj sonqochanawanpaj versiculoswan anotasqa cuadernitopis. Mana puñuyta atejtiytaj chay versiculosta leekoj kani. Ajinamanta Dios sonqochawaj.

”Bibliaqa nin Diospa yuyayninwan churanakoj yuyaykunata mana japʼikunachu kasqanta. Unayqa piensaj kani ni imapaj valesqayta, nitaj pipis munakunawanpaj jinachu kasqayta. Pero chay yuyaykunaqa mana Bibliaj nisqanman jinachu kasqa. Imaraykuchus Bibliapi nin Diosninchejqa manchay munakuyniyoj, khuyakuyniyoj Tata kasqanta, sapa ujninchejmantataj llakikusqanta. Chaytaj yanapawarqa mana allin yuyaykunata umaymanta pisimanta pisi orqhonaypaj. Chantapis Jehová Dios jina noqamanta piensanaypaj kallpachakorqani. Chay jinamanta manaña ancha pisipaj qhawakunichu.

”Maytapuni munashani ñaupajta llakichiwarqa chay imas yuyayniymanta chinkapunanta, jinamanta manaña sufrinaypaj. Yachani pisimantawan tukuy imaymana onqoykuna chinkananta. Chayta yachayqa onqoyniyta aguantanaypaj kallpachawan. Imaraykuchus uj pʼunchayqa, manaña onqosajchu sinchʼita llakikusqayrayku”.