¿Imatá Biblia rikuchin Jehovamanta?

1. ¿Imaraykutaj Bibliata uj sumaj regalota jina Jehová qowasqanchejmanta agradecekunki?

JEHOVAMAN mayta agradecekunchej Bibliata uj sumaj regalota jina qowasqanchejmanta. Payqa chaypi sumaj yuyaychaykunata qowanchej. Chaytaj yanapawasunman problemaspi kashaspa imatachus ruwanata yachanapaj. Chantapis payqa aswan qhepapaj uj sumaj suyakuyta qowanchej. Mana chayllachu, Jehovaqa Biblianejta imaynachus kasqanta rikuchiwanchej. Jehovaj kʼacha kaykunasninpi tʼukureyqa mayta sonqonchejta kuyurichin. Chaytaj yanapawanchej payman astawan qayllaykuyta munanapaj, amigosnintaj kanapaj (Sal. 25:14).

2. ¿Imaynasmantataj Jehová runasman rejsichikorqa?

² Jehovaqa munan runas payta rejsinankuta. Ñaupa tiempopi, Jehová rejsichikorqa mosqoykunanejta, mosqoypi jina rikusqankunejta, angelesnejta ima (Núm. 12:6; Hech. 10:3, 4). Sichus tukuy chaykunata mana qhelqakunmanchu karqa chayqa, mana estudiayta atisunmanchu karqa. Chayrayku Jehovaqa wakin runasta kamacherqa, imatachus paymanta yachananchejta munasqanta “uj libropi” qhelqanankuta (Jer. 30:2). “Diospa ruwasqasnenqa mana pantayniyoj”. Chayrayku Jehová ajinata noqanchejwan rejsichikusqanqa may sumaj, yanapawanchejtaj (Sal. 18:30).

3. ¿Imatataj Jehová ruwarqa Biblia kunankama kanallanpajpuni? (Isaías 40:8).

³ (Isaías 40:8 leey). Diospa Palabranqa may chhika watastaña Diospa kamachisninta sumajta yanapan. Pero, ¿imaynamantá chayta ruwayta atin? Bibliaqa ashkha watas ñaupajtaña maukʼayapoj imaspi qhelqasqa karqa. Yachakusqanman jinataj, chay ñaupa qhelqasqasqa manaña ujpis kay tiempopi kanchu. Jinapis Jehovaqa chay qhelqasqasta copiacherqa. Chay copiajkuna pantaj runas kajtinkupis, sumajsituta copianankupaj kallpachakorqanku. Hebreo Qhelqasqasmanta parlaspa uj yachayniyoj runa nerqa: “Bibliaqa imatachus qallariypi nerqa chay kikillantapuni kunanpis nishan, nitaj mayqen librotapis ajinata ruwarqankuchu”, nispa. Pantaj runas maukʼayapoj imaspi unay watasña Bibliata qhelqajtinkupis, sutʼita rikunchej kay tiempopi Biblianchejpi leesqanchejqa Diospa yuyayninpuni kasqanta.

4. ¿Imatataj kay yachaqanapi yachakusunchej?

⁴ “Tukuy ima allin kaj regaloqa, aswan sumaj regalopis” Jehovamanta jamun. Imastachus Jehová qowanchej chaykunamantataj, Biblia aswan sumaj regalo kashan (Sant. 1:17). Pillapis imata regalawasqanchejpi reparanchej sumajta rejsiwasqanchejta, imatachus necesitasqanchejtapis yachasqanta. Bibliawanpis ajinallataj. Chayta estudiaspaqa mayta Jehovamanta yachakunchej. Reparanchej payqa sumajta rejsiwasqanchejta, imatachus necesitasqanchejtapis yachasqanta. Bibliaqa Jehovaj yachayninta, cheqan kayninta, munakuynintapis sutʼita rikuchin. Kay yachaqanapitaj chay kinsa imasta rikuchisqanta yachakusunchej. Ñaupajta qhawarina Bibliaqa Diospa yachayninta rikuchisqanta.

BIBLIAQA DIOSPA YACHAYNINTA RIKUCHIN

5. ¿Imajtintaj nisunman Biblia Diospa yachayninta rikuchisqanta?

⁵ Jehovaqa yachan sumaj yuyaychaykunasninta necesitasqanchejta. Chayrayku Bibliata uj sumaj regalota jina qowanchej, chaypitaj yachaynin juntʼa kashan. Yuyaychaykunasnenqa runasta maytapuni yanapan. Bibliaqa runaspa kausayninkuta cambiayta atin. Bibliaj ñaupaj kaj librosninta qhelqashaspa, Moisesqa Diospa llajtan israelitasman nerqa: “Kay nisqasneyqa mana qhasi parlaykunallachu kanku, manachayqa kausayniykichej kanku”, nispa (Deu. 32:47). Pikunachus Diospa Palabranta kasukojkunaqa kusisqas kausakunkuman karqa, allintaj rinman karqa (Sal. 1:2, 3). Bibliaqa may chhika unayña qhelqasqa kajtinpis, runaspa kausayninta cambiananpaj atiyniyojllapuni. Jw.org nisqa paginapi, “Bibliaqa cambianankupaj yanaparqa” nisqapi ashkha experiencias tiyan. Chay experienciaspitaj reparanchej Bibliaqa cambianankupaj mayta yanapasqanta, Bibliaj yuyaychaykunasninta kasukusqankuraykutaj kausayninku allinyasqanta (1 Tes. 2:13).

6. ¿Imaraykutaj Biblia jina mana waj libro kanchu?

⁶ Biblia jinaqa mana waj libro kanchu. ¿Imarayku? Imaraykuchus Bibliataqa Jehová qhelqacherqa. Paytaj Tukuy Atiyniyoj, wiñaypaj, pay jina yachayniyojtaj mana pipis kanchu. Ashkha librostaqa chay librosta qhelqajkuna wañupojtinkuñapis runas leellankupuni. Jinapis chay librospi yuyaychaykuna kasqanqa, ashkha kutispi manaña runasta yanapanchu. Bibliaj sumaj yuyaychaykunasnintajrí wiñaypaj. Tukuy tiempomanta runasta kunankama yanapashallanpuni. Bibliata leejtinchej, yuyaychaykunasninpitaj tʼukurejtinchej, Diosqa atiyniyoj espíritu santonwan yanapawanchej Bibliaj yuyaychaykunasninman jina kausakunanchejpaj (Sal. 119:27; Mal. 3:16; Heb. 4:12). Bibliata qhelqachej Diosqa tukuy sonqo yanapayta munawanchej. ¿Manachu chay tanqawanchej Bibliata leeyman yachaykukunapaj?

7. Ñaupa tiempopi, ¿imaynatataj Biblia Diospa llajtanta ujcharqa?

⁷ ¿Imataj rikuchillantaj Bibliapi Diospa yachaynin kashasqanta? Diospa llajtanta ujchasqa kananpaj yanapasqan. Israelitasqa Sumaj Jallpʼaman yaykuspa tukuy ladospi tiyakuyta qallarerqanku. Wakenqa pescadores kayta qallarerqanku, wakintaj uywasta uywayta, wakintajrí tarpuyta. Chayrayku nacionpa ujnin ladonpi tiyakoj israelitasqa, facilta qonqapunkuman karqa waj ladopi tiyakoj israelitasmanta. Jehovatajrí kamacherqa tukuyninku tantakunankutapuni Palabranta uyarinankupaj, astawantaj yachakunankupaj (Deu. 31:10-13; Neh. 8:2, 8, 18). Jerusalenmanqa nacionnintinmanta may chhika israelitas rej kanku Jehovata yupaychaj. Chay chhika israelitasta rikuspa, ¿imaynataj uj israelita kashanman karqa? Ajinata Jehovaqa tukuy israelitasta yanaparqa ujchasqallapuni kanankupaj. Ñaupa cristianospa tiemponkumanta congregacionpitaj tukuy laya qharis, warmis ima karqanku. Paykunamanta wakenqa ñaupajta sumajpaj qhawasqas karqanku, wakintaj pisipaj qhawasqas, kallarqankutaj qhapajkuna, wajchaspis, nitaj tukuychu uj parlayllata parlaj kanku. Jinapis tukuyninku Diospa Palabranta munakusqankurayku, ujchasqasllataj Jehovata sirvej kanku. Mosojkunapis congregacionman yaykuytawan, Diospa Palabranta entiendeyta atej kanku waj cristianos sutʼinchasqankurayku, khuskataj tantakusqankurayku (Hech. 2:42; 8:30, 31).

8. ¿Imaynatataj Jehová kay tiempopi llajtanta Biblianejta ujchan?

⁸ Jehovaqa kay tiempopipis Biblianejllatapuni llajtanman yachachishan, ujchasqatataj japʼishan. Kay tiempopi sumaj yachachiykunata mikhunata jina japʼisqanchejqa Bibliamanta orqhosqa kashan. Cristianosqa tantakuykunaman, asambleasmanpis rinchejpuni. Chaypitaj Bibliata leenchej, ukhuncharinchej, astawantaj chaymanta yachakunchej. Sutʼita reparanchej Jehovaqa Biblianejta kamachisninta yanapashasqanta, ‘khuska payta sirvinankupaj’ (Sof. 3:9).

9. ¿Imayna runastaj kananchej tiyan Bibliata entiendenapaj? (Lucas 10:21).

⁹ ¿Imataj rikuchillantaj Jehovaj yachayninta? Jehovaqa Palabranmanta ashkha partesta qhelqacherqa kʼumuykukoj sonqo runaslla entiendeyta atinankupaj jina (Lucas 10:21 leey). Bibliataqa mundontinmanta runas leenku. Uj yachayniyoj runa nerqa Bibliaqa “mana ashkha librosmanta aswan leesqa librollachu kasqanta, manaqa sumaj estudiasqa ima kasqanta”. Jinapis kʼumuykukoj sonqoyoj runaslla Bibliata entiendeyta atinku, chayman jinataj kausakuyta atinku (2 Cor. 3:15, 16).

10. ¿Imaynapitaj yachallanchejtaj Jehovaj yachaynin Bibliapi sutʼi rikukusqanta?

¹⁰ ¿Imaynapitaj yachallanchejtaj Jehovaj yachaynin Bibliapi sutʼi rikukusqanta? Jehovaqa Palabrannejta mana uj grupota jinallachu yachachiwanchej, manaqa sapa ujninchejta yachachiwanchej, sonqochawanchejtaj. Palabranta leespaqa reparanchej sapa ujninchejmanta mayta llakikusqanta (Isa. 30:21). Uj problemayoj kashaspa, ashkha kutispichá chay kutipi yanapanawanchejpaj jinapuni uj textota leerqanchej. Biblia may chhika runaspaj qhelqasqa karqa chay, ¿imajtintaj chanta kay tiempomanta runaspaj jina kashan, sapa ujta yanapananpaj jinataj? Bibliata Jehová qhelqachisqanraykulla. Paytaj pimantapis aswan yachayniyoj (2 Tim. 3:16, 17).

BIBLIAQA DIOSPA CHEQAN KAYNINTA RIKUCHIN

11. ¿Imaynatá Jehová tukuyta uj rejllata qhawasqanta rikucherqa Bibliata qhelqachishaspa?

¹¹ Cheqan kayqa Jehovaj ujnin kʼacha kaynin (Deu. 32:4). Pichus cheqan kajta ruwajqa tukuytapuni uj rejllata qhawayta yachan. Jehovataj tukuyta uj rejllata qhawan (Hech. 10:34, 35; Rom. 2:11). Chaytataj sutʼita rikunchej ima parlaykunapichus Bibliata qhelqachisqanpi. Bibliaj ñaupaj 39 librosnenqa casi tukuynin hebreo parlaypi qhelqasqa karqa. Jaqay tiempomanta Diospa llajtantaj chay parlayta entiendej kanku. Jinapis ñaupa cristianospa tiemponkupi runasqa griegotañataj parlaj kanku. Chayrayku Bibliaj 27 último librosnenqa chay parlaypiñataj astawan qhelqakorqa. Jehovaqa Palabranta mana uj parlayllapichu qhelqacherqa. Kay tiempopeqa jallpʼantinpi casi 8 mil millones runas kanchej, imaymana parlaykunatataj parlanchej. ¿Imaynatá chanta Jehovata tukuy rejsiyta atisunman?

12. ¿Imaynatataj Daniel 12:4 kay tukukuy tiempopi juntʼakun?

¹² Jehovaqa profeta Danielnejta nerqa kay tukukuy tiempopi ‘cheqa yachayqa astawan ashkhayananta’, nisunman ashkha runas Bibliata entiendenankuta (Daniel 12:4 leey). Chaytaj ajina kashan Bibliata, Bibliamanta orqhosqa publicacionestapis ashkhata traducikusqanrayku, ruwakusqanrayku, runasmantaj jaywakusqanrayku. Kunankamaqa ni mayqen librotapis Bibliata jina ashkha parlaykunapi traducikunchu, nitaj may chhika runasmanpis jaywakunchu. Bibliasta traducisqankumanta ashkhastaqa ancha valesqapi vendenku. Jehovaj llajtantajrí, tukuynin Bibliata chayri wakillanta 240 kuraj parlaykunapiña traducin. Tukuy runastaj mana pagaspalla chay Bibliata japʼikuyta atinku. Chayrayku tukuy nacionesmanta may chhika runasqa, ‘Diospa Gobiernonmanta sumaj willaykunata’ niraj tukukuy chayamushajtin japʼikushanku (Mat. 24:14). Jehovaqa cheqan Dios, mayta munakuwasqanchejraykutaj atikojtenqa tukuy runas Palabranta leespa payta rejsinankuta munan.

BIBLIAQA DIOSPA MUNAKUYNINTA RIKUCHIN

13. ¿Imaraykutaj ninchej Biblia Diospa munakuyninta rikuchisqanta? (Juan 21:25).

¹³ Bibliaqa rikuchillantaj Jehovaj kʼacha kaykunasninmanta aswan kurajqa munakuy kasqanta (1 Juan 4:8). Tʼukurina imastachus Dios Bibliapi qhelqachisqanpi, chantá imastachus mana qhelqachisqanpi. Payqa amigosnin kanapaj, kusisqas kausakunapaj, wiñaypajtaj kausakunapaj imastachus yachayta necesitasqanchejtapuni willawanchej. Jinapis mayta munakuwasqanchejrayku, Jehovaqa mana necesitasqanchej imasta mana Bibliapi qhelqacherqachu (Juan 21:25 leey).

14. ¿Imaynamantataj Biblia Diospa munakuyninta rikuchillantaj?

¹⁴ ¿Imaynatataj Jehová munakuwasqanchejta rikuchillawanchejtaj? Payqa mana kʼumuykachachinawanchejpaj jinachu parlawanchej. Jehovaqa mana may chhika kamachiykunatachu Bibliapi qowanchej, mana tukuy imitapajchu niwanchej imatachus ruwanata, imatatajchus mana ruwanata. Astawanpis ñaupa runaspa kausayninkumanta willawasqanchejwan, may sumaj profeciasninwan, sumaj yuyaychaykunawan ima kausayninchejpi allin imasta ajllanapaj yanapawanchej. Ajinamanta Bibliaqa sonqonchejta aysan Jehovata munakunanchejpaj, tukuy sonqotaj kasukunanchejpaj.

15. 1) ¿Imaynatá Biblia rikuchin Jehová noqanchejmanta mayta llakikusqanta? 2) ¿Pikunapitaj tʼukurishanku fotopi kaj imillita, joven hermano, kuraj hermanita ima? (Gén. 39:1, 10-12; 2 Rey. 5:1-3; Luc. 2:25-38).

¹⁵ Bibliaqa rikuchin Jehová maytapuni noqanchejmanta llakikusqanta. ¿Imajtín chayta ninchej? Imajtinchus Palabranpeqa ashkha ñaupa tiempo runasmanta parlan. Paykunataj noqanchej jinallataj llakiyniyoj, kusiyniyoj karqanku, ‘noqanchej jina runaslla kasqankurayku’ (Sant. 5:17). Mana chayllachu, noqanchej jina runaswan imaynachus Jehová kasqanta Bibliapi ukhunchaspaqa, astawan sumajta entiendenchej “Jehová Diosqa manchay munakuyniyoj, khuyakuyniyojtaj kasqanta” (Sant. 5:11).

16. Juchallikoj runasmanta Bibliapi leerisqanchej, ¿imatataj Jehovamanta yachachiwanchej? (Isaías 55:7).

¹⁶ Bibliapeqa yachakunchej Jehová munakuyninta waj jinamantapis rikuchillawasqanchejtataj. Biblia niwanchej Diosqa pantajtinchej mana wijchʼurparinawanchejta. Israelitasqa kutin kutita Jehovaj contranpi juchallikoj kanku. Jinapis tukuy sonqo arrepientekojtinku Jehovaqa perdonajpuni (Isaías 55:7 leey). Ñaupa tiempomanta cristianospis yachallarqankutaj Jehová paykunata mayta munakusqanta. Chay tiempopi uj runa jatun juchata ruwasqa, arrepientekusqataj. Jehovataj apóstol Pablota yuyaycharqa hermanosninta ninanpaj chay runata perdonanankuta, sonqochanankutataj (1 Cor. 5:1-5; 2 Cor. 2:6, 7). Jehovaqa kamachisnin pantajtinku mana wijchʼurparejchu. Astawanqa munakuywan paykunata yanapaj, cheqanchaj, payman kutinpunankutataj nej. Chayta yachaytaj mayta tʼukuchiwanchej. Payqa kay tiempopipis kikillantataj ruwananta nin pipis juchallikojtin, arrepientekojtintaj (Sant. 4:8-10).

BIBLIAQA UJ SUMAJ REGALO

17. ¿Imaraykutaj Biblia uj sumaj regalo?

¹⁷ Jehovaqa uj sumaj regalota qowanchej. ¿Imajtintaj Palabran may sumaj regalopuni? Kay yachaqanapi estudianchej jina, Bibliaqa yachachiwanchej Jehová cheqan kasqanta, yachayniyoj kasqanta, maytataj munakuwasqanchejta. Chantapis Bibliaqa sutʼita rikuchiwanchej Jehovaqa rejsinanchejta munasqanta, amigosnintaj kananchejta munasqanta.

18. ¿Imaynatá rikuchinchej Bibliamanta mayta agradecekusqanchejta?

¹⁸ Amapuni qonqakunachu Diospa Palabranqa ‘allin kaj regalo’ kasqanta (Sant. 1:17). Chayrayku Jehovaman chay regalomanta mayta agradecekusqanchejta rikuchinapuni. Chaytaqa rikuchinchej orakuytawan Bibliata leespa, chaypitaj tʼukurispa. Chayta ruwajtinchej, Bibliata qhelqachej Diosqa kallpachakusqanchejta bendicenqapuni, ‘tarisuntaj Diospa yachayninta’ (Pro. 2:5).