Bibliata leesqanchejwan aswan sumajta yanapachikuna

1. ¿Imataj reparachiwanchej Diosmanta Qhelqasqa Jesuspaj may importante kasqanta?

¿IMAYNATAJ kanman karqa Jesuspa yachachisqanta uyariy? Payqa parlasqanpi Diosmanta Qhelqasqamantapuni de memoria oqharej. Chaytataj sutʼita reparanchej bautizakuytawan imastachus ñaupajta nisqanpi, niraj wañupushaspa imastachus nisqanpipis (Deu. 8:3; Sal. 31:5; Luc. 4:4; 23:46).b Jesús kay jallpʼapi kinsa wata khuskanniyojta Diosmanta yachachishaspa, Diosmanta Qhelqasqamantapuni runaspaj leepoj, imatachus chaypi nisqanta oqharej, sutʼinchajtaj (Mat. 5:17, 18, 21, 22, 27, 28; Luc. 4:16-20).

2. ¿Imataj Jesusta yanaparqa wiñasqanman jina Diosmanta Qhelqasqata sumajta rejsinanpaj? (Kay revistaj tapanpi dibujota qhawariy).

² Jesusqa niraj kay jallpʼapi Diosmanta willayta qallarishajtin, Diospa Palabranta leejña, sumajtataj uyarej wajkuna leejtinku, chaymanta parlajtinkupis. Payqa maman Mariawan Josewan familiapi parlaspa Diosmanta Qhelqasqamanta parlasqankuta uyarejchá (Deu. 6:6, 7).c Jesusqa sapa samarikuna pʼunchaypi familianwan sinagogaman rejpuni, Diosmanta Qhelqasqata leekusqantataj sumajta uyarej (Luc. 4:16). Tiemponmantaj sapallanña leeyta qallarerqa. Chayta ruwasqanrayku Jesusqa mana imatachus Diosmanta Qhelqasqapi nisqallantachu yachakorqa. Manaqa chay yachakusqanta munakuyta qallarerqa, chayman jinataj kausakuyta. Chaytaj sutʼi reparakun 12 watitasnillayojraj kashajtin imachus templopi pasasqanpi. Moisespa Leyninta sumajta rejsej yachachejkunaqa, ‘mayta tʼukorqanku yachayninmanta, kutichisqasninmantapis’ (Luc. 2:46, 47, 52).

3. ¿Imatá kay yachaqanapi qhawarisun?

³ Sichus noqanchejpis Diospa Palabranta leesunpuni chayqa rejsiyta atisun, munakusuntaj. ¿Imatá ruwasunman Bibliata leesqanchejwan astawan yanapachikunapaj? Chaypajqa qhawarisun imatachus Jesús Leyta sumajta rejsejkunaman nisqanta. Chaykuna karqanku leymanta yachachejkuna, fariseos, saduceos ima. Paykunaqa Diosmanta Qhelqasqata leejpuni kanku, jinapis mana chay leesqankuwan yanapachikojchu kanku. Jesustaj chay leesqankuwan yanapachikunankupaj kinsa imasta ruwananku kasqanta nerqa. Jesús chayta nisqanqa kay kinsa imaspaj yanapawasun: 1) leesqanchejta aswan sumajta entiendenapaj, 2) sumaj yachachiykunata tarinapaj, 3) Diospa Palabran astawan cambiachinawanchejpaj.

LEESQANCHEJTA ENTIENDENA

4. ¿Imatá Bibliata leenamanta yachakunchej Lucas 10:25-29 versiculospi?

⁴ Bibliapi leesqanchejtaqa entiendeyta munanchej. Mana entiendespaqa mana chaywan sumajta yanapachikusunchu. Qhawarina imatachus Jesús nerqa ‘Leymanta sumajta yachaj runaman’ (Lucas 10:25-29 leey). Chay runaqa yachayta munarqa imatachus ruwananta wiñay kausayta japʼinanpaj. Jesustaj Diospa Palabranpi tʼukuricherqa. Pay nerqa: “¿Imataj Leypi qhelqasqa kashan? ¿Imatá entiendenki leesqaykimanta?”, nispa. Chay runataj sumajta kuticherqa. Payqa nerqa Diosmanta Qhelqasqapeqa Diostawan runa masinchejtawan munakunata nishasqanta (Lev. 19:18; Deu. 6:5). Pero Jesusta taporqa: “¿Pitaj chanta runa masiyri?”, nispa. Chaywan sutʼita rikucherqa leesqanta mana allintachu entiendesqanta. Chayrayku mana yacharqachu imaynatachus chayta kasukunan kasqanta.

5. ¿Imaraykutaj Bibliata aswan sumajta entiendenapaj orakunanchej tiyan, nitaj apurallatachu leenanchej tiyan?

⁵ ¿Imastaj yanapawasunman Diospa Palabranta leesqanchejta aswan sumajta entiendenapaj? Kay imasta ruway: Ñaupajtaqa niraj leeyta qallarishaspa orakunanchej tiyan. Mana Jehovaj yanapayninwanqa mana Bibliata entiendeyta atisunmanchu. Chayrayku espíritu santonta mañakuna leeshaspa mana waj imaspi yuyashanapaj. Chaymantataj leeyta qallarina, pero mana apurallatachu, manachayqa leeshasqanchejta entiendenapaj jinalla. Yanapallawasunmantaj jatunmanta leey, chayri leeshaspa Bibliamanta grabasqata uyariy. Chayta ruwayqa yanapawasun chay leesqanchejta sumajsituta entiendenapaj. Ajinamanta chay leesqanchejqa umanchejpi, sonqonchejpi ima qhepakonqa (Jos. 1:8). Leeyta tukuytawantaj watejmanta Jehovamanta mañakuna Palabranmanta agradecekunapaj, leesqanchejman jina kausakunapaj yanapanawanchejpajpis.

6. ¿Imaraykutaj Bibliata leeshaspa wakin tapuykunata ruwakuna, wakin imastataj anotakuna? (Fotostawan qhawariy).

⁶ ¿Imatawán ruwasunman Bibliapi leesqanchejta aswan sumajta entiendenapaj? Imatachus leeshasqanchejmanta tapuykunata ruwakuna. Kaykunata tapurikusunman: “¿Pikunamantataj kay partepi astawan parlashan? ¿Kay leeshasqayta pitaj nishan? ¿Pimantaj parlashan, chanta imaraykutaj chayta nishan? ¿Maypitaj chanta maykʼajtaj kay pasashan?”. Chay tapuykuna yanapawasun tʼukurinapaj, imamantachus astawan parlashasqanpitaj yuyayninchej kananpaj. Chantapis wakin imasta anotakusunman. Anotakunapajqa sumajsitutarajpuni tʼukurinchej, sinoqa imatá anotakusunman. Chayrayku chayta ruwayqa leesqanchejta aswan sumajta entiendenapaj yanapawanchej, nitaj qonqakunapaj. ¿Imastá anotakusunman? Ima tapuykunastachus ruwakusqanchejta, imastachus ukhuncharisqanchejta, chay leesqanchejpi imasmantachus astawan parlashasqanta, imatachus chay leesqanchejwan ruwanata, chayri chayta leeshaspa imaynachus sientekusqanchejta. Sichus Bibliata leeshaspa chayta ruwasun chayqa, reparasun Jehovapuni parlashawasqanchejta.

7. ¿Imatataj necesitanchej Bibliata leeshaspa chanta imaraykutaj? (Mateo 24:15).

⁷ Jesús nerqa Bibliata entiendenapajqa allinta entiendeyta yachana kasqanta (Mateo 24:15 leey). Chanta, ¿ima niytá munan allinta entiendeyta yachay? Chayqa niyta munan uj yachachiy waj yachachiywan imayna ujchasqachus kashasqanta reparay, imapichus mana kikinchu kasqantapis reparay. Niyta munallantaj imatawanchus niyta munashasqanta reparay. Jesús nerqa jinataj, allinta entiendeyta yachayqa kay tiempopi wakin imas pasashasqan Bibliaj profeciasninta juntʼashasqanta reparanapaj yanapawanchej. Bibliapi tukuy ima leesqanchejwan sumajta yanapachikunapajpis, allintapuni entiendeyta yachana.

8. ¿Imatataj ruwasunman Bibliata leespa allinta reparayta yachanapaj?

⁸ Jehovaqa kamachisninta yanapan allinta entiendeyta yachanankupaj. Chayrayku orakuna, mañakunataj allinta reparayta yachanapaj yanapanawanchejta (Pro. 2:6). Jinapis mana orakunallanchejchu tiyan. Manaqa imatachus leesqanchejta calmallawan ukhuncharina. Reparanataj imatachus yachasqanchejwanña imayna ujchasqachus kashasqanta. Yanapanawanchejpajtaj ashkha publicaciones tiyapuwanchej. Ujnenqa kashan Jehovaj testigosnin yachaqanasta maskʼanankupaj nisqa publicación. Chay publicacioneswan yanapachikusun chayqa, leesqanchej ima niytachus munasqanta reparasun, sutʼitataj yachasun imaynatachus yachakusqanchejman jina ruwanata (Heb. 5:14). Bibliata leespa sumajta reparayta yachasun chayqa, sapa kuti aswan sumajta entiendesun.

SUMAJ YACHACHIYKUNATA TARINA

9. ¿Ima sumaj yachachiytataj saduceos mana repararqankuchu?

⁹ Saduceosqa sumajta rejserqanku Hebreo Qhelqasqaspa ñaupaj phishqa librosninta. Chaywanpis chay librospi aswan importante yachachiykunataqa, Diospa yuyaychasqan kashajtinpis, mana japʼikojchu kanku. Uj kuti saduceosqa kausarimuymanta parlaspa Jesusta pantachiyta munarqanku. Jesustajrí paykunata taporqa: “¿Manachu Moisespa qhelqasqan libropi leerqankichej, imatachus Dios khishkarara sachʼitamanta nimusqanta? Payqa Moisesta nerqa: ‘Noqa kani Abrahanpa Diosnin, Isaacpa Diosnin, Jacobpa Diosnintaj’, nispa” (Mar. 12:18, 26). Saduceosqa ashkha kutispichá chayta leerqanku. Jinapis Jesuspa tapusqanpi reparanchej Diospa Palabran kausarimuymanta yachachisqantaqa mana kasurasqankuta, chay yachachiy may importante kashajtinpis (Mar. 12:27; Luc. 20:38).d

10. ¿Imastataj Bibliata leeshaspa reparayta yachananchej tiyan?

¹⁰ ¿Imatá yachakunchej Jesús saduceoswan parlasqanmanta? Bibliata leespaqa sumajta reparayta yachana tiyan imastachus uj versículo, chayri uj parte yachachishawasqanchejta. Mana qallariy yachachiykunallatachu reparayta yachananchej tiyan, manaqa pakasqa yachachiykunata, yuyaychaykunata ima.

11. Kay 2 Timoteo 3:16, 17 nisqanman jina, ¿imaynatataj sumaj yachachiykunata Bibliapi tarisunman?

¹¹ ¿Imaynatá tarisunman Bibliapi sumaj yachachiykunata? Chayta yachanapajqa 2 Timoteo 3:16, 17 (leey) versiculosta ukhuncharina. Chaypi nin ‘Diosmanta tukuy Qhelqasqaqa may sumaj’ kasqanta kay tawa imaspaj: yachachinapaj, kʼaminapaj, tukuy imata cheqanchanapaj, allin kasqanman jina yachachinapajpis. Bibliamanta wakin libros mana anchata oqharikunchu chaykunapis, chay tawa imaspi yanapallawanchejtaj. Chaypajqa leesqanchejta sumajta ukhuncharina imatachus Jehovamanta, munayninmanta chayri yuyaychaykunasninmanta yachachiwasqanchejta reparanapaj. Leesqanchej kʼaminawanchejpaj jina kananpajrí, ¿imatá ruwasunman? Bibliata leeshaspaqa reparakuna ima mana allin imitasta ruwaymanchus chayri yuyaymanchus yachasqa kasqanchejta, chaykunatataj saqepuna. Reparanallataj imaschus Jehovata mana wasanchanapaj yanapawasqanchejta. Chantapis piensarina imaynatachus uj versículo pantasqa yuyayta cheqanchasqanta. Chaytaj ichapis kanman imatachus predicacionpi niwasqanchej. Allin kasqanman jina yachachinawanchejpajrí, ¿imatá ruwananchej tiyan? Imaschus Jehová jina yuyanapaj yanapawasunman chay tukuy imasta maskʼana. Chay tawa yuyaychaykunaman jinapuni ruwasun chayqa, Bibliapi sumaj yachachiykunata astawan tarisun. Chaytaj yanapawasun Bibliata leesqanchejwan astawan yanapachikunapaj.

BIBLIATA LEESQANCHEJWAN CAMBIANAPAJ YANAPACHIKUNA

12. ¿Imajtintaj Jesús fariseosta taporqa “¿manachu leerqankichej?” nispa?

¹² Jesusqa fariseosta taporqa: “¿Manachu leerqankichej?”, nispa. Chaywantaj rikucherqa Diosmanta Qhelqasqata mana allin sonqowanchu leesqankuta (Mat. 12:1-7).e Chay kutipi fariseosqa Jesuspa discipulosninta juchachaykorqanku samarikuna pʼunchaymanta leyta pʼakishasqankuta nispa. Jesustaj kuticherqa Diosmanta Qhelqasqamanta iskay ejemploswan, Oseasmanta uj versiculowan ima. Chaywantaj sutʼita rikucherqa fariseosqa imapajchus chay ley kasqanta mana entiendesqankuta, wajkunata mana khuyarikuspataj imatapis ruwasqankuta. Paykunaqa Diospa Palabranta leespapis cambianankupaj mana chaywan yanapachikojchu kanku. Imaraykuchus paykunaqa jatunchakojkuna kaj kanku, wajkunata qhawaranallankupajtaj leej kanku. Ajina kasqankurayku, leesqanku imatapunichus niyta munasqanta mana entiendeyta atejchu kanku (Mat. 23:23; Juan 5:39, 40).

13. ¿Imayna sonqowantaj Bibliata leena, chanta imaraykutaj?

¹³ Jesús imatachus nisqanqa yachachiwanchej Bibliata allin sonqowan leena kasqanta. Ama fariseos jina kanachu, astawanpis kʼumuykukoj sonqo kana, saqenataj Jehová yachachinawanchejta. Santiago 1:21 nin: ‘Llampʼu sonqowan saqeychej Diospa palabran qankunapi saphichakunanta’, nispa. Llampʼu sonqo kasun chayqa, saqesun Diospa Palabran sonqonchejpi saphichakunanta. Biblia cambiachinawanchejpajqa mana wajkunata qhawarananchejchu tiyan, nitaj jatunchakunanchejchu tiyan. Ajinallamanta Biblia khuyakuyniyoj kaymanta, kʼacha sonqoyoj kaymanta, munakuyniyoj kaymanta imatachus yachachisqanwan cambianapaj yanapachikusun.

14. ¿Imaynapí yachasunman cambianapaj Bibliawan yanapachikushasqanchejtachus manachus? (Fotostawan qhawariy).

¹⁴ Wajkunawan imaynatachus apanakusqanchejpi sutʼi reparakun, cambianapaj Bibliawan yanapachikushasqanchejtachus manachus. Fariseosqa cambianankupaj Diospa Palabranwan mana yanapachikorqankuchu. Chayrayku mana juchayoj kajkunata juchacharqanku (Mat. 12:7). Chayrayku sumajta qhawarikuna imayna ñawiwanchus wajkunata qhawasqanchejta, imaynatajchus paykunawan kasqanchejtapis. ¿Yachasqachu kanchej wajkuna allin imasta ruwasqankumanta parlayman? Chayri, ¿mana allin imasta ruwasqallankutachu qhawanchej? ¿Wakichisqachu kanchej wajkunata perdonanapajpuni? Chayri, ¿yachasqachu kanchej qhawarayman, pipis sonqonchejta nanachiwajtinchejtaj phiñasqallapuni kayman? Chay tapuykunaman kutichisqanchejpi reparasun yuyasqanchejta, sonqonchejta, ruwasqanchejtapis cambianapaj Bibliawan yanapachikushasqanchejtachus manachus (1 Tim. 4:12, 15; Heb. 4:12).

BIBLIATA LEEYQA KUSICHIWANCHEJ

15. ¿Imaynatataj Jesús qhawaj Diosmanta Qhelqasqata?

¹⁵ Jesusqa Diosmanta Qhelqasqata mayta munakoj. Salmo 40:8 versiculopi nerqaña imayna sumajpajchus qhawananta. Chaypi nin: “Diosníy, munayniykita ruwaspa maytapuni kusikuni. Leyniykeqa sonqoy ukhupipuni kashan”, nispa. Jesusqa Diospa Palabranta may jinatapuni munakusqanrayku kusisqa karqa, Jehovatataj sirvillarqapuni. Noqanchejpis Diospa Palabranta leenapaj, munakunapaj ima kallpachakusun chayqa, kusisqallataj kasun, Jehovatapis sirvillasunpuni (Sal. 1:1-3).

16. ¿Imatá ruwawaj Bibliata leesqaykiwan astawan yanapachikunaykipaj? (“Jesuspa nisqasnin yanapawanchej leesqanchejta entiendenapaj” nisqa recuadrota qhawariy).

¹⁶ Jesuspa nisqasnin, ruwasqanpis sonqonchejta aysan Bibliata aswan sumajta leeyman, estudiayman ima yachaykukunapaj. Leesqanchejta aswan sumajta entiendenapajqa Jehovamanta mañakuna, ama apurallatachu leena, tapuykunata ruwakuna, wakin imastataj anotakuna. Leesqanchejta allinta entiendeyta yachanapajqa, sumajsituta ukhuncharina publicacionesninchejwan yanapachikuspa. Bibliata aswan sumajta rejsinapajtaj sumaj yachachiykunata maskʼana, wakin imasmanta parlasqan mana ancha rejsisqachu kajtinpis. Diospa Palabran cambianapaj yanapanawanchejpajtaj, allin sonqowanpuni leena. Tukuy chayta ruwasun chayqa, Bibliata leesqanchejwan astawan yanapachikusun, astawantaj Jehovaman qayllaykusun (Sal. 119:17, 18; Sant. 4:8).