Imachus allin kaj kasqanpi tukuy piensarinanchej tiyan
¿Imatá ruwawaj mana rejsisqayki lugarman rinaykipaj?
1. ¿“Kaychá ñan kanman” nispachu mayqen ñanllatapis riwaj?
2. ¿Uj runatachu qhatiwaj “pay rejsinpunichá” nispa?
3. ¿GPS nisqapichu chayri uj mapapichu maskʼawaj? ¿Manachayrí ñanta sumajta rejsej amigoykitachu tapurikuwaj?
Ñaupaj kajta chayri iskay kajta ajllanki chayqa, ichá uj lugarman chayanki, pero mana risharqanki chay lugarmanchu chayanki. Kinsa kajta ajllanki chaytaj, maymanchus risharqanki chayman chayankipuni.
Kausayninchejqa viajay jina, tukuy munanchej kusiy kausayta tariyta. Chaypajqa uj ñanta jina sumajta ajllananchej tiyan. Allinta ajllanapajtaj uj sumaj yanapata necesitanchej.
Kausayninchejpeqa imatapis ajllanchejpuni. Chaykunamanta wakenqa juchʼuy imitaslla kanku, wakintaj jatuchaj imas kanku. Jatun imasta ajllasqanchejpi sutʼi rikukun imatachus allinpaj qhawasqanchej, imatachus mana allinpaj qhawasqanchejpis. Chay imaspi imatachus ajllasqanchejtaj, kausayninchejta cambianman chayri familianchejpa kausayninta cambianman. Chaytaj kanman allinpaj chayri mana allinpaj. Chay jatuchaj imastaj kaykuna kankuman:
Qhariwarmi jina puñuykuymanta, casarakuymanta ima
Tukuy imapi allin kajta ruwaymanta, trabajomanta, qolqemanta ima
Wawasta uywaymanta
Wajkunawan allinta apanakuymanta
¿Imaynatá yachawaj imatachus ajllasqayki qanta, familiaykitapis kusisqa kanaykichejpaj yanapasunaykichejtachus manachus?
Tukuypis kayta tapurikunanchej tiyan: “¿Imataj yanapawanman allinta ajllanaypaj?”, nispa.
Kay revistapi yachakunki allin kajta ruwanapajqa Biblia sumajta yanapakusqanta, Bibliawan yanapachikunaykipaj imatachus ruwanaykitapis.