Allin kajta ruwanankupaj, ¿imawantaj wakin yanapachikunku?

Casi tukuy runas yachanku imata ruwaychus allin kasqanta, imata ruwaytajchus mana allinchu kasqanta. Chayrayku mana allinpajchu qhawanku violacionesta, runata wañuchiyta, wawasta abusayta ima. Kay imastataj allinpaj qhawanku, kʼacha kayta, wajkunapaj sonqoyoj kayta, justicia ruwakusqantapis. Chaywanpis, ¿imatá yuyanku kay imasmanta: piwanchus qhariwarmi jina puñuykunamanta, cabaltachus manachus parlanamanta, imaynatachus wawasta uywanamantapis? Ashkha runasqa yuyanku chay imaspi mana tukuypunichu kikinta ruwananku kasqanta, tukuypa ajllasqantaj allillan kasqanta. Chayrayku ashkha runasqa imatachus yuyasqankuman jinalla chayri imatachus wajkuna yuyasqankuman jinalla imatapis ruwanku. Chaywanpis, ¿allillanchu kanman ajinata ruway?

IMACHUS ALLIN KASQANTA YUYASQANCHEJ

Imata ajllanapajpis sonqonchejpi yuyasqanchejman jina ruwayta yachanchej, imachus allin, imatajchus mana allin kasqanta yuyasqanchejman jina (Romanos 2:14, 15). Wawaspis reparanku imachus mana allinchu kasqanta, chayrayku imatapis mana allintachu ruwaspa mal sientekunku. Wiñasqanchejman jina, sonqonchejman yachachinchej imachus allin, imatajchus mana allinchu kasqanta. Chaytataj ruwanchej familianchejmanta, compañerosninchejmanta, profesoresninchejmanta, vecinosninchejmanta, religionninchejmanta, culturanchejmanta ima yachakusqanchejman jina. Imatapis ajllajtinchejtaj, sonqonchej niwanchej allinchus manachus kasqanta.

Sonqonchej aysawasunman wajkunata khuyakunanchejpaj, agradecekuyta yachananchejpaj, cheqan kajta ruwananchejpaj, wajkunapaj sonqoyoj kananchejpajpis. Chantapis kallpachakunchej pikunatachus munakunchej chaykunaj sonqonkuta mana nanachinapaj, mana pʼenqay imasta ruwanapaj, nitaj sonqonchej juchachanawanchejpaj jina imatapis ruwanapaj.

¿Allinchu kanman yuyasqanchejman jinalla imatapis ruway? Garrickqa jovenllaraj kashajtin munasqanman jinalla imatapis ruwaj. Jinapis tiempowan repararqa munasqanman jinalla kausasqanqa mana allinchu kasqanta. Chayrayku payqa nerqa mana kusisqachu kausakusqanta, millay kausayniyoj kasqanta, drogakusqanta, machasqanta, maqanakusqanta ima.

IMACHUS ALLIN KASQANTA WAJKUNA YUYASQANKU

Mana sonqonchejpi yuyasqanchejman jinallachu imatapis ruwanchej, manachayqa imatachus wajkuna yuyanankupipis piensarillanchejtaj. Chaytaj yanapawanchej wajkunamanta yachakunapaj. Imatachus familianchej, amigosninchej, vecinosninchej yuyasqankuman jina ruwajtinchejqa, paykuna jatunpaj qhawawanchej.

¿Allinchu kanman wajkuna yuyasqankuman jinalla imatapis ruway? Priscilaqa sipasllaraj kashaspa, amigosnin jinapuni imatapis ruwaj. Chay amigosnenqa niraj casarakushaspa qhariwarmi jina puñuykuyta allillanpaj qhawaj kanku. Jinapis repararqa amigosnin yuyasqankuman jinalla ruwaspaqa mana kusisqachu kasqanta. Pay nin: “Wajkuna jinalla ruwaspaqa mana kusisqachu kasharqani. Mana ruwanasta ruwarqani, kausayniytataj wañuy pataman churarqani”, nispa.

¿ASWAN SUMAJ YANAPA KANCHU?

Imachus allin kasqanta yuyasqanchejman jina, chayri wajkuna yuyasqankuman jina ruwayqa yanapawanchej. Jinapis chayman jinalla ruwasun chayqa, mana allinpunichu riwasun. Wakin kutisqa mana reparayta atillanchejchu imatachus ajllasqanchej noqanchejpaj chayri wajkunapaj mana allinchu kasqanta (Proverbios 14:12). Wakin kutisqa yuyasqanchejman jina chayri wajkuna yuyasqankuman jina, imapis allillan kanman. Jinapis chayqa mana allinpunichu kanman, tiempowantaj cambianman. Chayrayku imatachus ñaupajpi mana allinpajchu qhawaj kanku chaytaqa, kunan allinpajña qhawanku. Imatachus ñaupajpi allinpaj qhawaj kanku chaytataj, kunanqa manaña allinpajchu qhawanku.

¿Kanchu uj sumaj yanapa imachus allin, imatajchus mana allinchu kasqanta sutʼita yachanapaj? ¿Imata yachaytaj sumajta yanapawasunman imatapis allinta ajllanapaj, manataj chaymanta pesachikunapaj?

Arí, uj sumaj yanapa tiyan. Chaytaj tukuyta yanapawasunman maypi tiyakojtinchejpis. Qhepan yachaqanapi yachakusunchej imachus chay yanapa kasqanta. Chaytaj allin kajtapuni ajllanapaj yanapawasun.