¿Imajtintaj yuyaychaykunata necesitanchej?

1. ¿Imatá ruwasunman allinta ajllanapaj, chay ajllasqanchejtaj allin llojsinanpaj? (Proverbios 13:10; 15:22).

TUKUYPIS munanchej kausayninchejpi allintapuni ajllayta, chay ajllasqanchejtaj allin llojsinanta. Diospa Palabrantaj niwanchej chaypajqa wajkunawan yuyaycharichikunanchej kasqanta (Proverbios 13:10; 15:22 leey).

2. ¿Imata ruwanantataj Jehová niwanchej?

² Tatanchej Jehovalla may sumaj yuyaychaykunata qowanchej, chayrayku paymanta yachayta mañakunanchej tiyan. Pay niwanchej: “Noqa yuyaychasqayki, qhawamusqaykitaj”, nispa (Sal. 32:8). Chayqa niyta munan necesitasqanchej yuyaychaytapuni qonawanchejta, chayman jina ruwanapajtaj yanapanawanchejta.

3. ¿Ima tawa tapuykunamantaj kay yachaqanapi kutichisun?

³ Kay yachaqanapeqa Diospa Palabranwan kay tawa tapuykunaman kutichisunchej: 1) ¿Imaynataj kananchej tiyan sumaj yuyaychaykunawan yanapachikunapaj? 2) ¿Pikunataj sumajta yuyaychariyta atiwasunman? 3) ¿Imayna sonqowantaj yuyaychayta maskʼananchej tiyan? 4) ¿Imajtintaj mana suyananchejchu tiyan wajkuna noqanchejpaj ajllapunawanchejta?

KʼUMUYKUKOJ SONQO, LLAMPʼU SONQOTAJ KANA

4. ¿Imayna runastaj kananchej tiyan sumaj yuyaychaykunawan yanapachikunapaj?

⁴ Sumaj yuyaychaykunawan yanapachikunapajqa, kʼumuykukoj sonqos, llampʼu sonqostaj kananchej tiyan. Reparakunanchej tiyan wajkuna yuyaycharinawanchejta necesitasqanchejta. Chayrayku tapurikuna aswan experienciayoj kajkunata, noqanchejmantataj astawan yachajkunata, ajinamanta allintapuni ajllananchejpaj. Mana kʼumuykukoj sonqochu, nitaj llampʼu sonqochu kasun chayqa, mana Jehová yanapayta atiwasunchu. Diospa Palabranta leespataj yuyasunman, yuyaychaykunasnenqa mana noqanchejpajchu kasqanta (Miq. 6:8; 1 Ped. 5:5). Kʼumuykukoj sonqos kasun chaytaj, Bibliaj yuyaychaykunasninta tukuy sonqo japʼikusun.

5. ¿Imaraykutaj David jatunchakuyta atinman karqa?

⁵ Rey Davidmanta parlarina. Payqa tʼukuna imastaña ruwaspapis kʼumuykukoj sonqollapuni karqa. Ashkha watas ñaupajta niraj rey kashajtin, sumaj rejsisqa musicoña karqa, rey Saulpajpis tocapoj (1 Sam. 16:18, 19). Saulpa cuentanmanta rey kananpaj ajllashajtintaj, Jehovaqa espíritu santonta Davidman qorqa (1 Sam. 16:11-13). Chantapis Davidtaqa runas mayta alabarerqanku ashkha enemigosninkuta atipasqanmanta, filisteo Goliattapis atipasqanmanta (1 Sam. 17:37, 50; 18:7). Sichus David jatunchakunman karqa chayqa, kayta yuyanman karqa: “Chay chhika imastaña ruwani, mana ni pejpa yuyaychayninta necesitanichu”, nispa. Jinapis Davidqa mana ajinatachu yuyarqa.

6. ¿Imaynapí yachanchej David yuyaychaykunata tukuy sonqo japʼikusqanta? (Dibujotawan qhawariy).

⁶ Davidqa reyña kaspa yuyaycharinankupaj jina de confianza amigosta maskʼakorqa (1 Cró. 27:32-34). Payqa niraj rey kashaspañapuni yuyaychaykunata tukuy sonqo japʼikoj, nitaj qharispa yuyaychasqallankutachu japʼikoj. Abigaíl yuyaycharejtinpis tukuy sonqo japʼikullarqataj. Chay yuyaychasqanta kʼumuykukoj sonqowan uyarisqanraykutaj, mana phiñakuyninwan atipachikuspa juchallikorqachu. Abigailpa qosan Nabaltaj machu machu runa karqa, payllapaj imatapis munaj, nitaj agradecekuyta yachajchu (1 Sam. 25:2, 3, 21-25, 32-34).

7. ¿Imatá Davidmanta yachakunchej? (Eclesiastés 4:13; fotostawan qhawariy).

⁷ ¿Imatá Davidmanta yachakusunman? Wakin imasta sumajta ruwayta yachaspañapis chayri wakin imasta ruwanapaj atiyniyoj kaspapis, mana yuyananchejchu tiyan tukuy imataña yachasqanchejta, nitaj ni pejpa yuyaychayninta necesitasqanchejtapis. Chantá yachakullanchejtaj pillapis yuyaychariwajtinchej sumajta uyarina kasqanta (Eclesiastés 4:13 leey). Ajinamanta mana pantasunchu. Pantasunman chayqa noqallanchejpajtaj mana allinchu kanman, wajkunapajpis.

¿PIKUNATAJ SUMAJTA YUYAYCHARIWASUNMAN?

8. ¿Imajtintaj Jonatán Davidta sumajta yuyaychariyta aterqa?

⁸ Davidmanta waj imasta yachakullasunmantaj. Payqa pikunawanchus yuyaycharichikunanta yachananpaj kay iskay imasta qhawarej: 1) Jehovaj sumaj amigonchus manachus kasqanta, 2) imapichus rikukushasqanta sumajtachus manachus yachasqanta. Uj kuti Davidqa yachayta munarqa rey Saúl paywan allinyakuyta munanantachus manachus. Chayta yachananpajtaj Saulpa wawan Jonatanta tapurikorqa. ¿Imajtín Jonatán sumajta yuyaychariyta atinman karqa? Imajtinchus payqa Jehovata mayta munakoj, tatan Saultapis sumajta rejserqa (1 Sam. 20:9-13). ¿Imaynatataj David jina ruwasunman?

9. ¿Pikunataj sumajta yuyaychariyta atiwasunman? Sutʼinchariy (Proverbios 13:20).

⁹ Noqanchejpis piwanchus yuyaycharichikunata yachanapajqa, kay iskay imasta qhawarinanchej tiyan: 1) Jehovata munakunchus manachus chayta, 2) imapichus rikukushasqanchejta sumajtachus manachus yachasqanta (Proverbios 13:20 leey).a Casarakuyta munaj jovenpi piensarina. ¿Piwantaj aswan sumajta yuyaycharichikunman? Soltero masillanwantaj yuyaycharichikunman chayqa, chay yuyaychasqanqa sumaj kanman Bibliaman jina yuyaycharejtin. Jinapis astawan sumajta yuyaycharinkuman payta sumajta rejsej, Jehovatataj unaysitutaña sirvej qhariwarmis. Chay jina qhariwarmisqa soltero hermanoman willariyta atenqanku kausayninkumanta, imaynatachus Bibliaj nisqanman jina ruwayta atinantapis.

10. ¿Imastataj qhepan parrafospi yachakusunchej?

¹⁰ Kaykama yachakunchej kʼumuykukoj sonqos, llampʼu sonqostaj kananchej kasqanta, pikunatajchus sumajta yuyaychariyta atiwasqanchejtapis. Kunanqa yachakusun imayna sonqowanchus yuyaychayta maskʼananchej kasqanta, nitaj wajkuna ajllapunawanchejtachu suyananchej kasqanta.

¿IMAYNA SONQOWANTAJ YUYAYCHAYTA MASKʼANANCHEJ TIYAN?

11, 12. 1) ¿Imatataj mana ruwananchejchu tiyan? 2) ¿Imatataj Rehoboam ruwarqa?

¹¹ Wakin kutisqa ichá pillapis imatachus ruwananta ajllaspaña piwanpis yuyaycharichikuyta munanman. Chaytataj ruwanman mana yuyaycharichikuyta munaspapunichu, manaqa imatachus ajllasqan allin kasqanta ninankuta munaspalla. Chayta ruwajqa mana allin sonqowanchu yuyaychayta maskʼashan. Rey Rehoboampis ajinata ruwarqa. Qhawarina imatachus paymanta yachakuyta atisqanchejta.

¹² Rehoboamqa tatan Salomón wañupojtin Israelmanta reyman tukorqa. Chaypachas Israel nacionqa tukuy imayoj karqa. Jinapis israelitasqa quejakorqanku Salomón ancha sinchʼita trabajachisqanmanta. Chayrayku Rehoboammanta mañakorqanku trabajonkuta chhallayachinanta. Rey Rehoboamtaj tumpata piensarinanta nerqa. Qallariypeqa allinta ruwarqa tatan Salomonta yanapaj kanku chay kurajkunata tapukuspa (1 Rey. 12:2-7). Jinapis chay yuyaychasqankuta mana kasorqachu. Payqa ichapis sonqonpi nerqaña imatachus ruwananta, chay ajllasqan allin kasqanta ninallankutataj suyasharqa. Ajinapuni karqa chayqa, ichapis chayrayku aswan joven amigosnintañataj tapukorqa. Chay amigosnintaj uyariyta munasharqa chaytapuni nerqanku (1 Rey. 12:8-14). Rey Rehoboam paykunata kasusqanraykutaj, nacionmanta wakenqa contranpi oqharikorqanku. Chaymantapachataj pay kamachishajtin chʼajwasllapuni karqa (1 Rey. 12:16-19).

13. ¿Imaynapí yachasunman yuyaychaytapunichus manachus maskʼashasqanchejta?

¹³ ¿Imatá Rehoboammanta yachakusunman? Ima yuyaychaytapis allin sonqowan maskʼananchej kasqanta, manataj imatachus ruwananchejta ajllaspañachu. Kaypi piensarina: “Pitapis yuyaycharinawanta nejtiy, manataj munasqayman jinachu yuyaychariwajtin, ¿chay yuyaychawasqanta japʼikullanichu?”.

14. ¿Imatataj mana qonqakunachu tiyan? Sutʼinchariy (dibujotawan qhawariy).

¹⁴ Uj hermanopi piensarina. Paymanqa sumaj pagasqa trabajota qoyta munanku. Jinapis chay trabajota japʼikuspaqa unayta familianmanta karupi kanan kanqa. Chayrayku niraj chay trabajota japʼikushaspa uj ancianota tapurikun. Chay ancianotaj Bibliawan yuyarichin familianmanqa paypuni Diosmanta yachachinan kasqanta (Efe. 6:4; 1 Tim. 5:8). Jinapis chay hermanoqa mana ancianoj yuyaychasqanta uyarinchu. Chayrayku waj hermanostañataj tapukun chay trabajoman yaykunan allillan kasqanta ninankukama. ¿Nisunmanchu chay hermano yuyaycharinankutapuni maskʼashasqanta? Chayri, ¿imatachus ajllasqan allin kasqanta ninallankutachu maskʼashanman? Amapuni qonqakunachu sonqonchejqa chʼauka kasqanta (Jer. 17:9). Wakin kuteqa imatachus mana uyariyta munasqanchejpuni aswan sumaj yuyaychay kanman.

AMA SUYANACHU WAJKUNA AJLLAPUNAWANCHEJTA

15. ¿Imatataj mana ruwananchejchu tiyan, chanta imaraykutaj?

¹⁵ Jehovaqa munan sapa uj cristiano imatachus ruwanata ajllakunanchejta (Gál. 6:4, 5). Niraj ajllashaspataj allin kanman Bibliaj yuyaychaykunasninta maskʼananchej, wiñay tukusqa hermanoswantaj yuyaycharichikunanchej. Jinapis mana paykunata ninanchejchu tiyan cuentanchejmanta ajllapunawanchejta. Chayrayku mana allinchu kanman de confianza amigonchejta “ajinapi rikukuspa, ¿qan imatá ruwawaj?” nispa tapunanchej. Nillataj allinchu kanman wajkunata rikuspalla kikillantataj ruwananchej. Imata ruwanapajpis noqanchejpuni sumajta piensarikunanchej tiyan.

16. ¿Ima problemataj karqa santosman jaywasqa aycharayku, chanta pitaj ajllanan karqa chay aychata mikhuytachus manachus? (1 Corintios 8:7; 10:25, 26).

¹⁶ Corinto congregacionmanta parlarina. Chay tiempopeqa mercadopi vendesqanku aychamanta wakin ichapis santosman jaywasqa aycha karqa. Chay congregacionmanta cristianostaj ajllananku karqa chay aychata mikhuytachus manachus. Pablotaj paykunaman nerqa: “Yachanchej uj santoqa mana imapischu kasqanta. Yachallanchejtaj uj kʼata Dioslla kasqanta”, nispa (1 Cor. 8:4). Pablo chayta nisqanrayku wakin cristianosqa, mercadomanta rantisqanku aychata mikhullajña kanku, santosman jaywasqa aycha kajtinpis. Wakin cristianostajrí chay aychata mana mikhorqankuchu sonqonku juchachasqanrayku (1 Corintios 8:7; 10:25, 26 leey). Jinapis chayqa sapa ujninkumanta karqa. Pabloqa ni jaykʼaj corintiosman nerqachu wajkunapaj ajllapunankuta chayri wajkuna ruwasqankuraykulla kikinta ruwanankuta. Paykunaqa ‘sapa ujninku ruwasqasninkumanta Diosman cuentata qonanku karqa’ (Rom. 14:10-12).

17. ¿Imataj kanman wajkunaj ruwasqallankuta qhatejtinchej? Sutʼinchariy (Fotostawan qhawariy).

¹⁷ Noqanchejpis ñaupa tiempomanta cristianos jinallataj rikukusunman. Yawarmanta orqhosqa juchʼuy imitaspi piensarina. Chaykunata necesitajtinchej, sapa ujninchej Bibliamanta yachakusqanchejman jina ajllananchej tiyan.b Wakin kutisqa yawarmanta orqhosqa juchʼuy imitasmanta parlakojtin, mana allinta entiendeyta atillasunmanchu. Jinapis sapa cristianopuni ajllananchej tiyan imatachus ruwananchejta (Rom. 14:4). Wajkunallata qhatisun chayqa mana yachayniyoj kayta atisunchu. Yachayniyoj kanapajqa noqanchejpuni Bibliaman jina ajllakunanchej tiyan. Chayrayku imatapis kausayninchejpi ajllananchej kajtin, ñaupajtaqa noqanchejraj ukhuncharinanchej tiyan, reparananchejtaj tiyan Bibliamanta ima yuyaychaykunachus yanapanawanchejta (Heb. 5:14). Manapuni entiendeyta atispataj sumajta yachaj hermanota tapurikusunman.

YUYAYCHAYTA MASKʼANALLAPUNI

18. ¿Ima yanapastataj Jehová qowanchej?

¹⁸ Jehovaqa yachan allinta ajllakuyta atisqanchejta. Chayrayku saqewanchej sapa uj ajllakunanchejta. Yanapanawanchejpajtaj Palabranta qowanchej, wiñay tukusqa hermanostawan. Paykunaqa Bibliaj yuyaychaykunasninman jina ruwanapaj yanapariwasunman. Chay yanapastataj Tatanchej kasqanrayku qowanchej (Pro. 3:21-23). ¿Imaynatá noqanchej chaymanta agradecekusunman?

19. ¿Imaynatá Jehovata kusichisunman?

¹⁹ Tatasqa kusikunku wawasninku wiñay tukusqa cristianosman tukojtinku, sumaj yachayniyoj kajtinku, wajkunatapis yanaparejtinku. Ajinallatataj Tatanchej Jehovapis kusikun aswan sumaj cristianosman tukojtinchej, yuyaychaykunata maskʼajtinchej, payta jatunchanapaj jinapunitaj imatapis ajllajtinchej.