“Allin sonqoyoj kajkunata” usqhayllata yanapana

1. ¿Predicajtinchej tukuychu uyariwanchej? (Hechos 13:47, 48; 16:14, 15).

ÑAUPA tiempopi ashkha runas cheqa kajta japʼikorqanku predicasqankutawankama (Hechos 13:47, 48; 16:14, 15 leey). Kay tiempopipis wakin runasqa sumaj willaykunata willarejtinchejkama kusiywan japʼikunku. Wakintaj qallariypi mana uyariyta munallawanchejchu, jinapis aswan qhepaman uyariyta munallawasunmanña, Diosmantapis yachakuyta munankuman. Predicashaspa allin sonqoyoj kajkunata tarejtinchej, ¿imatá ruwasunman?

2. ¿Imaraykutaj predicay huertata cuiday jina kanman?

² Predicayqa uj huertata cuiday jina kanman. Huertata churajqa waj plantasta plantashaspa, ichapis rikonqa wakin plantas cosechana puntoña kashasqanta, chayrayku chay rato cosecharpanqa. Kikillantataj noqanchejpis willayninchejta japʼikuyta munajta tarispaqa, chay ratopacha kallpachakunchej yanaparinapaj. Manaraj uyariyta munajkunata tarispataj, kallpachakunchej siga paykunata yanaparinallapajpuni, Bibliamanta yachakuy imaraykuchus paykunapaj allin kasqanta reparanankupaj (Juan 4:35, 36). Allinta reparayta yachasun chayqa, chay rato cuentata qokusun imaynachus chay runa kasqanta, yachasuntaj imaynatachus sapa ujta yanaparinata. Kay yachaqanapi yachakusun imatachus ruwananchej kasqanta, ñaupaj kutipi parlarejtinchejkama willayninchejta japʼikuyta munajtin. Chanta yachakullasuntaj siga ñauparinanpaj imaynatachus yanaparinata.

YACHAKUYTA MUNAJTINKU

3. Predicashaspa yachakuyta munajta tarejtinchej, ¿imatá ruwasunman? (1 Corintios 9:26).

³ Predicashaspa yachakuyta munajta tarispaqa, chay ratopacha yanaparina Jehovamanta yachakunanpaj, paymantaj qayllaykunanpaj. Paywan primera vez parlarishaspaña tapurisunman Bibliamanta yachakuyta munasqantachus manachus, reunionesninchejmanpis invitarisunman (1 Corintios 9:26 leey).

4. ¿Ima experienciataj rikuchiwanchej wakin runas qallariymantapacha Bibliamanta yachakuyta munasqankuta?

⁴ Bibliamanta yachachiyta munasqaykita niy. Wakin runasqa qallariymantapacha Bibliamanta yachakuyta munanku. Ajina karqa Canadamanta uj sipaswan. Uj juevesnin payqa carritowan predicashajtinku chayman chimpaykorqa, Wiñaypaj kusisqa kausakuy folletotataj oqharikorqa. Chaypi kaj hermanataj nerqa chay folletowan gratislla Bibliamanta yachachisqanchejta. Chay sipastaj yachakuyta munasqanta nerqa, numerontataj jaywarqa. Chantapis chay diapacha uj mensajeta apacherqa, imaynatachus Bibliamanta yachachisqanchejta yachayta munaspa. Hermanataj chay semana tukukuyta estudiayta qallarinankuta nerqa. Chay sipastaj nerqa: “¿Nichu qʼayapacha kanman? Qʼaya tiempoy tiyan”, nispa. Ajinamanta qʼayantinpacha Bibliamanta yachakuyta qallarerqanku. Chay semana tukukuytataj primera vez reunionman rerqa, chaymantataj usqhayllata ñauparerqa.

5. ¿Imatataj yuyarikunanchej tiyan pimanpis Bibliamanta yachachiyta munanchej chay? (Fotostawan qhawariy).

⁵ Jinapis mana tukuychu chay sipas jina sumajta uyariwasun. Ashkhasqa ichapis tiempowanraj yachakuyta munankuman, yachakuyta munanankupajtaj ichapis waj imasmanta parlarinanchejtaraj necesitanqanku. Jinapis sichus mana saykʼusunchu, paytataj yanaparillasunpuni chayqa, ichapis niraj imapi Bibliamanta yachakuyta munallanqa. ¿Imaynatá nisunman Bibliamanta yachachiyta munasqanchejta? Chayta tapurerqanku Bibliamanta sumajta yachachej hermanosta, hermanasta ima. Qhawarina imatachus kutichisqankuta.

6. ¿Imatá ruwasunman runas Bibliamanta yachakuyta munanallankupajpuni?

⁶ Chay publicadores, chay precursorespis nerqanku wakin lugarespeqa ichapis mana allinchu kasqanta “Bibliamanta yachachiyku”, “Bibliata estudiachiyku” nispa ninanchej. Paykuna nillarqankutaj aswan sumaj kasqanta “Bibliamanta parlariyku”, “Bibliata rejsinankupaj yanapariyku” nispa ninanchej. Watejmanta kutiyta munasqanchejta ninapajtaj, kayta ninanchejta yuyaychariwanchej: “Bibliaqa ni pi sutʼinchayta atiwasqanchejta kutichiwanchej” chayri “Bibliaqa mana religionllamantachu parlan, astawanpis sumajta yuyaychariwanchej yanapanawanchejpaj jinapuni”, nispa. Chantapis ichá nillasunmantaj: “10 minutitosllapi, 15 minutitosllapi ashkha imasta yachakunki, chaytaj mayta yanapasunkiman”, nispa. Chantapis mana ninanchejchu kanman sapa semanitapuni yachachej rinanchejta. Chaytachus nisunman chayqa, ichapis yuyanqa paypaj ancha kasqanta chayri obligasqa jina sientekunman.

7. ¿Maykʼajtaj wakin runas reparanku cheqa kajta tarisqankuta? (1 Corintios 14:23-25).

⁷ Reunionesman invitarina. Apóstol Pabloj tiemponpi wakin runasqa primera vez tantakuyman rispañasina repararqanku cheqa kajta tarisqankuta (1 Corintios 14:23-25 leey). Kay tiempopipis kikillantaj kanman. Ashkha runasqa reunionesman risparaj aswan usqhayta ñauparinku. Chanta, ¿maykʼajtaj reunionesman invitarisunman? Wiñaypaj kusisqa kausakuy libropi 10 leccionpi uj invitación tiyan. Jinapis mana chaykama chayanatarajpunichu suyananchej tiyan. Primera vez parlarishaspaña invitarisunman chay semana tukukuypi tantakuyman, ichapis willarisunman imamantachus discursopi parlakunanta chayri Torremanta Qhawaj revistapi imitasmantachus sutʼinchakunanta.

8. Pillatapis reunionesninchejman invitarinchej chay, ¿imastataj willarisunman? (Isaías 54:13).

⁸ Uj runata tantakuyninchejman invitarispa sutʼincharina imapichus reunionesninchej mana kikinchu kasqanta, rejsisqan religionespi imatachus ruwasqankuwan. Uj estudio primera vez tantakuyman risqa, chaypitaj rikusqa Torremanta Qhawaj revistata estudiakusqanta, chayta rikuspataj Bibliamanta yachachej hermanota tapurisqa: “Tapuykunata ruwamoj, ¿tukuypa sutisninkutachu yachan?”, nispa. Hermanataj willarisqa congregacionqa uj familia jina kasqanta, chayraykutaj tukuypaj sutisninkuta yachanapaj kallpachakusqanchejta. Bibliamanta yachakojtaj nisqa iglesianpeqa casi ni pejpa sutinta yachasqankuta. Ashkhasqa ichapis mana yachankuchu imapajchus tantakusqanchejta, chayrayku sumajta sutʼincharisunman (Isaías 54:13 leey). Noqanchejqa tantakunchej Jehovata yupaychanapaj, paymanta yachakunapaj, purajmantataj kallpachanakunapaj (Heb. 2:12; 10:24, 25). Chayrayku tantakuykunasninchejqa mana puñurpanapaj jinachu, sumaj wakichisqa, nitaj ima costumbretapis ruwanchejchu (1 Cor. 14:40). Tantakuna Wasisninchej yachakunanchejpaj kasqanrayku, kallpachakunchej sumaj luzniyoj kananpaj. Chantapis politicaman mana chhapukusqanchejrayku, tantakuykunasninchejpi mana politicamantachu parlanchej, nitaj ni mayqen partidotapis apoyanchejchu. Tantakuykunasninchejpi mana imamantapis chʼajwanchejchu, nitaj qhaparinchejchu. Imaynachus tantakuykunasninchej kasqanta estudionchej yachananpajqa ichapis ¿Imaynataj tantakuykunasniyku? nisqa videota rikurichisunman.

9, 10. Pillatapis tantakuyman invitarinchej chay, ¿imastataj willarisunman mana manchachikunanpaj? (Fototawan qhawariy).

⁹ Wakenqa tantakuykunasninchejman mana riyta munallankuchu, testigosmanpuni tukunankuta ninanchejta manchikusqankurayku. Chayrayku tantakuykunasninchejman invitarispaqa, willarina tukuy runas jamuyta atisqankuta, jamuspataj mana participanankupunichu kasqanta. Chantapis willarinallataj mana pipis religionninta cambiananpaj tanqananta. Wawaspajtaj mana wajtachu tantakuykunata ruwakun. Chayrayku familiasqa tantakuykunaspi khuska wawasninkuwan chukuspa yachakuyta atinku. Ajinamanta tatas yachanku maypichus wawasninku kashasqankuta, imatachus yachakushasqankutapis (Deu. 31:12). Tantakuykunaspeqa manallataj qolqeta mañanchejchu. Imajtinchus Jesús nisqanman jina ruwanchej. Pay nerqa: “Mana pagaspalla japʼerqankichej, qoshaspaqa amallataj pagachikuychejchu”, nispa (Mat. 10:8). Chantapis willarillasunmantaj tantakuykunaman rinanpajqa mana valesqa ropatapunichu churakunan kasqanta. Imajtinchus Diosninchejqa mana rijchʼayninchejtachu qhawan, manaqa imachus sonqonchejpi kasqanta (1 Sam. 16:7).

¹⁰ Invitarerqanchej chay runa tantakuyman jamun chayqa, tukuy atisqanchejta yanaparina mana manchachikuspa uyarikunanpaj. Ichapis ancianosta, waj hermanostawan rejsichisunman. Tantakuypi mana manchachikuspa wasinpi jina sientekonqa chayqa, qhepanpi kutimuyta munallanqa. Chantapis mana Biblian kajtenqa ukhunchakushan chay versiculosta Biblianchejpi rikurichina, willarinataj imastachus estudiashasqanchejta.

BIBLIAMANTA YACHACHIYTA QALLAREJTINCHEJ

11. ¿Imaynatá Bibliamanta yachakuyta munajkunaj tiemponkuta respetasqanchejta rikuchisunman?

¹¹ Pillamanpis Bibliamanta yachachiyta qallarinchej chay, ¿imastataj sumajta qhawarikunanchej tiyan? Tiemponta respetana. Ima horapajchus rinanchejta nerqanchej chay horapaj rina, chay lugarmanta runas mana horanpichu purikuyta yachajtinkupis. Chantapis qallariypeqa allin kanman pisi tiempollata estudiananchej. Sumajta yachachej hermanosqa ninku yachakuyta munallajtinpunipis pisi tiempollata yachachinata. Chantapis ama anchata parlanachu. Saqena yachakoj astawan parlarikunanta (Pro. 10:19).

12. ¿Imatataj estudioswan qallariymantapacha ruwayta munanchej?

¹² Pillamanpis Bibliamanta yachachishaspa, qallariymantapacha yanapana Jehovata, Jesustawan rejsinanpaj, munakunanpajtaj. Chaytataj ruwasunman Bibliawanpuni yachachispa, manataj yachasqanchejman jinallachu (Hech. 10:25, 26). Apóstol Pabloqa Jesucristomantapuni astawan yachacherqa, pitachus Jehová kay jallpʼaman kachamorqa payta rejsinanchejpaj, munakunanchejpaj ima (1 Cor. 2:1, 2). Chantapis Pabloqa mosoj discipulosta yanaparqa qori jina, qolqe jina, waj may valorniyoj rumis jina kʼacha kaykunasniyoj kanankupaj (1 Cor. 3:11-15). Chay kʼacha kaykunamanta wakintaj kashan creeyniyoj kay, yachayniyoj kay, tanteayta yachay, Jehovata manchachikuy ima (Sal. 19:9, 10; Pro. 3:13-15; 1 Ped. 1:7). Apóstol Pablo jina estudiosta yanapanallapuni sinchʼi creeyniyoj kanankupaj, kʼacha Tatanku Jehovawantaj sumaj ujchasqa kanankupaj (2 Cor. 1:24).

13. ¿Imaynatá runasta yachachishaspa Jesús jina pacienciakusunman, entiendesunmantaj? (2 Corintios 10:4, 5; fototawan qhawariy).

¹³ Jesús jina runasta yachachishaspa pacienciakuna, entiendenataj. Ama pʼenqachinapaj jina imatapis tapunachu. Sichus reparanchej wakin imitasta mana entiendeshasqanta chayqa, estudianallapuni. Aswan qhepamantaj watejmanta parlariyta atillasunman. Sichus uj yachachiyta mana japʼikuyta atishallanchu chayqa, ama matʼinachu, astawanpis tiempo pasananta saqena cheqa kaj sonqonman chayananpaj (Juan 16:12; Col. 2:6, 7). Bibliaqa nin llulla yachachiykuna sumaj perqasman rijchʼakusqanta, thuñinataj kasqanta (2 Corintios 10:4, 5 leey; Biblia de estudio nisqapi sutʼinchayninta leeriy, “derrumbar cosas fuertemente atrincheradas”). Chay sumaj saphichasqa creenciasninta qonqananpajqa, ñaupajta yanapananchej tiyan Jehovapi atienekunanpaj (Sal. 91:9).

TANTAKUYMAN JAMOJTINKU

14. ¿Imaynatá tantakuyman jamojkunata qhawananchej tiyan?

¹⁴ Jehovaqa munan tukuy tantakuyman jamojkunata uj rejllata qhawananchejta, kʼachastaj paykunawan kananchejta, imayna culturayoj kajtinkupis, qhapaj kajtinkupis, wajcha kajtinkupis, maymanta kajtinkupis (Sant. 2:1-4, 9). ¿Imaynatá chayta ruwasunman?

15, 16. ¿Imatá ruwasunman mosojkuna tantakuykunasninchejpi allin sientekunankupaj?

¹⁵ Wakin runasqa tantakuykunaman jamunku qhawaykacharej jinalla, wakintaj waj ladopi tiyakoj testigo chayri Bibliamanta yachakoj invitarisqanrayku. Chayrayku ñaupaj kutirayku salonman jamushajta rikunchej chayqa, chimpaykuspa “allinta jamunki” nina. Paykunawan kʼachas kana, amataj saykʼurpachinachu. Noqanchejwan khuska tiyakunankuta nisunman. Bibliata chayri ima publicacionchus estudiakushan chayta jaywarisunman, manachayrí noqanchejpata kajta khuska leerisunman. Chantapis piensarisunman imaynasmantachus aswan sumajta yanapariyta atisqanchejta. Uj runa ñaupaj kutirayku tantakuyman rispa manchi manchilla kashasqa, mana allin ropayojchu risqanta yuyasqanrayku. Uj hermanotaj payta saludarispa nisqa ama llakikunanta, Jehovaj testigosnintaj tukuy runas jinalla kasqanchejta. Chay runaqa bautizakusqa, ni jaykʼajtaj qonqakusqachu chay hermano paywan imayna kʼachachus kasqanta. Tantakuykunaman jamojkunawan kʼachas kaspapis, allintapuni qhawarikuna ama kausayninkuman satʼikunapaj (1 Ped. 4:15).

¹⁶ ¿Imastawantaj ruwasunman tantakuykunasninchejman jamojkuna allin sientekunankupaj? Sichus tantakuykunasninchejpi parlashaspa, comentashaspa chayri discursota qoshaspa mana testigo kajkunamanta chayri creenciasninkumanta parlanchej chayqa, respetowanpuni parlananchej tiyan. Ama imatapis ninachu phiñachinapaj jina. Chaytachus ruwasunman chayqa, manaña kutimuyta munankumanchu (Tito 2:8; 3:2). Mana allinchu kanman wajkunaj creenciasninkumanta malta parlananchej (2 Cor. 6:3). Discursosta qoj hermanostaj astawanraj chaymanta allinta qhawarikunanku tiyan. Chantapis discursosta qoshaspa mosojkunapi piensarinanku tiyan, mana entiendesqanku palabrastataj sutʼisituta, tukuy entiendenankupaj jina sutʼinchananku tiyan.

17. ¿Imatá ruwananchej tiyan predicacionpi “allin sonqoyoj” kajkunata tarispa?

¹⁷ Kay tiempopeqa ni jaykʼaj jina astawanraj mana saykʼuspa runasman willamunanchej tiyan. Sigataj tarishanchej “wiñay kausayta japʼinankupaj allin sonqoyoj” kajkunata (Hech. 13:48). Predicashaspa allin sonqoyoj runasta tarinchej chayqa, chay rato tapurina Bibliamanta yachachinapaj, tantakuykunasninchejmantaj invitarina. Ajinamanta yanapasun ‘kausayman pusaj ñanta’ puriyta qallarinankupaj (Mat. 7:14).