Diospa Llajtanta Kamachejkunaman iskay mosoj hermanos yapakun
5 DE OCTUBRE DE 2024 watapi centralninchejpi sumaj tantakuypi uj sumaj willay ruwakorqa. Hermanonchej Jody Jedele, chantá Jacob Rumph Diospa Llajtanta Kamachejkunamanta kanankuta nikorqa. Iskayninku ashkha watastaña tukuy sonqo Jehovata sirvishanku.
Jody Jedele warmin Damariswan kashan.
Hermano Jedeleqa Misuripi, Estados Unidospi nacekorqa. Paymanqa tatasnin Jehovamanta yachacherqanku, pisi testigoslla kaj kanku chaypitaj familiantin tiyakorqanku. Chay lugarmanqa suyuntinmanta ashkha hermanos predicacionpi yanapakoj rej kanku, chayrayku tukuy ladomanta hermanosta rejserqa. Payqa mayta tʼukoj Jehovaj llajtan mayta munanakusqankuta, ujchasqataj kasqankuta rikuspa. Chayrayku 15 de octubre de 1983 watapi bautizakorqa. Predicay mayta gustasqanraykutaj, colegiota tukuytawan septiembre de 1989 watapi precursor regular jina sirviyta qallarerqa.
Paywan hermananwan wawasllaraj kashajtinku, tatasninkoqa Betelman pusajpuni kanku. Chayrayku paykunapis Betelpi sirviyta munarqanku. Iskayninkutaj Betelpi sirverqankupuni. Hermano Jedeleqa septiembre de 1990 watapi Wallkill Betelpi sirviyta qallarerqa. Ñaupajtaqa Departamento de Limpiezapi yanapakorqa, chaymantataj Servicios Médicos nisqapi.
Chaypachasqa Betel qayllaypi kaj castellanopi congregaciones sumajta wiñasharqanku, qharistataj necesitasharqanku. Hermano Jedeleqa ujnin congregacionman rispa castellanota yachakuyta qallarerqa. Pisi tiemponmantaj circuitonmanta Dámaris sutiyoj precursorata rejserqa. Casarakuytawantaj khuska Betelpi sirverqanku.
2005 watapi Betelmanta llojsiporqanku mamanta cuidanankupaj, señoranpa tatasnintawan. Chay tiempopitaj precursores regulares jina sirverqanku, hermanotaj ashkha kutispi Precursorespaj Escuelapi yachachej karqa. Chantapis payqa yanapakorqa chay lugarmanta Comité de Enlace con los Hospitales nisqapi, Comité Regional de Construcción nisqapiwan.
2013 watapi Warwick construccionpi yanapakunankupaj watejmanta Betelman invitarqanku. Chaymantapachataj Pattersonpi, Wallkillpiwan sirvillarqankutaj. Hermanoqa yanapakorqa Departamento Local de Diseño y Construcción nisqapi, Servicios de Información sobre Hospitales nisqapiwan. Marzo de 2023 watapitaj Willaypaj Comisionpi yanapakunanpaj churarqanku. Ima ruwaykunatachus japʼisqanmanta parlaspa nin: “Mosoj ruwayta japʼispaqa mancharisunman. Jinapis chaypi yuyarikunanchej tiyan Jehovapi atienekunanchej kasqanta. Payqa ima ruwaytachus qowanchej chayta ruwayta atinapaj yanapawanchejpuni”, nispa.
Jacob Rumph warmin Ingawan kashan.
Hermano Rumphqa Californiapi, Estados Unidospi nacekorqa. Wawallaraj kashajtin mamanqa chiriyasqa kasharqa, jinapis payman Bibliamanta yachachinanpaj kallpachakorqa. Sapa watataj awelitanta visitaj rejpuni. Awelitanqa tukuy sonqo Jehovata sirvisharqa, yanaparqataj Bibliamanta yachakuyta munananpaj. Chayraykutaj 13 watasniyoj kashaspa Bibliamanta yachachinankuta nerqa. 27 de septiembre de 1992 watapitaj jovencitoña kashaspa bautizakorqa. Mamantaj watejmanta predicayta, reunionesman riytapis qallarerqa. Tukuynin familiantaj ñauparispa bautizakorqanku.
Hermano Rumphqa joven kashaspa repararqa precursoresqa manchay kusisqas kasqankuta. Chayrayku paypis colegiota tukuytawan septiembre de 1995 watapi precursor kayta qallarerqa. 2000 watapitaj Ecuadorman riporqa, maypichus predicajkuna necesitakusharqa chay lugarman. Chaypitaj Canadamanta Inga sutiyoj precursorata rejserqa. Tiemponmantaj casarakorqanku. Casarakuytawantaj Ecuadorpa ujnin llajtitanpi khuska sirverqanku, maypichus pisi publicadoresniyoj grupito karqa chaypi. Kunantaj chay grupitoqa sumaj congregacionña.
Tiempowantaj precursores especiales kanankupaj churarqanku, chaymantataj congregacionesta waturerqanku. 2011 watapitaj Galaad Escuelaman invitarqanku, clase 132 nisqaman. Graduakusqankutawantaj mundo enteropi ashkha lugarespi sirverqanku betelitas jina, misioneros jina, congregacionesta waturejkuna jina ima. Chantapis hermanoqa Diospa Gobiernonmanta Willajkunapaj Escuelapi yachachej karqa.
Coronavirus onqoy kasqanrayku watejmanta Estados Unidosman kuterqanku. Chaypitaj Wallkill Betelpi sirvinankupaj invitarqanku. Hermano Rumphtataj wakicherqanku Departamento de Serviciopi yanapakunanpaj. Chaymantataj Ecuador sucursalman kacharqanku, hermanotaj Sucursalta Kamachejkunamanta ujnin karqa. 2023 watapitaj Warwickmanñataj aparqanku, enero de 2024 watapitaj Willaypaj Comisionpi yanapakunanpaj hermanota churarqanku. Yanapakusqan lugaresmanta parlaspa pay nin: “Aswan sumajqa mana maypichus Jehovata sirviychu, manaqa hermanoswan khuska payta sirviy”, nispa.
Maytapuni chay hermanosta agradecekunchej sinchʼita llankʼasqankumanta, ‘jatunpajtaj qhawanchej’ (Fili. 2:29).