¿Pitaj jarkʼanqa mana soldados kajkunata? | ¿Imatá Biblia nin?

Organización de las Naciones Unidas nisqa kayta willariwanchej:

• Kay 7 al 23 de octubre de 2023 fechaspi, Gazawan Israel nacionwan guerrapi tinkushajtinkoqa 6.400 runasmanta astawan wañorqanku, 15.200 kurajtaj heridos kashanku. Chaykunamanta kurajtaj mana soldadoschu karqanku. May chhika runastaj waj ladosman ayqekushanku.

• Kay 24 de septiembre de 2023 fechapajqa Rusiawan Ucraniawan guerrapi kashajtinku 9.701 runas wañorqanku, paykunaqa mana soldadoschu karqanku. Ucraniapitaj 17.748 heridos karqanku.

¿Guerrasrayku ñakʼarej runaspaj ima suyakuypis kanmanchu? ¿Imatá chaymanta Biblia nin?

Allin kausay kanqa

Bibliapi nin ‘Dios jallpʼantinpi guerrasta tukuchinanta’ (Salmo 46:9). Chaypajtaj tukuy gobiernospa cuentanmanta uj gobiernota churanqa. Chay gobiernotaj cielopi kashan (Daniel 2:44). Diospa Gobiernonpeqa tukuypis ñakʼariykunamanta samarenqanku.

Diospa Gobiernonpeqa Jesucristo Rey kanqa, paytaj kaykunata ruwanqa:

• “Pay pobresta salvanqa yanapata mañakuspa qhaparikojtinku. Salvallanqataj wajchasta, mana piniyojkunatapis. Payqa mana imayoj runasta, wajchastapis khuyanqa. Paymin pobresta salvanqa. Paykunataqa ñakʼarichej runasmanta, sajra runasmantawan salvanqa” (Salmo 72:12-14).

Guerraswan, maqanakuswanqa ñakʼariykunallata, llakiykunallata apamun. Diostaj Gobiernonnejta tukuy chaykunata wiñaypaj chinkachenqa.

• Biblia nin: “Payqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj waqaypis, nitaj nanaypis. Chay ñaupaj kaj imasqa chinkapunña”, nispa (Apocalipsis 21:4).

Diospa Gobiernonqa tumpitamantawan kay jallpʼaman allin kausayta apamonqa. Imajtinchus Bibliaqa ñaupajmantaña willarqa “tukuynejpi guerras” kananta (Mateo 24:6). Chaykunata, waj imastawan rikusqanchejtaj sutʼita reparachiwanchej tumpamantawan gobiernos chinkachisqa kanankuta (2 Timoteo 3:1).