¿Imaraykutaj Jehovaj testigosnin mana guerraman rinkuchu?
Jehovaj testigosnenqa kaykunarayku mana jatuchaj maqanakuykunaman riykuchu:
Kaj. Dios kamachisqanrayku. Biblia nerqa Diosta kasukojkunaqa “espadasninkuta arado rejasman tukuch[inankuta]”, niñataj mayqen nacionpis waj nacionpa contranta maqanakunanpaj wakichikunankuta (Isaías 2:4).
Kaj. Jesús kamachisqanrayku. Jesusqa kay kamachiyta apóstol Pedroman qorqa: “Espadaykita waqaychay. Espadata oqharejkunaqa espadallawantaj wañuchisqa kanqanku”, nispa (Mateo 26:52). Jesús ajinata nisqanwanqa sutʼita rikucherqa yachachisqasnin, mana armasta oqharinankuta.
Jesucristo kaytawan yachachisqasninman nerqa: “Mana kay pachajtachu kankichej”, nispa. Chayrayku politicaman ni imarayku satʼikuykuchu (Juan 17:16). Nitaj ejercitoj contranta oqharikuykuchu, nillataj marchastapis ruwayku waj runas ejercitoman mana yaykunankupajqa.
Kaj. Cristianosqa runa masinkuta munakunanku tiyan. Jesús yachachisqasninman kayta nerqa: “Uj mosoj kamachisqata qoykichej: Purajmanta munanakuychej”, nispa (Juan 13:34, 35). Chayrayku testigosqa tukuyninku munanakunku, nitaj armasta oqharikunkumanchu wajkunata wañuchinankupaj (1 Juan 3:10-12).
Kaj. Ñaupaj cristianosqa mana jatun maqanakuykunaman rejchu kanku. Uj libro ajinata nerqa : “Jesuspa ñaupa yachachisqasnenqa mana jatun maqanakuykunapi satʼikojchu kanku nitaj cuartelmanpis rejchu kanku”, imaraykuchus jatun maqanakuyman, cuartelmanwan reyqa “Jesús munakuyta rikuchisqanwan, tukuyta munakuychej kamachisqanwan ima churanakusqanta” yacharqanku (Encyclopedia of Religion and War). Chantá kay Historia de la decadencia y caída del Imperio romano libropi, Edward Gibbon nerqa: “Cristianosqa ni jaykʼaj soldados kankumanchu [...] cristianos kasqankuta saqeytawanrajchá soldadosqa kankuman”, nispa.
Tukuy allinpi kausakunankupaj yanapayku
Jehovaj testigosnenqa allin runas kanaykupaj kallpachakuyku, nitaj ima suyupichus tiyakuyku chaypi ni ima sajratapis ruwaykuchu. Gobiernopi kamachejkunata jatunpaj qhawayku. Ajinata ruwaspa kay kamachiykunata kasukuyku.
“Tukuy runas kamachejkunata kasu[ychej].” (Romanos 13:1.)
“Cesarpata kajtaqa Cesarman qoychej, Diospata kajtataj Diosman qopuychej.” (Mateo 22:21.)
Chayrayku, tukuy kamachiykunata kasukuyku, impuestosta pagayku chantá gobierno tukuy runas allinpi kausakunankupaj imatapis kamachejtin chaypi yanapariyku.