JOVENESPA TAPUKUYNINKU
¿Imaynatá Biblia yanapawanman? 1 kaj: Bibliapi qanpaj jina yachachiykunata maskʼay
“Bibliata leeyta munaspapis, ancha ashkha kasqanta reparaspa saqepuni” (Briana, 15 watasniyoj).
¿Qanpis ajinallatatajchu ruwarqanki? Jina kajtin kay yachaqana mayta yanapasonqa.
¿Imaraykutaj Bibliata leey may allin?
Bibliata leenamanta parlaspa ichapis ninki: “Mana gustawanchu”, nispa. Ichá chayta ninki Biblia ashkha hojasniyoj, juchʼuy letrasniyoj, chayri mana dibujosniyoj kasqanrayku. Bibliata leeymanta nisqaqa, televisionta qhaway chayri videojuegosta pujllaychá astawan gustasunki.
Kaypi piensariy: May unayniyoj madera cajapi ashkha qori kasqanta yachaspa, ¿imatataj ruwawaj? ¿Manachu chay rato qhawaykuyta munawaj?
Bibliaqa may unayniyoj madera caja jinallataj, chaypeqa ashkha sumaj yuyaychaykunata tarinki:
Allin kajta ajllanaykipaj.
Tatasniykiwan allinpi kausakunaykipaj.
Sumaj amigosta tarinaykipaj.
Llakiyniykita atipanaykipaj.
Bibliaqa may unayniyoj libro kajtinpis, kausayniykipi yanapasonqa. Imaraykuchus “Diospa yuyaychasqan kashan” (2 Timoteo 3:16). Chayrayku Bibliapi sumaj yuyaychaykunaqa, Diosmanta jamun.
Bibliaqa may unayniyoj madera caja jina, chaypeqa ashkha sumaj yuyaychaykunata tiyan.
¿Imaynasmantá Bibliata leewaj?
Qallariyninmanta tukukuyninkama leewaj. Ajinata leespaqa, tukuynin Biblia imamantachus parlashasqanta yachanki. Imaynatachus chayta ruwanata qhawarina.
Bibliaqa 66 librosniyoj. Qallarin Génesis librowan, tukukuntaj Apocalipsis libropi. Qallariyninmanpacha leeyta atiwaj.
Imaschus pasasqanman jina leeyta atillawajtaj.
Yuyaychay: Mosoj Jallpʼapi Kausajkunapaj Diospa Palabran nisqa Bibliapi Yanapa A7 nisqata qhawariy. Chaypi parlan Jesús niraj kay jallpʼapi willayta qallarishajtin, imaschus pasasqanmanta.
Kausayniykipi yanapasunanpaj jina yachachiykunata maskʼawaj. Kinsamanta parlarina.
¿Sumaj amigostachu tariyta munanki? Chaypajqa Davidpa kausayninmantawan Jonatanpa kausayninmantawan leeriwaj (1 Samuel, capítulos 18-20). Chantá “Cómo encontrar amigos de verdad” nisqaman yaykuspa, chaypi kaj tapuykunaman kutichiwaj. Chayta ruwayqa kausayniykipi yanapasonqa.
Sajra imasta ruwanaykipaj tanqasojtinku, ¿sinchʼitachu sayayta munanki? Chaypajqa Josej kausayninmanta, juchapi mana urmananpaj imatachus ruwasqanmanta ima leeriwaj (Génesis, capítulo 39). Chantá “Cómo resistir las tentaciones”, “Acusado falsamente” nisqasman yaykuspa, chaypi kaj tapuykunaman kutichiwaj. Chayta ruwayqa yanapasonqa sajra kajmanta karunchakunaykipaj.
Diosman orakuy yanapasusqantachus manachus yachanaykipaj, ¿imatá ruwawaj? Chaypajqa Nehemías imatachus ruwasqanta leeriwaj (Nehemías, capítulo 2). Chantá “Jehová contestó su oración” nisqaman yaykuspa, chaypi kaj tapuykunaman kutichiwaj. Chayta ruwayqa mayta yanapasonqa.
Yuyaychay: Bibliata sumajta entiendenaykipajqa, maypichus mana ni ima chʼajwa kanchu chaypi leeriwaj.
Kausayniykipi yanapasunanpaj Diospa ujnin kamachinpa kausayninmanta leeriwaj chayri Salmos librota leeriwaj. Leeriytawantaj kaykunata tapurikuwaj:
Jehová Dios, ¿imaraykutaj kay imasta Bibliapi qhelqachinman karqa?
¿Imatá yachakuni Jehová Diosmanta, imaraykuchus imatapis ruwasqanmanta ima?
¿Imaynatá kay leesqayman jina kausayniypi ruwayman?
Yuyaychay: Bibliata leenaykipaj kallpachakuy. Internetpi maskʼawaj “Bibliata leenapaj wakichikusqan” nisqa hojitata. Chayman jinataj Bibliaykita leeriwaj, ima fechapichus leeyta qallarisqaykitapis chay hojitapi anotakuwaj.