Jesusqa niraj nacekushaspaña jatunchasqa karqa

Yachakorqanchej jina, ángel Gabrielqa Mariaman willarqa wawayoj kananta. Wawaqa Jesús sutikunan karqa, chantapis wiñaypaj Rey kanan karqa. Mariaqa angelpa nisqanta uyariytawan, payta tapurerqa: “¿Imaynataj chay kanmanri? Noqaqa mana ni pi qhariwanpis puñuykunichu”, nispa (Lucas 1:34).

Ángel Gabrieltaj kuticherqa: “Aswan Patapi kaj Diospa atiynin qanman jamuspa jarkʼasonqa. Ajinamanta chay nacej wawaqa Diospaj tʼaqasqa kanqa, Diospa Wawantaj sutichasqa kanqa”, nispa (Lucas 1:35).

Chantá ángel Gabrielqa Mariaman nillarqapuni: “Aylluykimanta Elisabetpis qhari wawayoj kanqa awelitaña kaspapis. Payta mana wawata rejsej nejtinkupis, sojta killaña onqoj kashan. Diospajqa ni imapis mana atikojqa kanchu”, nispa (Lucas 1:36, 37). Ichapis angelqa chayta nerqa, María paypa willasqanta creenanpaj.

Mariarí ángel Gabrielpa nisqanta creerqa, nerqataj: “Jehová Diospa kamachin kani, nisqaykiman jina noqapi ruwakuchun”, nispa (Lucas 1:38).

Ángel Gabriel ripusqantawan, Mariaqa Elisabetta waturikamunanpaj wakichikorqa. Elisabetqa qosan Zacariaswan Judeaj orqosninpi tiyakoj. Chay lugarqa Jerusalén qayllapi kasharqa. Mariatajrí Nazaret llajtapi tiyakoj. Wasinmanta Judea orqoskamaqa, kinsa chayri tawa día puriy karqa.

Mariaqa Zacariaspa wasinman chayaytawan Elisabetta saludaykorqa. Elisabettaj Diospa atiyninwan juntʼa kaspa, nerqa: “María, bendecisqa kanki warmis ukhupi, wijsaykipi kaj wawitapis bendecisqallataj. ¿Pitaj noqa kasqani Señorniypa maman watukunawanpajri? Napaykuwasqaykita uyarisqaytawan, wawitayqa wijsay ukhupi kusiywan kuyurin”, nispa (Lucas 1:42-44).

Mariataj may agradecesqa Elisabetman nerqa: “Noqaqa Jehová Diosta jatunchani, sonqoytaj kusiywan juntʼasqa kashan, Salvawaj Diosniyrayku. Payqa noqa wajcha kamachinta qhawawarqa. Kunanmantapachataj tukuy runaj miraynenqa kusisqa kasqayta niwanqanku. Atiyniyoj Diosqa tʼukuna imasta noqapaj ruwapuwan”, nispa. Mariaqa Diospa Wawanpa maman kananta yachaspapis, mana jatunchakorqachu. Astawanpis Diosta jatuncharqa, nerqataj: “Sutenqa may jatunpaj qhawasqa, khuyakuyninpis wiñay wiñaypaj kallanqapuni payta manchachikojkunapaj”, nispa (Lucas 1:46-50).

Chantá Mariaqa Diosta yupaychallarqapuni, nerqataj: “Payqa tʼukuna imasta atiyninwan ruwarqa, chʼeqeracherqataj sonqonkupi jatunchakojkunata. Atiyniyoj runasta uraykucherqa kamachina tiyanankumanta, llampʼu sonqoyojkunatataj pataman oqharerqa. Yarqhasqa kajkunataqa allin imaswan sajsacherqa, qhapajkunatataj mana imayojta kachaporqa. Payqa Israel kamachinta yanapaj jamorqa, ajinamanta wiñay wiñaypaj khuyakusqanta yuyarichinanpaj Abrahanman, jinallataj mirayninmanpis. Chaytaqa ñaupa tatasninchejman nerqa”, nispa (Lucas 1:51-55).

Chay qhepata, Mariaqa kinsa killata jina Elisabetwan qhepakorqa. Chaypajqa Elisabet jatun onqojña kasharqa. Mariataj paywan qhepakuspa manchaytachá yanaparqa. Mariapis, Elisabetpis Diosta kasukorqanku, paypa atiyninwantaj onqoj rikhurerqanku. Chayrayku khuska kasqankoqa, may sumajpuni karqa.

Jesustaqa niraj nacekushajtinña jatuncharqanku. Elisabetqa ‘Señorníy’ nispa jatuncharqa, wawitantaj Mariaj napaykusqanta uyarispa kusirikorqa. Jinapis mana tukuychu ajinata kusirikorqanku. Chaymantataj aswan qhepaman yachakusunchej.