“Kʼacha simiwan parlaychej, kachiwan kachinchasqata jina”
1. ¿Ima niyta munan “kachiwan kachinchasqata jina” parlay?
1 “Kʼacha simiwan parlaychej, kachiwan kachinchasqata jina. Jinallataj yachaychej imaynatachus sapa ujman kutichinaykichej kasqanta.” (Col. 4:6.) Kachiwan kachichasqatajina parlayqa, imatachus parlananchikta akllay niyta munan, ajinamanta parlayninchik miskʼi kananpaq. Jina kaptinqa pillapis parlasqanchiktaqa uyariyta munanqa. Chayqa runaman willayninchikpi manchay allinpuni.
2. ¿Jesús imata ruwarqa samaritana warmiman willananpaq?
2 Jesusjina ruwanachik. Jesús purisqanmanta saykʼuspa, juk pozop qayllanpi samarichkaptin, Samaria llaqtayuq warmi yakuta urqhuq jamurqa, Jesustaq payman parlayta qallarirqa. Chay parlasqankupitaq achkha kutita payqa, yuyarichirqa samaritanoswan judioswan mana allintachu apanakusqankuta. Chantapis chay samaritanaqa paykuna Jacobpa ayllunmanta kasqankuta nirqa, judiostaq samaritanosqa wak ayllunmanta kasqankuta niq kanku. Jesusqa chay parlasqanwan mana churanakurqachu, manaqa allinllawan parlarqa, ajinamanta Jesusqa kay sumaq willayta, chay warmiman, llaqta masisninman ima willarqa (Juan 4:7-15, 39).
3. Willachkaspa, ¿imaynatá Jesusjina ruwasunman?
3 Willaq lluqsiptinchik, ama qunqanachu: “sonqo tiyaykuy allin willaykunata” willaq risqanchikta (Rom. 10:15). Kay willasqanchik allinninkupaq kasqanta rikuchiyta munanchik, manataq paykunap creesqankuta pampachayta munanchikchu. Chay runa mana allintachu yuyaptinpis, mana ñuqanchikqa pantasqa kasqantachu rikuchinanchik tiyan. ¿Ima allin yuyaypis kanchu parlayninpi allin kasqanta ninanchikpaq? Ichapis Bibliamanta ñawiripusunman jinata nispa: “¿Tʼukurirqankichu maykʼaqllapis kay ruwaykunapi?”.
4. ¿Imata ruwasunman pillapis mana allinta kutichiwaptinchik?
4 Wakin runa chʼaqwayllata munaptinku, chayri mana allinta kutichiwaptinchik, ¿imata ruwasunman? Ñuqanchikqa, ruwayninchikwan, parlayninchikwan ima, kʼacha kayta, llampʼu sunqu kayta ima, rikuchinallanchikpuni tiyan (2 Tim. 2:24, 25). Chay runa willasqanchikta mana allinpaq qhawan chayqa, ichapis allinllawan ripusunman (Mat. 7:6; 10:11-14).
5. ¿Imaynatá juk warmita yanaparqa juk hermana allillanwan kutichisqan?
5 Allin ruwaykuna. Juk hermana vecinanman willarichkarqa, chay warmitaq phiñakuspa, siminman chayaqtataq nirparirqa. Kay hermanataq kʼachamanta nirqa: “Mana jinata phiñachisuyta munarqanichu, perdonaway. Allin pʼunchay qampaq kachun”, nispataq ripurqa. Iskay semanamantaq chay warmiqa, hermanap punkunta takamurqa, ajinatataq nirqa: “Perdonaway, imatachus niyta munawarqanki chayta uyarisqayki”, nispa. Kʼachamanta kutichispaqa runata astawan yanapayta atisunchik (Pro. 15:1; 25:15).
6. ¿Imaraykutaq willaq lluqsispa kachiwan kachichasqatajina parlananchik tiyan?
6 Chayrayku, sumaq willaykunata parlachkaptiyki kachiwan kachichasqatajina parlay. Wakin runa mana uyariyta munaptinpis, ichapis juk Jehovamanta sutʼinchaq wak kuti chay runaman riptin, allinta uyarinqa.