BIBLIAJ KUTICHIYKUNASNIN
¿Imaraykutaj Jesuspa wañuyninta yuyarikunanchej tiyan?
¿Imayna kausaytaj aswan qhepaman kanqa Jesuspa wañuyninrayku? (ISAÍAS 25:8; 33:24)
Jesuspa wañuynenqa ni imawan kikinchakunchu. Imajtinchus Jesús wañusqanrayku runas juntʼa runasman tukuyta atinku. Runaqa mana sajrata ruwananpajchu ruwasqa karqa, nitaj onqonanpajchu, chayri wañunanpajchu (Génesis 1:31). Chaywanpis jucha Adannejta kay pachaman yaykumorqa. Jesustaj wañorqa juchamanta wañuymanta kacharichinawanchejpaj. (Mateo 20:28; Romanos 6:23 leey.)
Diosqa, runasta munakusqanta rikucherqa Churinta Jallpʼaman kachamuspa (1 Juan 4:9, 10). Jesusqa discipulosninman kamacherqa wañuyninta yuyarikunankuta uj tantakuyta ruwaspa, maypichus tʼantataj, vinotaj kanan karqa. Chay tantakuyta sapa wata ruwaspataj, Diosman, Churinman ima agradecekusqanchejta rikuchinchej munakuwasqanchejmanta. (Lucas 22:19, 20 leey.)
¿Pitaj tʼantata mikhuyta, vinotataj ujyayta atin?
Jesús, discipulosninman ñaupaj kutirayku wañuyninta yuyarikunankuta nishajtin, uj tratomanta parlarqa (Mateo 26:26-28). Chay tratonejtataj discipulosnenqa wakin runaspis reyestaj sacerdotestaj janaj pachapi Jesuswan khuska kayta atinku. Chay tratopi kajkunallataj tʼantata mikhuyta, vinotataj ujyayta atinku, may chhika runas chay tantakuyman rejkunataj mana. (Apocalipsis 5:10 leey.)
Jehová Diosqa casi iskay waranqa watasta jinaña runasta ajllashan reyes kanankupaj (Lucas 12:32). Paykunaqa pisilla kanku, kay pachapi wiñay wiñaypaj kausakuyta suyakojkunamanta nisqaqa. (Apocalipsis 7:4, 9, 17 leey.)