93 yachachiy

Jesús runakunata mikhuchin

MAY jatun llakiy karqa. Juan Bautistata wañuchirqanku. Herodias reypa warmin Juanta chiqnikuspa, reywan Juanpa umanta khuchuchirqa.

Jesús chayta uyarispa mayta llakikurqa. Chayrayku chʼinniqman sapitan ripurqa. Runataq qhipanta rillarqataq. Jesús chay runasta rikuspa, paykunata khuyakurqa. Chayrayku, Diospa Reinonmanta yachachirqa, unqusqakunatataq jampirqa.

Laqhaña kaptin, discipulosnin Jesusta nirqanku: ‘Kayniqpi chʼinpacha, chʼisiyaykuchkanñataq. Runasta kachapullayña, ranchospi mikhunata rantikamunankupaq’, nispa.

Jesustaq nirqa: ‘Paykuna mana ripunqankuchu. Qamkuna paykunaman mikhunata quychik’ nispa. Felipeman kutirikuspa Jesús tapurqa: ‘¿Maypitaq kay chhika runaspaq mikhunata rantimusunmanri?’, nispa.

‘May chhika qullqiwancha mikhunata rantisunman kay runas mikhunankupaqqa’, nispa Felipe kutichirqa. Andrestaq nirqa: ‘Mikhunanchikta apaq yuqallituqa, phichqa tʼantas, iskay challwallastawan japʼichkan. Mana jaykʼaq kayllawanqa runaman mikhuchisunmanchu’, nispa.

Jesús nirqa: ‘Runaman tiyakunankuta nimuychik’. Chaymanta Diosman pachista quspa. Mikhunata pisimanta pisi qurqa. Discipulosqa tʼantata, challwatawan tukuyman jaywarqanku. Chay pachaqa 5.000 qharikuna karqanku. Warmistaq, wawastaq achkhallataq karqanku. Tukuytaq saqsanankukama mikhurqanku. ¡Discipulosqa 12 canastasta puchusqankumanta uqharimurqanku!

Chaymanta Jesús discipulosninman Galilea quchata juchʼuy barcopi chimpanankutaq nirqa. Quchapi kachkaptinku locopara jichʼaykakamurqa. Yakuqa wayrawan uqharikuspa, barcota kaymanta jaqayman apaykachachkarqa. Discipulosqa mayta mancharikunku. Chayllapi juk runata yaku patapi purispa, qayllaykuqta rikuytawan manchachikuspa qhaparirqanku.

Jesús nirqa: ‘Ama mancharikuychikchu, ñuqa kani’, nispa. Chayta uyarispapis, mana creerqankuchu. Pedrotaq nirqa: ‘Señor, qamchus kanki chayqa, kay yaku patata qamman jamunayta niway’. Jesusqa: ‘¡Jamuy!’, nispa kutichirqa. ¡Pedrotaq yaku patapi purirqa! Mancharikuspataq, yakuman chinkaykurqa, Jesustaq makinmanta japʼirqa.

Chaymanta Jesusqa watiqmanta achkha runata mikhuchillarqataq. Chay kutiqa 7 tʼantawan juk chhika challwallawan, tukuyta saqsanankukama mikhuchillarqataq. ¡Jesús runata mikhuchisqanta qhawaspaqa kusikunchik! ¡Pay reyjina kamachimuptinqa mana imamantapis llakikunachu kanqa!

Mateo 14:1-32; 15:29-38; Juan 6:1-21.