Kimsa kaq yachachiy: kʼacha runas wañupuspa janaqpachaman ripunku

¿Imaynatá kay yachachiy rikhurirqa?

Iskay kaq siglomantapacha, Jesuspa apostolesnin wañupusqankutawan, juk qutu runas, teólogos nisqa, astawan uyarisqas kayta qallarirqanku, kunan tiempopitaq chay runastaqa Iglesiata jatarichiqkunatajina riqsinku. Juk enciclopedia nin: “Paykunaqa, juk runa wañupuptin, cuerpon llimphuchasqa kaptintaq, alman janaqpachaman ripusqanta yachachiq kanku”, nispa (New Catholic Encyclopedia, 2003).

¿Imatá Biblia yachachin?

“Kusikuyniyojmin kanku llampʼu sonqoyojkunaqa, imaraykuchus paykuna kay pachata herenciankupaj japʼenqanku.” (Mateo 5:5.)

Jesusqa, discipulosninpaq janaqpachapi juk chiqata wakichipunanta nichkaspa, mana nichkarqachu tukuy kʼacha runas janaqpachaman ripunankuta (Juan 3:13; 14:2, 3). Astawanqa, Diosmanta mañakuyta yachachichkaspa nirqa: “Munayniykitaj ruwasqa kachun janaj pachapi ajinallatataj kay pachapipis”, nispa (Mateo 6:9, 10). Arí, chiqan kaqta ruwaqkunamanta wakillan janaqpachaman Jesuswan khuska kamachimunankupaq rinqanku, wakinkunataq Jallpʼapi wiñaypaq kawsakunqanku (Apocalipsis 5:10).

Tiempo pasasqanmanjina lglesiapi kamachiqkunaqa, imatachus ruwananku kasqankumanta yuyasqankuta tikrayta qallarirqanku. Juk enciclopedia nin: “Iglesiaqa pisimanta pisi Diospa Reinonpa cuentanmanta churakurqa” (The New Encyclopædia Britannica). Jesús, discipulosnin “mana kay pachajtachu” kasqankuta yachachiptinpis, Iglesiapi kamachiqkunaqa, astawan atiyniyuq kayta munaspa politicawan chhapukuyta qallarirqanku (Juan 15:19; 17:14-16; 18:36). Rikusunchikjina Romamanta kamachiq Constantinoqa, Iglesiapi kamachiqkunata tanqarqa wak llulla yachachiykunata yachachinankupaq. Chaykunamanta juknintaq, Dios Tata, Dios Churi, Dios espíritu santo nisqa yachachiy kachkan.

Kay pʼitikunap nisqanpi tʼukuriy: Salmo 37:10, 11, 29; Juan 17:3; 2 Timoteo 2:11, 12.