Diosmanta yachachiyta qallarinapaq yachaqanas
1. Tukuypaq urqhusqa Torremanta Qhawaq revistapi, ¿ima yachaqanataq rikhurinqa, chantá imapaqtaq?
1 Kay tukuypaq urqhusqa Torremanta Qhawaq abril-junio 2011 revistapi juk yachaqana rikhurinqa, Diosmanta yachachiyta qallarinapaq. Kaytaq sutikunqa “Bibliap Yachachiykunasnin”. Maypichus willanchik chaypi, runasqa revistata japʼikuytawan, chay yachaqanata ñawiriyta munanqanku, astawanpis runaswan khuska ukhunchanapaq wakichisqa kachkan.
2. Kay yachaqana, ¿imayna wakichisqataq kachkan?
2 ¿Imayna wakichisqataq kachkan? Kay yachaqanap titulon, subtitulosnin ima, tapuykunapijina kachkan, runaswan parlachkaspa ukhunchanapaqjina. Bibliamanta pʼitisninqa mana copiasqachu kachkan, jinamanta runas Bibliata ñawiriyta atinqanku. Parrafosninqa juchʼuylla kanku, punkullapi ukhuncharinapaq. Chantapis sapa yachaqana, Yachachin libroman apawanchik, jinamanta kay librowan yachachiyta qallarinanchikpaq.
3. ¿Imaynatá wasimanta wasi willachkaspa revistap yachaqananmanjina, Bibliamanta yachachiyta qallarisunman?
3 ¿Imaynasmantá kay yachaqanasta apaykachasunman? Revistamanta “Bibliap Yachachiykunasnin” nisqapi, uyarisunanpaqjina imamantachus parlasqanta, tapuriy. Sutʼincharinapaq, abril-junio killamanta revistaqa, Bibliap yachachiykunasnin may valorniyuq kasqanmanta parlan. Ichá tapuriwaq: “¿Biblia juk librollachu chayri Diospa Palabranpunichu? [Kutichinanta suyariy.] Kay revistapi chaymanta parlachkan”. Ñawpa kaq tapuyninta ñawiripuy, chantá parrafonta, pʼitinta ima. Watiqmanta tapuriy, kutichisunantataq suyariy. Maychus kasqallanta yachachiy, revistap tapuykunasninmajinataq ukhunchariychik. Niraq ripuchkaspataq, qhipan tapuyta ñawiripuy, ima pʼunchaytachus kutinaykipaqtaq parlariychik. Kay yachaqanamanta yachakuyta munaqman, sapa semana kutiy, qhipan revista chayamunankama. Chantapis nillawaqtaq: “¿Bibliamanta yachakuyta munawaqchu?” nispa, chantá imaynatachus Bibliamanta yachachinchik, chayta revistap yachaqananwan rikuchiwaq.
4. ¿Imaynatá kay yachaqana Diosmanta yachakuyta munaqkunaman kutinapaq yanapawasunman?
4 Kay yachaqanaqa, sapa kuti revistasta japʼikuqkunaman, Diosmanta yachakuyta munaqkunaman ima, parlanaykipaq yanapasunqa. Ichapis niwaq: “Kay Torremanta Qhawaq revistapiqa juk yachaqana rikhurin. Rikurichisqayki imamantachus yachachichkasqanta”. Jehovamanta mañakunchik tukuy runas chiqa kaqta “rejsinankuta” kay yachaqanawan (1 Tim. 2:4).