Jehovamanta sutʼinchaqkuna, ¿imatá yachaywasipi yachakuymanta ninku?
Jehovamanta sut’inchaqkunaqa, wak tatasjina, wawasninku imaynatachus aswan qhipaman kawsanankumanta llakikunku. Chayrayku yachaywasipi yachakuytaqa allinpaq qhawanku. “Yachaywasipi yachakuyqa wawasta, allin runas kanankupaq yanapanan tiyan. Chantá suyunkupi unay tiempopi kawsaq runasmanta, imatachus yachakusqankuta jatunpaq qhawaspa, kusiyta tariyta atinankupaq yanapanallantaq tiyan.”
KAY The World Book Encyclopedia, nisqanmanjina, yachaywasipi yachakuyqa wawasta, ñawpaqman lluqsinankupaq, machuyaspataq familiankuta allinta qhawanankupaq ima wakichin. Kaytataq Jehovamanta sutʼinchaqkunaqa, Diospa kamachiynintajina qhawanku. Biblia nin: “Sapa runa ayllusnimpaj, chanta astawanraj familiampaj wakichipunan tiyan. Manachus chayta ruwan chayqa, creeyninta qhesachan, mana creejmantataj aswan mana walejman tukupun”, nispa (1 Timoteo 5:8). Wawasqa, yachaywasipi yachakuspa, allinta kawsakunankupaq wakichikunku. Chayrayku Jehovamanta sutʼinchaqkunaqa, yachakuyta may allinpaq qhawanku.
“Yachaywasipi yachakuyqa allin runas kanankupaq wawasta yanapanan tiyan. Chantá suyunkupi unay tiempopi kawsaq runasmanta, imatachus yachakusqankuta jatunpaq qhawaspa, kusiyta tariyta atinankupaq yanapanallantaq tiyan.” (The World Book Encyclopedia)
Chantapis Bibliap nisqanmanjina kawsakunku: “Tukuy ima ruwanaykichejta tukuy sonqo allinta ruwaychej, Señorpaj jina, ama runapaj jinaqa” (Colosenses 3:23, 24). Kay yuyaychaytaq tukuy imapi yanapan. Chayrayku Jehovamanta sutʼinchaqkunaqa, wawasninkuta, tukuy sunquwan yachakunankuta, tareasninkutapis ruwanankuta ninku.
“Tukuy ima ruwanaykichejta tukuy sonqo allinta ruwaychej, Señorpaj jina, ama runapaj jinaqa.” (Colosenses 3:23, 24)
Bibliaqa, cristianosta yachachillantaq kamachiqkunata kasukunankuta. Chayrayku Jehovamanta sutʼinchaqkunaqa, kamachiqkuna kamachisqankumanjina wawasninkuta yachaywasiman kachanku yachakuyta tukunankukama (Romanos 13:1-7).
Jehovamanta sut’inchaqkunaqa, mana yachaywasillamanchu wawasninkuta kachanku manaqa allinta yachakunankupaq, pukllaq rinankuta, imallatapis tocayta yachakunankuta, bibliotecaman rinankuta, wak imastawan ruwanankuta ima saqinku
Diosninchik, yachakuyta mana pisipaq qhawaptinpis mana ninchu, chaylla kusisqa kawsakunanchikpaq yanapawasqanchikta. Yachaywasipi wawas yachakusqankuqa, kusisqa kanankupaq, runawan allinta apanakunankupaq ima, yanapayta atinman. Chayrayku Jehovamanta sutʼinchaqkunaqa, mana yachaywasillamanchu wawasninkuta kachanku manaqa allinta yachakunankupaq, pukllaq rinankuta, imallatapis tocayta yachakunankuta, ejerciciosta ruwanankuta, bibliotecaman, museosman rinankuta, wak imastawan ruwanankuta ima saqinku. Chantá wawasninkuman, machitu runasta jatunpaq qhawanankuta, yanapanankuta ima yachachillankutaq.
¿Astawan yachakuy allinchu?
Tukuy imata ruwanapaq máquinas rikhurimusqanrayku, achkha waynas, sipaskuna ima, imapaqchus estudiarqanku chaypaqjina, mana llamkʼayta tarinkuchu, chayrayku wak imaspi llamkʼayta maskʼanku. Chaypaqtaq allinta llamkʼaq runas, allin wakichisqa runas, ima llamkʼaymanpis yachakunankupaqjina kananku tiyan. Mana jina kaptinqa, kay allinta tʼukuriq renacentista Montaigne nisqanmanjina ruwananku allin kanman, payqa nin: ‘Yachayniyuq kanamantaqa, yachakusqanchikmanjina kawsayninchikpi ruwayqa astawan allin’, nispa.
Mana wakichisqa waynas, sipaskuna imaqa, ni qhapaq suyuspi, nitaq wakcha suyuspi llamkʼayta tariyta atillankuchu. Chaywanpis gobierno kamachisqanmanjina yachaywasipi yachakuytawanpis, mana juk llamkʼayta tarinkuchu chayqa, tatas, wawasninkuta, astawan estudianankuchus manachus kasqanta, estudiasqanku imastachus apamunanta, chaypaq imatachus ruwanankuta ima, allinta yuyaychakunankupaq yanapananku tiyan.
Chaywanpis qhapaqyayta maskʼayqa mana kusiyta apamunchu. Kay qhipa pʼunchaykunapi, achkha qharis, warmis ima, achkha watasta estudianku, manataq imapaqchus estudiarqanku chaypaqjina llamkʼayta tarinkuchu. Wak tatastaq, familiankuwan kanankumanta, wawasninkuta allin runas kanankupaq yanapanankumanta nisqaqa, llamkʼayllaman qukunku.
Mana qhapaqyayta maskʼay, maychus kaqmanjina yachakuyta qhawaytaq, kusisqa kawsakunapaq may allin. Jesucristo nirqa: “Diosmanta Qhelqasqapi nin: Mana tʼantallawanchu runaqa kawsanqa; astawanqa, Diospa siminmanta tukuy llojsimoj palabraswan kawsanqa”, nispa (Mateo 4:4). Chiqa cristianosjina, Jehovamanta sutʼinchaqkunaqa, kʼacha kaykunata rikuchiyta, Diosta yupaychayta, familiankuta uywanankupaq wakichikuyta ima, may jatunpaq qhawanku.