Willanapaj yanapas: Tukuy runaspaj publicacionesta orqhokun

1, 2. 1) ¿Imataj ñaupa cristianosta yanaparqa sumaj willaykunata Roma suyuntinkama chayachinankupaj? 2) ¿Imataj rikuchiwanchej Jehová yanapashawasqanchejta? (“Sumaj willaykuna 670 kuraj parlaykunapi” nisqa recuadrotawan qhawariy.)

KAY 33 watapi Pentecostés pʼunchaypi, Jerusalenpi kashaj forasterosqa mayta tʼukorqanku. Imaraykuchus Galileamanta runasqa, chay forasterospa parlayninkupi parlasharqanku, uj sumaj willaytataj willasharqanku. Jesuspa yachachisqasnenqa chay pʼunchaypi uj milagronejta waj parlaykunapi parlayta qallarerqanku, chaytaj Jehová yanapashasqanta rikucherqa (Hechos 2:1-8, 12, 15-17 leey). Paykuna chay pʼunchaypi sumaj willaykunata willasqankoqa, tukuy laya runasman willakorqa, pisi tiemponmantaj Roma suyuntinman chayarqa (Col. 1:23).

² Kay tiempomanta Diospa kamachisnenqa, mana milagronejta waj parlaykunapi parlanchejchu. Jinapis ñaupa tiempo cristianosmanta nisqaqa, aswan ashkha parlaykunapi Diosmanta willanchej. Imaraykuchus Diospa Reinomanta sumaj willaykunaqa 670 kuraj parlaykunaman tijrachikun (Hech. 2:9-11). Diospa llajtanqa, ashkha publicacionesta ashkha parlaykunapi orqhoshan, chayraykutaj sumaj willaykuna Jallpʼantinman chayashan.a Arí, Jehovaqa ajllasqan Rey Jesucristonejta willayta ñauparichishan (Mat. 28:19, 20). Kunanqa qhawarisun, kay 100 wataspi imaswanchus yanapachikusqanchejta. Chantapis sapa runaman willanapaj, Diospa Palabranmanta sumaj yachachejkuna kanapajtaj, imaynatachus Jesús wakichiwasqanchejta ukhuncharisun (2 Tim. 2:2).

Reyqa kamachisninta wakichin cheqa kajta mujuta jina tarpunankupaj

3. ¿Imaraykutaj ashkha yanapaswan willanchej?

³ Jesusqa, “janaj pacha reinomanta Palabrata” mujuwan kikincharqa, runaspa sonqontataj jallpʼawan (Mat. 13:18, 19). Tarpoj runaqa, tarpunanpaj jallpʼata sumajtaraj wakichin, tukuy imaymana yanapaswan. Diospa llajtanpis, ajinallatataj runaspa sonqonta imaymana yanapaswan wakichin, Reinonmanta sumaj willaykunata uyarinankupaj. Chay yanapasmanta wakenqa uj tiempollata yanapawarqanchej. Chaywanpis revistas, libros imaqa kunankama yanapashawanchej. Kay libroj 7 yachaqananpi yachakorqanchej periodicosnejta, radionejta, Internetnejta waj imasnejtataj Diosmanta willakusqanta. Kay yachaqanapitaj yachakusun waj yanapaswanñataj willasqanchejta, chaykunataj sapa runawan parlarinapaj mayta yanapawanchej (Hech. 5:42; 17:2, 3).

4, 5. ¿Imaynatataj tocadiscoswan willakoj, chaywanpis imatá mana atikojchu?

⁴ Grabasqa umallirichiykuna. Kay 1930, 1940 watas chaynejpi hermanosqa Bibliamanta grabasqa umallirichiykunawan willaj kanku. Chaytataj tocadiscospi phishqa minutosta jinalla uyarichej kanku. Wakin discosqa sutikoj “La Trinidad”, “El Purgatorio” chayri “El Reino” nisqa. ¿Imaynatá chay grabasqaswan willaj kanku? Clayton Woodworth, pichus Estados Unidospi 1930 watapi bautizakorqa, nerqa: “Uj tocadiscota maletín chhikanta apaj kani. Punkuman qayllaykuspa, tocadiscota kicharispa wakichej kani. Qallariyninmantapacha tocananpajqa, tukuy imanta maychus kananman churanay karqa, agujitantapis. Chantaqa wasej timbrenta ñitʼiykoj kani. Wasiyoj llojsimojtinrí, ajinata nej kani: ‘Kay sumaj willayta uyarinaykita munarqani’”, nispa. Chantá nillarqataj: “Runasqa wakin kutillapi punkuwan wisqʼarpariwaj kanku, wakin kutitaj tocadiscosta vendej kasqayta yuyaj kanku”, nispa.

⁵ Kay 1940 watapajqa, 90 kuraj umallirichiykunaña grabasqa karqa, discostapis 1 millón kurajtaña ruwakorqa. Hermano John Barr, pichus Gran Bretaña suyupi precursor karqa, tiemponmantaj Diospa Llajtanta Kamachejkunamanta ujnin karqa, nerqa: “Kay 1936 watamanta 1945 watakama tocadiscoymanta má kacharikojchu kani. Mana chaywanqa ni imata ruwayta atejchu kani. Wasiyojman tocadiscoymanta hermano Rutherfordpa parlasqanta uyarichisqayqa, noqatapis sonqochawaj. Paypis ladoypi kashanman jina kaj. Jinapis tocadiscowan willaspaqa, runasman yachachispa mana sonqonman chayayta atikojchu”, nispa.

6, 7. 1) ¿Imaynatataj yanaparqa willayniyoj papelitos, imatataj mana ruwayta atikojchu? 2) ¿Imaynamantataj Jehová yanapawarqanchej?

⁶ Willayniyoj papelitos. Kay 1933 watamantapacha tukuy hermanosta kallpachakorqa willayniyoj papelitoswan wasimanta wasi willanankuta. Chay papelitosqa, killapi willasqanchejmanta willanapaj hojita chhikan jina karqa. Chantapis chay papelitospeqa Bibliamanta uj willay kaj, chantá ima publicacioneschus kasqanta willaj. Hermanosqa, wasiyojman chay papelitota jaywanallanku karqa, leerinankuta nispa. Hermana Lilian Kammerud, pichus Puerto Ricopi, Argentinapi ima misionera jina llankʼarqa, ajinata nerqa: “Chay willayniyoj papelitoswan willayqa mayta gustawaj. Wakenqa wasiyojkunawan mana parlariyta atillajchu kayku. Chay papelitosqa runaswan parlarinaypaj yanapawarqa”, nispa.

⁷ Hermano David Reusch, pichus 1918 watapi bautizakorqa, ajinata nerqa: “Kay willayniyoj papelitoswan willayqa, hermanosta mayta yanaparqa. Imaraykuchus wakin hermanosqa mana allinta parlayta yachasqankuta yuyakoj kanku”, nispa. Chaywanpis chay papelitoswan willayqa, mana allinpunichu karqa. ¿Imaraykú? Hermano David sutʼincharqa: “Wakin runasqa mana parlayta yachasqaykuta yuyaj kanku, ajinapunitaj karqa. Imaraykuchus runaswan parlariyta mana atillajchu kayku. Chaywanpis Jehovaqa, kamachisnin jina runaswan rejsichikunaykupaj wakichishawarqayku. Tumpamantawan imatachus ninaykuta, willaypipis imaynatachus Bibliata apaykachanaykuta yachachiwaykuman karqa. Chaytataj, Diosmanta Parlayta Yachanapaj tantakuypa yanapayninwan ruwarqa, mayqenchus 1940 watas chaynejpi qallarerqa”, nispa (Jeremías 1:6-10 leey).

8. Cristo sumaj yachachej kanapaj wakichinawanchejpaj, ¿imatá ruwananchej tiyan?

⁸ Libros. Kay 1914 watamantapacha Jehovaj llajtanqa, 100 kuraj librostaña orqhon, chaykunataj Bibliamanta orqhosqa kanku. Wakin librosqa, hermanosta yanapan sumaj willajkuna kanankupaj. Hermana Anna Larsen, pichus Dinamarcapi tiyakun, 70 watasta jinañataj Diosmanta willan, nin: “Jehovaqa, sumaj willajkuna kanaykupaj, Diosmanta Parlayta Yachanapaj tantakuynejta, chay tantakuypi apaykachakusqan librosnejta ima yanapawayku. Ñaupaj kaj libroqa Curso en el Ministerio Teocrático (Course in Theocratic Ministry) nisqa karqa, 1943 watapitaj orqhokorqa. Chantá ‘Equipado para toda buena obra’ nisqa libro, 1946 watapi orqhokorqa [castellanopi 1950]. Kay 2001 watamantapachataj Benefíciese de la Escuela del Ministerio Teocrático nisqa libro kapuwanchej”, nispa. Arí, Jehovaqa, Diosmanta Parlayta Yachanapaj tantakuynejta, chay tantakuypi apaykachakusqan librosnejta ima, sumaj “yachachejkuna” kananchejpaj wakichiwanchej (2 Cor. 3:5, 6). ¿Diosmanta Parlayta Yachanapaj tantakuypi umallirichinaykipaj qhelqachikunkiñachu? ¿Sapa semanachu Benefíciese libroykita apanki? ¿Maskʼankichu chaypi yachachej hermano ima paginamantachus parlashasqan paginasta? Chayta ruwajtiykeqa, Cristo sumaj yachachej kanaykipaj wakichisonqa (2 Cor. 9:6; 2 Tim. 2:15).

9, 10. ¿Imaynatá libros cheqa kajmanta willanapaj, yachachinapaj ima yanapawanchej?

⁹ Jehovaqa, llajtanta yanapallarqataj waj librosta orqhonanpaj, chaykunataj hermanosta yanapan Bibliamanta cheqa kajta sutʼinchanankupaj. Chaykunamanta ujqa La verdad que lleva a vida eterna nisqa, 1968 watapitaj orqhokorqa. Chay librotaqa ashkhata orqhokorqa. Chayrayku 1969 watapi mayo killapi Reinomanta Willayninchej hojitapi jinata nerqa: “La verdad nisqa librota ashkhata mañakusqanrayku, Brooklyn fabricapi tutantin llankʼananku karqa”, nispa. Tutantin llankʼakunantaqa 1968 watapi septiembre killapi nikorqa, imaraykuchus ñaupaj killapi 1 millón khuskanniyojtawan mañakorqanku. Kay 1982 watapajtaj 100 millones kurajña orqhokorqa, 116 parlaykunapi. Kay libro 1968 watamanta 1982 watakama orqhokusqanqa, willajkuna 1 millón kurajpiwan yapakunanpaj yanaparqa.b

¹⁰ Kay 2005 watapitaj Bibliamanta yachachinapaj, ¿Imatapunitaq Biblia yachachin? librotañataj orqhokorqa. Kunankamaqa 200 millones jinaña orqhokun, 256 parlaykunapi. Chayqa sumajpuni karqa. Imaraykuchus 2005 watamanta 2012 watakama 1.200.000 runaspiwan Diosmanta willajkuna karqanku, Bibliamanta yachakojkunapis 6 millonesmanta jina 8.700.000 kurajman yapakorqa. Jehovaqa cheqa kajmanta willananchejpaj, yachachinanchejpaj ima mayta bendecishawanchej (1 Corintios 3:6, 7 leey).

11, 12. Biblia nisqanman jina, ¿pikunapajtaj revistasninchej?

¹¹ Revistas. Qallariypeqa Torremanta Qhawaj revista “juchʼuy tropa” cristianosllapaj karqa, pikunachus “janaj pachapi tiyakunapaj wajyasqa” kanku chaykunapaj (Luc. 12:32; Heb. 3:1). Kay 1919 watapi 1 octubre killapi Jehovaj llajtanqa, tukuy runaspaj mosoj revistata orqhorqa. Chay revistataqa Bibliamanta Yachaqajkunapis, waj runaspis mayta munarqanku. Chayrayku Torremanta Qhawaj revistamanta nisqaqa aswan ashkhata orqhokorqa. Chay revistaqa La edad de oro (The Golden Age) nisqa karqa. Castellanopitaj 1932 watapi orqhokorqa Luz y Verdad nisqa sutiwan. Kay 1938 watapitaj Consolación sutiwan rejsikorqa, 1947 watamantapachataj ¡Despertad! sutiwan.

¹² Watas pasasqanman jina, kay iskay revistas imaynachus wakichisqa kasqan mana kikillanpunichu karqa. Jinapis Diospa Reinonllamantapuni willashan, Bibliapi creenapajtaj kallpachashan. Kunanqa Torremanta Qhawaj revistata killapi iskayta orqhokun ujtaqa tantakuypi ukhunchanapaj, ujnintataj tukuy runaspaj. Tantakuypi ukhunchanapaj revistaqa, “[kamachispaj, NM]” nisunman “juchʼuy tropa” ovejasmanta, “waj ovejas[manta]” kajkunapajwan wakichisqa kashan (Mat. 24:45; Juan 10:16). Tukuy runaspaj revistaqa, pikunachus Bibliata, Diosta ima jatunpaj qhawanku, jinapis niraj cheqa kajta yachakunkuchu chaykunapaj orqhokun (Hech. 13:16).c ¡Despertad! revistataj Bibliamanta, Jehovamanta tumpallata yachajkunapaj (Hech. 17:22, 23).

13. ¿Imataj revistasninchejmanta tʼukunapaj jina? (“Ashkhata orqhokusqan publicaciones” nisqa recuadromanta parlariy.)

¹³ Kay 2014 wata qallariypajqa, ¡Despertad! revistata sapa killa 44 millones kurajta imprimikorqa, 100 parlaykunapi jina. Torremanta Qhawaj revistatataj 46 millonesta jina, 200 kuraj parlaykunapi. Kay iskay revistasqa Jallpʼantinpi may rejsisqa, ni mayqen revista jinataj ashkha parlaykunapi. Chayqa mana tʼukunapajchu. Imajtinchus kay iskay revistasqa, Jesús nisqanman jina, Jallpʼantinpi sumaj willaykunata willakunanpaj yanapashan (Mat. 24:14).

14. ¿Imatataj Diospa kamachisnin ruwanku, imaraykutaj?

¹⁴ Biblia. Kay 1896 watapi hermano Russell, paywan khuska llankʼajkunapiwan, publicacionesta orqhoj kanku chay corporacionta, Watch Tower Bible and Tract Society nispa suticharqanku, Biblia palabra kananta munasqankurayku. Jinata sutichasqankoqa allinpuni karqa, imaraykuchus Diospa Reinonmanta sumaj willaykunata willanapaj Bibliawanpuni yanapachikunchej (Luc. 24:27). Chayrayku Diospa kamachisnenqa Bibliata leenkupuni, tukuy runasmantaj saqenku. Sutʼincharinapaj, Benjamin Wilson tijrachisqan Bibliata, 1926 watapi imprentanchejpi imprimikorqa. Chay Bibliaqa sutikorqa The Emphatic Diaglott nisqa, Griegopi Qhelqasqasllataj karqa. Kay 1942 watamantapachataj King James Version nisqa Bibliata 700.000 Bibliasta jina imprimerqanchej, runasmantaj jaywakorqa. Iskay watasninmantaj American Standard Version nisqa Bibliata imprimerqanchej, chay Bibliapeqa Jehová suti 6.823 kutista rikhurin. Chay Bibliataqa 1950 watapaj 250.000 kurajtaña runasman jaywakorqa.

15, 16. 1) ¿Imaraykutaj Traducción del Nuevo Mundo nisqata allinpaj qhawanki? (“Traducción del Nuevo Mundo Biblia ashkha parlaykunapiña” nisqa recuadromanta parlariy.) 2) ¿Imaynatá Jehová sonqonchejman chayananta saqesunman?

¹⁵ Traducción del Nuevo Mundo de las Escrituras Griegas Cristianas nisqa Bibliaqa, inglespi 1950 watapi orqhokorqa, castellanopitaj 1963 watapi. Traducción del Nuevo Mundo de las Santas Escrituras nisqa Bibliata tukuyninta inglespi 1961 watapi orqhokorqa, castellanopitaj 1967 watapi. Kay Bibliaqa Jehovata jatunchan, imajtinchus hebreo parlaypi ima cheqaspichus karqa chaypi Diospa sutin rikhurin. Griegopi Qhelqasqaspipis 237 kutista Diospa sutin rikhurin. Kay Bibliataqa ashkha kutispi allinchakun, aswan allin kananpaj leeyta atinapaj jinataj. Kay 2013 watapitaj inglespi watejmanta allinchakorqa. Chay watakamaqa Traducción del Nuevo Mundo Bibliata tukuyninta chayri wakin librosnillanta 201 millones kurajtaña orqhokorqa, 121 parlaykunapi.

¹⁶ Traducción del Nuevo Mundo nisqa Bibliata parlayninkupi leerispa, ¿imatá wakin runas ninku? Nepal suyumanta uj runa, jinata nerqa: “Bibliata leerispa mana entiendeyta atillajchu kayku. Imaraykuchus mana kunan tiempo parlakun jinachu karqa. Kunantaj sumajta entiendeyku, parlasqaykuman jinalla kasqanrayku”, nispa. Kay República Centroafricana suyupi, uj warmi sango parlaypi Bibliata leerispa waqarikorqa, nerqataj: “Kayqa sonqoykamapuni chayan”, nispa. Noqanchejpis pay jinallataj sapa pʼunchay Bibliata leerispa, Jehová sonqonchejman chayananta saqesunman (Sal. 1:2; Mat. 22:36, 37).

Yanapasta qowasqanchejmanta, wakichiwasqanchejmantataj agradecekuna

17. ¿Imaynatá yanapasta qowasqanchejmanta, wakichiwasqanchejmanta agradecekusunman, chayta ruway imaynatá yanapawasun?

¹⁷ Rey Jesucristo yanapasta qowasqanchejmanta, wakichiwasqanchejmanta ima, ¿agradecekunchejchu? ¿Jehovaj llajtan orqhosqan publicacionesta leerinapaj tiempochakunchejchu, chaykunawantaj wajkunata yanapanchejchu? Ajinata ruwaspaqa, Opal Betler sutiyoj hermana jinachá yuyasun, payqa 1914 watapi 4 octubre killapi bautizakorqa, nerqataj: “Watas pasasqanman jina, qosay [Edwardwan] noqawanqa, tocadiscoswan, willayniyoj papelitoswan ima willaj kayku. Libroswan, folletoswan, revistaswan wasimanta wasi willaj kayku. Campañasman, letrerosniyoj marchasman, tratadosta jina jaywaj ima rej kayku. Chantataj Bibliamanta yachakuyta munajkunaman kutinapaj, yachachinapaj ima wakichiwarqayku. Mana tiempoyoj karqayku, jinapis kusisqapuni kausakorqayku”, nispa. Jesusqa nerqa kamachisnin tarpuspa, cosechaspataj mayta llankʼanankuta, chayta ruwaspataj kusikunankuta. Ashkha runaspis hermana Opal jinallataj, Jesuspa nisqan kausayninkupi juntʼakusqanta rikunku (Juan 4:35, 36 leey).

18. ¿Ima ruwaytaj may sumajpuni?

¹⁸ Niraj Rey Jesusta sirvejkunaqa, ichapis Diospa llajtanta qhawanku mana yachayniyoj, nitaj wakichisqa runasta jina (Hech. 4:13). Chaywanpis kaypi tʼukuriy: Reyqa, mana yachayniyoj runaswan ashkha imasta ruwachin. Arí, paykunaqa ashkha publicacionesta tijrachispa orqhonku, chaykunataj ni jaykʼaj jina ashkha runasman chayashan. Astawanqa, chay yanapasta allinta apaykachanapaj wakichiwanchej, tukuy llajtasmanta runasman sumaj willaykunata willanapaj. Ajinamanta Cristota yanapayta atinchej, cheqa kajmanta mujuta jina tarpuspa, runastataj yachachisqasninman tukuchispa. ¡Chaymá may sumajqa!