Bibliaqa Diospa Palabran

1, 2. ¿Imasmantataj Biblialla willawanchej?

¹ AMIGONCHEJ imallatapis regalawajtinchejqa kusikunchej, ¿icharí? Chantapis usqhayllata chay regalota qhawaykuyta munanchej, maytataj agradecekunchej.

² Bibliapis uj regalo jinallataj. Bibliataqa Diosninchej qowarqanchej. Biblialla willawanchej Diosqa cielota, kay jallpʼata, runatapis qhariwarmita ruwasqanta. Chantapis Biblialla kausayninchejpi sumajta yanapawanchej, yachakullanchejtaj imaynatachus Dios kay jallpʼata uj paraisoman tukuchinanta. Chayrayku Bibliaqa uj sumaj regalo.

3. ¿Imatataj reparasunchej Bibliata estudiaspa?

³ Bibliata estudiasqanchejman jina, reparasunchej Diosqa amigonchej kayta munasqanta. Paymanta astawan yachakusunchej chayqa, payman astawan qayllaykusunchej.

4. ¿Imaraykutaj Biblia jina mana waj libro kanchu?

⁴ Bibliaqa 2.800 kuraj parlaykunapiña tiyan, may chhika Bibliasñataj ruwakun. Jallpʼa enteropi casi tukuy runaspatapuni Bibliaqa parlayninkupi tiyapun. Sapa chunkamantaqa, jisqʼon runas Bibliayoj kanku. Sapa semanataj uj millón kuraj Bibliasta runasman jaywakun. Biblia jinaqa mana waj libro kanchu.

5. ¿Bibliaqa Diospa yuyaychasqanchu kasqa?

⁵ Bibliaqa Diospa “yuyaychasqan” (2 Timoteo 3:16 leey). Chaywanpis wakin runas ninku: “Bibliataqa runaslla ruwanku”, nispa. Bibliatajrí niwanchej: “Runas, Diospa atiyninwan yuyaychasqa kaspa paymanta parlarqanku”, nispa (2 Pedro 1: 21). Chaytaj rijchʼakun uj runa wawanwan cartata ruwachikusqanwan. Wawan chay cartata ruwajtinpis, chay cartaqa mana paypatachu, manachayqa tatanpata. Kikillantaj Bibliawanpis, Diosqa runasta yuyaycharqa Bibliata qhelqanankupaj. Chayrayku Bibliaqa mana runaspatachu, manachayqa Diospata. Bibliaqa ‘Diospa Palabranpuni’ (1 Tesalonicenses 2:13; “Bibliaqa Diospa ‘yuyaychasqan’” nisqata leeriy).

BIBLIAQA CABALTA PARLAN

6, 7. 1) Bibliata tukuy laya runas qhelqajtinkupis, ¿uj yuyayllachu kasqa? 2)  ¿Imamantataj Génesis libropi chantá Apocalipsis libropi parlan?

⁶ Bibliaqa 1.600 kuraj wataspi qhelqayta tukukorqa. Manataj uj tiempopi kausakoj runasllachu qhelqarqanku. Bibliata qhelqajkunamanta wakenqa profesionniyoj karqanku, wakintaj mana. Ujnenqa doctor karqa. Wakintaj karqanku campopi llankʼaj runas, pescadota japʼejkuna, michejkuna, profetas, jueces, reyes ima. Bibliata qhelqajkuna tukuy laya runas kajtinkupis, entero Bibliaqa uj yuyaylla kashan, uj runallapis qhelqanman jina.

⁷ Génesis libroqa parlashan Adantawan Evatawan Dios ruwasqanmanta. Adanwan Evawanqa Diospa contranta oqharikusqankurayku onqorqanku, machuyarqanku, wañuporqankutaj. Apocalipsis librotaj parlashan Diosqa onqoykunata chinkachinanmanta, wiñay kausayta, kusiy kausaytawan qonawanchejmanta. Bibliaqa sutʼinchawanchej Diospa munaynin juntʼakusqantapuni.

8. Onqoykunamanta parlaspa, kay jallpʼamanta parlaspapis, ¿Biblia pantajchu kasqa?

⁸ Bibliaqa imamanta parlaspapis manapuni pantanchu. Diospa Palabranqa ajinapuni kanan tiyan, ¿icharí? Levítico libropi parlan, Diosqa israelitasman ashkha kamachiykunata qosqanmanta. Chay kamachiykunaqa, israelitasta yanaparqa onqoykunawan mana chimpachikunankupaj. Chaypachataj runasqa manaraj yacharqankuchu imaynatachus onqoykuna rikhurisqanta. Chantapis Biblia nin, kay jallpʼanchejqa mana imallaman warkhusqa kashasqanta (Job 26:7). Ñaupa tiempomanta runasqa, yuyaj kanku kay jallpʼaqa mana muyuchu kasqanta. Quechuamanta ujnin Bibliatajrí nin: “Paymin jallpʼaj muyuynin patapi tiaska cashan”, nispa (Isaías 40:22, Quechua de Cuzce).

9. ¿Bibliata qhelqajkuna imatapis pakaykusqankuchu?

⁹ Bibliaqa ñaupa tiempo runasmanta parlaspa maychus kajtapuni parlan. Waj librosta qhelqajkunarí, wakin imasta pakaykuspaña qhelqarqanku. Nacionninku mashkha kutitachus enemigosninkuwan atipachikusqankutapis, mana qhelqarqankuchu. Bibliata qhelqajkunarí ni imata pakarqankuchu. Paykunaqa imapichus pantasqankuta qhelqarqanku. Qhelqallarqankutaj Israel llajta enemigosninwan atipachikusqantapis. Números libropi Moisesllataj qhelqarqa uj kuti pantaykusqanta, Dioswantaj chaymanta kʼamichikusqanta (Números 20:2-12). Bibliata qhelqajkuna ni imata pakaspa qhelqasqankoqa, reparachiwanchej Bibliaqa Diospa Palabranpuni kasqanta. Chayrayku ninchej Bibliaqa tukuy imamanta cabaltapuni parlasqanta.

BIBLIAQA SUMAJTA YUYAYCHAWANCHEJ

10. ¿Bibliaj yuyaychaykunasnin yanapawasunmanchu?

¹⁰ Bibliaqa Diospa “yuyaychasqan kashan. May sumajtaj yachachinapaj, juchata reparachinapaj, tukuy imata cheqanchanapaj” ima (2 Timoteo 3:16). Bibliaj yuyaychaykunasnenqa kunanpis yanapallawanchejpuni. Jehová Diosqa yachan imaynachus kasqanchejta, imatachus yuyasqanchejta, imachus sonqonchejpi kasqantapis. Payqa sumajta rejsiwanchej, munantaj kusisqa kausakunanchejta. Yachallantaj imachus allinninchejpaj kasqanta, imatajchus mana.

11, 12. 1) ¿Imastataj Jesús yuyaychasqa? 2) ¿Imastawantaj Jehová Dios Bibliapi yuyaychawanchej?

¹¹ Jesusqa runasta yuyaycharqa kusisqa kausakunankuta, wajkunawanpis allinta apanakunankuta. Yuyaychallarqataj imaynatachus Diosmanta mañakunankuta, amataj qolqellapi yuyanankuta. Chay yuyaychaykunataj qhelqasqa kashan Mateo libropi, 5 al 7 capitulospi. Jesús chay imasta yuyaychasqanmanta 2.000 watasña pasajtinpis, yuyaychasqanqa kunanpis yanapashallawanchejpuni.

¹² Jehová Diosqa Biblianejta yuyaychallawanchejtaj, familianchejwan sumajta kausakunata, ama qhellas kanata, wajkunawanpis allinta apanakunata. Bibliaj yuyaychaykunasnenqa tukuyta yanapawanchej, imayna kausayniyoj kajtinchejpis, maypi tiyakojtinchejpis, imayna llakiyniyoj kajtinchejpis (Isaías 48:17 leey).

BIBLIAJ NISQANQA JUNTʼAKUNPUNI

13. ¿Imaynatataj Babilonia llajta thuñisqa kanan kasqa?

¹³ Diosqa unaymantaña ashkha imasta profetasninwan willacherqa. Chay willachisqanmanta ashkhataj juntʼakunña. Ujtaqa profeta Isaiaswan willacherqa. Payqa willarqa Babilonia llajta thuñisqa kananta (Isaías 13:19). Profeta Isaiasqa sutʼita nerqa imaynatachus chay llajta enemigosninwan atipachikunanta. Babilonia llajtaqa jatuchaj punkusniyoj karqa, mayuwan muyurisqataj. Profeta Isaiastajrí nerqa mayoqa chʼakichisqa kananta, punkustapis kichasqata saqerparinankuta. Nillarqataj enemigosninkoqa mana maqanakuspalla chay llajtaman yaykunankuta. Chantapis nillarqataj, Ciro sutiyoj runa Babilonia llajtata thuñinanta (Isaías 44:27–45:2 leey; “Profeta” nisqata leeriy).

14, 15. ¿Profeta Isaías willasqanman jinachu Babilonia llajta thuñisqa kasqa?

¹⁴ Profeta Isaías chayta qhelqasqanmanta 200 watasninmanqa, ashkha soldados Babiloniaman chayarqanku. Chay soldadostataj Persia llajtata kamachej Ciro pusarqa. Profeta Isaiaspa nisqanqa juntʼakusharqapuni.

¹⁵ Babiloniosqa chay chʼisi fiestata ruwashasqanku. Nitaj yuyallasqankupischu pipis llajtankuta thuñiykunantaqa. Imaraykuchus llajtankoqa jatuchaj perqaswan muyurisqa karqa, mayuwan muyurisqataj. Ajina fiestapi kashajtinkutaj, kamachej Ciroqa soldadosninwan khuska, uj jatun larqʼata allasqanku. Chay larqʼantataj mayu yakuta waj ladoman kacharpasqanku. Yaku pisiyajtintaj soldadosqa Babiloniaman yaykunankupaj mayunta chimpasqanku. Profeta Isaías nerqa jina, babiloniosqa llajtaj punkusninta kicharisqallata saqerparisqanku. Ciroj soldadosnintaj mana maqanakuspalla chay llajtaman yaykuykuspa thuñiykusqanku.

16. 1) ¿Imatawantaj profeta Isaías nisqa Babiloniamanta? 2) ¿Profeta Isaiaspa nisqan juntʼakusqachu?

¹⁶ Profeta Isaiasqa nillarqataj Babilonia llajtapi ni pi ujtawan llajtachakunanta. Pay nerqa: “Manaña chaypi jaykʼajpis runas tiyakonqankuchu, nitaj llajtachakonqankuchu”, nispa (Isaías 13:20). Chay nisqantaj juntʼakorqapuni. Maypichus Babilonia llajta karqa, chay lugarqa chʼinpacha kashan. Chay lugartaj kashan Irak suyupi, Bagdad llajta qayllapi. Kunankamapis chay lugarpeqa ni pi tiyakunchu. Jehová Diosqa Babilonia llajtata “chinkachiy pichanawan” picharparerqa (Isaías 14:22, 23).

17. ¿Diospa tukuy ima nisqan juntʼakunpunichu?

¹⁷ Reparanchej jina, Bibliaj nisqasnenqa juntʼakunpuni. Chayrayku nisunman Bibliaj nisqanqa qhepamanpis juntʼakunallantataj. Jehová Diosqa kay jallpʼata paraisoman tukuchinanta niwanchej. Chaytaj tumpamantawan juntʼakonqapuni (Números 23:19 leey). Chayrayku wiñay kausayta suyakushanchej, mayqentachus “mana jaykʼaj llullakoj” Diosqa may unaymantaña qonanta nerqa, chayta (Tito 1:2).a

BIBLIAQA ASWAN ALLIN RUNA KANAPAJ YANAPAWANCHEJ

18. ¿Imatá Pablo nisqa ‘Diospa Palabranmanta’?

¹⁸ Biblia jinaqa mana waj libro kanchu. Entero Bibliaqa uj yuyaylla kashan, imamanta parlaspapis manapuni pantanchu, ñaupa tiempo runasmantapis mana pakaspa tukuy imata willan. Chantapis Bibliapeqa sumaj yuyaychaykuna tiyan, imastachus willasqanpis juntʼakunña. Mana chayllachu, apóstol Pablo nerqa: “Diospa palabranqa kausayniyoj, atiyniyojtaj”, nispa (Hebreos 4:12 leey).

19, 20. 1) ¿Bibliaqa reparachiwasunmanchu imayna runachus kasqanchejta? 2) ¿Imata ruwananchejtataj Diosninchej munasqa?

¹⁹ Bibliaqa aswan allin runa kanapaj yanapawanchej. Chantapis imayna runachus kasqanchejta reparachiwanchej, sutʼimantaj orqhon imatachus yuyasqanchejta, imaynachus kasqanchejtapis. Bibliata estudiaspaqa, reparanchej Diosta munakusqanchejqa ruwasqasninchejpi sutʼi rikukunan kasqanta, manataj “Diosta munakuni” niyllachu kasqanta. Diosta munakunchej chayqa, Biblia nisqanman jina kausakunanchej tiyan.

²⁰ Bibliaqa Diospa Palabranpuni. Diosninchejqa munan Palabranta estudiananchejta, leenanchejta, munakunanchejta ima. Diosninchejta agradecekuna Bibliata qowasqanchejmanta, Bibliamantataj yachakunallapuni. Ajinamanta yachakusun imatachus Diosninchej runaspaj ruwayta munasqanta. Qhepan capitulopeqa chaymanta astawan yachakusunchej.