Jesuspa familian Jerusalenman rinku

Jehová Diosqa israelitasman kamacherqa Pascua fiestata sapa wata ruwanankuta. Chaytataj Jerusalenpi ruwaj kanku, qʼoñi tiempo qallarishajtin. Josej familian, familiaresninku, rejsisqasninkupis chay fiestaman sapa wata rej kanku (Deuteronomio 16:16). Nazaretmanta Jerusalenkamaqa may karuta purej kanku, 120 kilometrostapuni. Jesús 12 watayoj kashajtin, familianqa ajinata rinankupaj kusiywan wakichikusharqanku, mana tiempoyojtaj kasharqanku. Jesusqa chay fiestaman mayta riyta munaj. Imajtinchus chayman rispaqa Diospa templonta rikumoj.

Jesuswan familianwanqa mana uj diallapajchu Jerusalenman rej kanku. Imajtinchus Pascua fiestaj qʼayantinpacha, mana levadurayoj tʼanta fiesta qallarej. Chaytaj qanchis diasta ruwakoj (Marcos 14:1). Chay fiestaqa Pascua fiestawan ujchasqa kasharqa. Josewan familianwanqa, Nazaretmanta Jerusalenman rispa, iskay semanata chinkaj kanku. Jinapis chay kutipi aswan unaytaraj chinkarqanku.

Jerusalenmantaqa ashkha ukhu Nazaretman kutipoj kanku. Chayrayku Josewan Mariawanqa kutipushaspa yuyarqanku Jesusqa familiasninkuwan, rejsisqasninkuwan khuska rishasqanta. Jinapis uj diataña riytawan, chʼisinta samarinankupaj Jesusta maskʼarqanku, nitaj tarerqankuchu. Paykunaqa familiaresninkuta, rejsisqasninkutawan tapukorqanku. Manapuni tarispataj, Jerusalenman Jesusta maskʼaj kutirerqanku.

Chayaytawanqa uj día enterota maskʼarqanku, nitaj tarerqanku. Ni qʼayantinpis tarillarqankutajchu. Minchhantinraj Jesusta tarerqanku. Jesusqa templopi kashasqa, yachachejkunaj chaupinkupi tiyasqa. Payqa chay yachachejkunata uyarispa, tapurispa ima kashasqa. Paykunataj Jesuspa yachayninmanta mayta tʼukusharqanku.

Mariaqa Jesusta nerqa: “Wawáy, ¿imaraykutaj kayta ruwawaykuri? Tataykiwan may phutisqa maskʼashasuyku”, nispa (Lucas 2:48).

Jesustajrí piensarqa tatasnin yachasqankuta maypichus kashananta. Chayrayku nerqa: “¿Imaraykutaj maskʼashawarqankichej? ¿Manachu yacharqankichej Tataypa wasinpi kashanayta?”, nispa (Lucas 2:49).

Chantá Jesusta Nazaretman pusakaporqanku. Jesustaj paykunata kasukullarqapuni. Chantapis wiñashallarqapuni, astawan yachayniyojmantaj tukusharqa. Jovencitollaraj kajtinpis, Jesustaqa Diospis runaspis allinpaj qhawarqanku. Jesusqa wawamantapacha Diosta yupaychayta ñaupajman churaj, tatasnintapis jatunpaj qhawaj. Tukuypis paymanta yachakusunman.