2 YACHAQANA

Parlakusqanchejman jinalla parlay

2 Corintios 2:17

KAYPI YACHAKUNKI: Parlakusqanchejman jinalla tukuy sonqo parlariyta.

Sumajta wakichikunaykipaj Diosmanta yanapata mañakuy. Diosmanta mañakuy imamantachus yachachinayki kashan chaypi yuyanaykipaj. Ajinamantataj mana qanllapichu yuyanki. Chantapis imamantachus parlarinaykipi piensariy. Yachachishaspataj imamantachus parlashanki chayta kikin palabrasniykiwan sutʼinchay, amataj leeychu.

Bibliamanta chayri uj publicacionmanta leenayki kashan chayqa, imamantachus parlashasqanta sumajta yachanayki tiyan. Ajinamanta sumajta leerinki. Uj runaj nisqanta leenayki kajtenqa, chayta tukuy sonqo leeriy, imaynatachus parlakusqanchejman jinallataj.
Tukuy sonqo parlariy. Imaraykuchus uyarejkuna yachachisqaykita yachanankupuni kasqanpi piensariy. Ajinamantataj uyarejkunaqa reparanqanku imaynatachus parlasqaykipi, uyaykipi ima, paykunata yanapariyta munasqaykita.

Parlasqaykiman jinalla parlarejtiykipis, uyarejkunata jatunpaj qhawaspa parlariy. Imamantachus parlashasqaykita ama pisipaj qhawachiychu. Chayrayku allin kanman entiendekunanpaj jina sutʼita parlanayki.
Uyarejkunata qhawarispa parlariy. Uyarejkunata qhawarispa parlariyta atikun chayqa, ajinata ruwawaj. Discursota qoshaspaqa uyarisojkunamanta wakinta ratomanta rato qhawariypuni, amataj waj ladosta qhawaykachaspachu parlay.