8 YACHAQANA

Kikinchaykunawan yachachiy

Mateo 13:34, 35

KAYPI YACHAKUNKI: Imaynatachus kikinchaykunawan aswan sumajta yachachiyta atisqaykita runaj sonqonman chayanaykipaj. Yachakullankitaj uj kikinchaymanta mana tukuy imatapunichu sutʼinchanayki kasqanta.

¿IMAYNATÁ CHAYTA RUWAWAJ?

Entiendeyta atinapaj jina kikinchaykunawan yachachiy. Jesusqa mana entiendeyta atinapaj jina imasta, entiendeyta atinapaj jina kikinchaykunawan yachacherqa. Yachachishaspaqa imastachus kikinchayniykiwan yachachiyta munanki, chay imasllamanta parlariy, amataj waj imasmantaqa. Imamanta yachachishaspapis, chayman rijchʼakoj imaswan kikinchariy. Mana ajinata ruwajtiykeqa, mana entiendeyta atisonqankuchu.

Aswan sumajta kikinchaykunawan yachachinaykipajqa, maypi kashaspapis tukuy imata qhawariypuni, qhawarisqaykimanta imaschus tʼukuchisusqantataj anotakuy. Chantapis anotakullaytaj publicacionespi tarisqayki kikinchaykunata, sumajta yachachej hermanos ima kikinchaykunawanchus yachachisqankuta ima. Chay anotakusqaykitataj waqaychakuy.
Uyarejkunapi piensariy. Uyarejkuna imastachus rejsisqankuman jina, imastachus yachayta munasqankuman jinataj kikinchariy. Jinapis ama pʼenqachinapaj jina chayri phiñachinapaj jina kikinchaykunamanta parlaychu.
Imastachus uyarejkuna yachakunankuta munanki chay imasllamanta sutʼinchay. Kikinchayniykimantaqa mana tukuy imatapunichu sutʼinchanayki tiyan, manaqa imatachus sutʼinchayta munashanki chayllata. Uyarejkunaqa mana kikinchaynillaykitachu yuyarikunanku tiyan, manaqa imatachus chay kikinchaywan yachachisqaykitapis.