¿Imaynataj Dios?

Pillatapis astawan rejsispaqa, imaynachus kasqanta yachanchej, astawantaj munakunchej. Jehová Dioswanpis kikillantaj. Payta astawan rejsispaqa, imaynachus kasqanta yachasun, astawantaj munakusun. ¿Imaynataj Diosninchej? Payqa atiyniyoj, yachayniyoj, cheqan, munakuyniyojtaj.

DIOSQA ATIYNIYOJ

“Tukuyta Kamachej Señor Jehová Diosníy, qanmin jatun atiyniykiwan […] ruwarqanki kay jallpʼata, jinallataj cielotapis” (JEREMÍAS 32:17).

Diospa atiynintaqa tukuy ima ruwasqanpi rikunchej. Ruphaypi chukurejtinchej, intej kʼajayninta sientenchej. Intej kʼajaynintaj, Jehová Diospa atiyninmanta uj chhikitallan. Inteqa tʼimpushaj yakumanta 150 mil kutispiwan aswan qʼoñi. Sapa segundo intimanta llojsej kʼajayqa, may chhika bombaspa phatasqanwan kikinchakunman.

Jinapis intinchejqa waj estrellasmanta nisqa manchay juchʼuysitulla. Cientificosqa aswan jatun estrellata UY Scuti nispa sutichanku. Chay estrellataj intinchejmanta 1.700 kutispiwan aswan jatun. Chay estrellata intej cuentanmanta churasunman chayqa, mundonchejta pʼampaykunman, Júpiter nisqa planetatapis pʼampaykunmanraj. Chay planetaqa jallpʼanchejmanta may jina karupi kashanpis. Chayraykuchá profeta Jeremías nerqa: “Jehová Diosníy, qanmin jatun atiyniykiwan […] ruwarqanki kay jallpʼata, jinallataj cielotapis”, nispa.

Diosqa atiyninwan yanapawanchej. Manachus Diosninchej intita, kay jallpʼapi tukuy imatawan ruwanman karqa chayqa, mana kausay kanmanchu karqa. Diosqa sapa ujninchejta atiyninwan yanapawanchej. Ñaupa tiempopipis Jesusman atiyta qorqa milagrosta ruwananpaj. Bibliaqa Jesuspa milagrosninmanta nin: “Kunanqa ciegos rikunku, suchus puririnku, lepra onqoyniyojkuna sanoyachisqa kanku, joqʼaras uyarinku, wañusqas kausarimunku”, nispa (Mateo 11:5). Kay tiempopipis Diosqa “saykʼusqa kajta kallpachan”. “Jehová Diospi atienekojkunarí kallpata japʼenqanku” (Isaías 40:29, 31). Diosqa problemasninchejwan, llakiykunasninchejwan mana atipachikunapaj chayri aguantanapaj ‘sumaj atiyta’ qowasunman (2 Corintios 4:7). Diosninchej atiyninwan yanapawasqanchejta yachayqa, payman qayllaykuchiwanchej.

DIOSQA YACHAYNIYOJ

“Jehová Diosníy, ruwasqasniykeqa may chhika. Chay tukuy imastaqa allin yachayniykiwan ruwarqanki” (SALMO 104:24).

Diospa ruwasqasninta astawan rejsispaqa, may jina yachayniyojchus kasqanmanta tʼukunchej. Cientificosqa animalitosta, plantastawan estudianku, imastachus ruwasqankuta aswan sumajman tukuchinankupaj. Diospa ruwasqasninmanta yachakuspa, sumaj camarasta, avionesta, waj imastawan ruwanku.

Jinapis Diospa jatun yachaynintaqa cuerponchejpi astawan reparasunman. Imaynatachus uj wawita mamanpa wijsanpi wiñasqanmanta parlarina. Qharejtawan warmejtawan mujunku ujchaykukojtin, uj célula nisqaman tukun. Chay celulaqa manchay juchʼuysitu, chaypitaj wawitaj cuerpon imaynachus kanan qhelqasqa jina kashan. Chay juchʼuy celulaqa, pisimanta pisi ashkhaman tʼaqakun. Chantá sapa célula maychus tiemponpi uj jinaman tukun. Wakenqa yawarman tukunku, wakintaj ñojtuman, wakintajrí tullusman. Pisimanta pisitaj wawitaj sonqetun, pulmoncitusnin, waj imitasnin ima rikhuriyta qallarin. Jisqʼon killasllapitaj, chay juchʼuy celulaqa uj runitaman tukun. Wawita imaynatachus rikhurisqanta estudiajkunaqa, tʼukulla qhepakunku. Chayrayku paykunamanta wakenqa, Bibliata qhelqajkuna jinallataj ninku. Chaypi uj runa Diosman nerqa: “Diosníy, tʼukunapaj jina sumajta ruwawasqaykimanta jatunchayki”, nispa (Salmo 139:14).

Diosqa yachayninwan yanapawanchej. Diosninchejqa kusisqa kananchejpaj imatachus necesitasqanchejta yachan. May yachayniyoj kasqanrayku Palabrannejta yuyaychawanchej. Ujtaj kay kashan: “Tukuy sonqotaj perdonanakuychej” (Colosenses 3:13). Chay yuyaychayta kasukuy, ¿yanapawasunmanchu? Arí. Doctorespis ninku perdonayta yachajkunaqa sumajta puñusqankuta, nitaj presión altawan onqosqankuta. Perdonayta yachajkunaqa mana sinchʼita llakikunkuchu, nitaj anchata onqonkuchu. Diosqa uj tata jina noqanchejmanta llakikun, chayraykutaj yuyaychawanchej (2 Timoteo 3:16, 17). Chay jina kʼacha tatayoj kayta, ¿munawajcharí?

DIOSQA CHEQAN

“Jehová Diosqa justiciata munakun” (SALMO 37:28).

Diosqa cheqan kajtapuni ruwan. “Diosqa nipuni ima sajratapis ruwanmanchu. Tukuy Atiyniyoj Diosqa ni imarayku mana cheqan kajtaqa ruwanmanchu” (Job 34:10). Jehová Diosqa justiciata ni jaykʼaj qʼewinchu. Chayrayku Biblia paymanta nin: “Qanmin llajtasta maychus kajta juzganki”, nispa (Salmo 67:4). Diosqa “runaj sonqonta qhawan”. Chayrayku ni pi payta engañayta atinmanchu, justiciata ruwaspataj ni jaykʼaj pantanchu (1 Samuel 16:7). Diosqa yachan kay jallpʼapi mana cheqan ruwaykuna, sajra ruwaykunapis kasqanta. Niwanchejtaj “sajra runastajrí kay jallpʼamanta chinkachisqa kanqanku” nispa (Proverbios 2:22).

Jinapis Diosqa mana rumi sonqo juezchu, runasta castigaspa kusikunanpaj. Runas pesachikojtinku paykunata khuyakun. Biblia nin “Jehová Diosqa khuyakoj Dios, kʼacha sonqoyojtaj” kasqanta. Diosninchejqa may sajra runastapis khuyakun, sonqomantapacha pesachikunku chayqa. Payqa cheqan juezpuni (Salmo 103:8; 2 Pedro 3:9).

Diosqa cheqan kajta ruwaspa yanapawanchej. Apóstol Pedro nerqa “Diosqa tukuy runasta uj rejllata qhawasqanta. Payqa allinpaj qhawan mayqen nacionllamantapis payta manchachikojta, allin kajtataj ruwajta” (Hechos 10:34, 35). Diosqa tukuyta uj rejllata qhawan, tukuypajtaj justiciata ruwan. Tukuypis Diosman chimpayta, yupaychayta ima atinchej, imayna rijchʼayniyoj kajtinchejpis, may llajtamanta kajtinchejpis, mana escuelayoj kajtinchejpis, wajchas chayri qhapaj kajtinchejpis.

Diosqa imachus cheqan kasqanta yachananchejta munan. Chayrayku imachus allin, imatajchus mana allin kasqanta reparananchejpaj jina ruwawarqanchej. Bibliaqa nin sonqonchejpi uj leyta jina qhelqasqanta (Romanos 2:15). Sonqonchej sumaj yachachisqa kajtenqa, mana juchapi urmallasunchu. Pantanchej chaytaj, sonqonchejqa pesachikunapaj tanqawasun, sajra kajta manaña ruwanapaj ima. Diospa cheqan kayninta entiendespaqa aswan allinta kausakusun, paymantaj qayllaykusun.

DIOSQA MUNAKUYMIN

“Diosqa munakuymin” (1 JUAN 4:8).

Bibliaqa Diosninchej atiyniyoj, yachayniyoj, cheqan kajtataj ruwasqanta nin. Jinapis munakuynin aswan jatun kasqanta nin. Diosninchejqa imatapis atiyninwan ruwan. Chaytataj ruwan cheqan kayninman jina, yachayninman jinataj. Chay tukuy imastarí munakuyninrayku ruwan. Arí, munakuwasqanchejrayku tukuy imata ruwan.

Jehová Diosqa ni imata necesitajtinpis munakuyninrayku cielopi, jallpʼapipis tukuy kausajkunata ruwarqa. Ajinamanta wajkunapis pay jina kusisqas kanankupaj. Diosninchejqa kay jallpʼata runas kusisqas kausakunankupaj jina ruwarqa. Payqa munakullawanchejpuni. Imajtinchus “payqa sajra runaspaj, kʼacha runaspajpis intinta llojsichimun, cheqan runaspaj, mana cheqan runaspajpis parachimun” (Mateo 5:45).

“Jehová Diosqa manchay munakuyniyoj, khuyakuyniyojtaj” (Santiago 5:11). Payta rejsiyta munajkunata munakun. Diosninchejqa sapa ujninchejta sumajta rejsiwanchej. “Payqa mana karupichu kashan sapa ujninchejmanta” (Hechos 17:27).

Diosqa munakuwanchej. Intita yaykushajta rikuspa, uña wawitata asirejta rikuspapis kusirikunchej. Familianchej munakuwasqanchejta yachaspapis kusikullanchejtaj. Mana chay imas kajtin kausayta atillasunman chaypis, chay imasqa sonqonchejta qhallallarichin.

Diosninchej munakuwasqanchejtaqa orakuyta atisqanchejpi reparallasunmantaj. Biblia niwanchej: “Ama imamantapis llakikuychejchu. Astawanpis tukuy imapaj Diospa yanapayninta mañakuychej. Paymantaqa tukuy sonqo mañakuychej, rogakuspa, graciasta qospataj”, nispa. Tatanchej Jehovaqa munakuwanchej, niwanchejtaj tukuy llakiyninchejta payman willakunanchejta. Chayta ruwajtinchej, payqa sonqo tiyaykuyninta qonawanchejta nin, “mayqentachus runas mana entiendeyta atinkuchu chayta” (Filipenses 4:6, 7).

Kaykamaqa Diospa atiyninmanta, yachayninmanta, cheqan kayninmanta, munakuyninmanta ima parlarqanchej. Payta astawan rejsiyta munaspaqa, kay revistata leerillaypuni. Yachakunkitaj imatachus Diosninchej qanpaj ruwasqantaña, imatachus qhepaman ruwananta ima.