¿Imatataj runas yuyanku? Wakin kuteqa wajkunata sajra ñawiwan qhawanchej mana allinta yachaspa. Imastachus runas yuyasqankuta qhawarina:
Wakin patronesqa pantanku, warmis wakin trabajosta mana ruwayta atisqankuta nispa.
Ashkha runasqa ninku campo runas mana trabajasqankuta, borrachostaj kasqankuta.
Ashkha runasqa creenku, mana sano runas kajkunaqa llakisqalla, phiñasqallataj kausakusqankuta.
Chay jina cuentosta creej runasqa, chaykunata valechinku wajkunata sajra ñawiwan qhawanankupaj. Mana paykuna jina yuyajkunatataj, sajra ñawiwan qhawanku.
Biblia niwanchej “Mana allinchu mana yachayniyoj kanaqa” ( PROVERBIOS 19:2 ).
¿Ima niyta munan? Mana allinta yachaspaqa pantaykusunpuni. Wajkuna cuentawasqallanchejta kasuspa, nitaj imaynapunichus kasqanta yachaspaqa, wajkunata sajra ñawiwan qhawasun.
¿Biblia ninchu wajkunata sajra ñawiwan qhawanata? Wakin runasqa ninku Biblia chayta nisqanta. ¿Imatataj Biblia nin?
Tukuy runas uj tatayojlla kanchej. Diosqa “uj runallamanta tukuy laya runasta miracherqa” (Hechos 17:26 ).
Diosqa tukuyta uj rejllata qhawan. Diosqa “allinpaj qhawan mayqen nacionllamantapis payta manchachikojta, cheqa kajtataj ruwajta” (Hechos 10:34, 35 ).
Diosqa sonqonchejta qhawan, nitaj rijchʼaynillanchejtachu. ‘Runaqa ñawisnimpa rikusqallanta qhawan, noqa Jehová Diosrí mana runa jinallachu qhawani, manachayqa sonqota qhawani’ (1 Samuel 16:7 ).
Allinta yachay yanapawanchej Pillatapis allinta rejsispaqa, paymanta llullasta parlasqankuta mana creellasunchu. Imastachus uj grupo runasmanta niwasqanchej llulla kasqanta yachaspaqa, nillataj creesunchu imatachus waj grupo runasmanta niwasqanchejtapis.
Experiencia: Yovitsa (Europa ladomanta) Yovitsamantaqa ñaupaj yachaqanapi parlarerqanchejña. Payqa wawamantapacha uyarerqa, chay waj grupo runasmanta vecinosnin, noticiaspi, telepi ima mana allin imasta parlasqankuta. Pay nin: “Chay runastaqa sajra ñawiwan qhawaj kani, chejnikojtaj kani. Yuyarqanitaj mana qhasichu ajina sientekusqayta.
”Chaywanpis cuartelpi kashaspaqa, chay grupomanta kaj soldadoswan tiyakunay karqa. Tiempo pasasqanman jinataj aswan allinta paykunata rejserqani. Chantapis parlayninkuta yachakorqani, takiykunasninkutapis. Paykunawan kaspaqa kusisqa kasharqani, niñataj paykunata chejnikorqanichu. Jinapis chay runasta watejmanta chejnikuyta qallarillaymantaj karqa. Chayrayku paykunamanta mana allin parlaj noticiastaqa mana uyarinichu, nitaj qhawanichu paykunamanta asikunankupaj parlaj peliculasta, waj programastapis. Wajkunata sajra ñawiwan qhawaspaqa, chejnikuyta, phiñakuyta ima qallarisunman”, nispa.
¿Imatá ruwasunman? Uj lugarmanta uj runalla mana allin imasta ruwajtenqa, ama yuyanachu tukuy ajina kasqankuta.
Mana tukuy imatapunichu wajkunamanta yachasqanchejta yuyarikuna.
Mana pejpa nisqantapis creenallachu.