LECCIÓN 29
¿Wañupojtinchej imanchejpis kausashaj qhepakunchu?
Familianchejmanta pillapis wañupojtenqa sonqonchej mayta nanawanchej. Chayrayku ichá tapukunchej: “¿Maypitaj kashanman? ¿Paywan watejmanta tinkukapuymanchu?”, nispa. Bibliaqa chay tapuykunaman kutichiwanchej. Kay leccionpi, qhepan leccionpipis imachus wañusqaswan kasqanmanta yachakusun.
1. ¿Wañusqas imatapis yachankuchu?
Biblia nin: “Wañusqastaj ni imata yachankuchu”, nispa (Eclesiastés 9:5 leey). Chayrayku Jesusqa wañuyta puñuywan kikincharqa. Chanta, ¿imaraykutaj wañuyta puñuywan kikincharqa? Imaraykuchus uj runa wañusqata puñurparin chayqa, imachus muyuyninpi kashasqanta mana yachanchu. Ajinallataj wañusqaswanpis, paykunaqa mana nanayta sientenkuchu, nitaj imaynamantapis sufrishankuchu.
2. ¿Imachus wañusqaswan kasqanta yachay yanapawasunmanchu?
Ashkha runasqa wañuyta, wañusqastapis manchachikunku. Jinapis Bibliaqa willawanchej imachus wañusqaswan kasqanta. Chayta yachaytaj sonqo tiyasqa kanapaj yanapawanchej. Jesús nerqa: “Cheqa kajtaj kacharichisonqachej”, nispa (Juan 8:32). Wakin religionespeqa yachachinku wañupojtinchej almanchej llojsipusqanta. Jinapis Bibliaqa mana chaytachu yachachin. Uj runa wañupun chayqa mana sufrishanchu, nitaj imatapis yachanchu, nillataj pitapis castiganchu. Chayrayku wañusqaspaj rezachisqanku chayri ima costumbrestapis ruwasqankoqa qhasillaña.
Wakin runas ninku wañusqaswan parlayta atisqankuta. ¿Ajinapunichu kanman? Mana. Wañusqaswan parlasqankuta nejkunaqa demoniosllawan parlashanku. Imaraykuchus demoniosqa wañupoj runasmanta pasachikuyta atinku. Jehová Diosqa mana munanchu wañusqaswan parlayta munaspa, ni ima layqerio imasman chhapukunata. Chayta ruwayqa llakiyllaman chayachiwasunman (Deuteronomio 18:10-12 leey). Bibliapi niwanchej wañusqasqa ni imata yachasqankuta. Chayta yachaytaj demonioswan mana engañachikunapaj yanapawanchej.
ASTAWAN YACHAKUNA
Kaypi astawan yachakusun Biblia imatachus wañusqasmanta nisqanta, Diosninchej wañusqasta mana sufrichisqanta. Yachakullasuntaj munakuyniyoj Jehová Diospi atienekunata.
3. Wañupojtinchejqa ni imanchej kausashaj qhepakunchu
Ashkha runasqa wañusqaswan imachus kasqanmanta tukuy imata creenku. Jinapis chayqa mana jinachu.
Uj runa wañupojtin, ¿imatá niyta yachanku lugarniykipi runas?
Imatachus Biblia wañusqasmanta nisqanta yachanapaj, VIDEOTA qhawariychej.
Eclesiastés 3:20 leeriychej, chantá yachakojta tapuriy:
¿Imataj wañusqaswan pasaj kasqa?
Uj runa wañupojtin, ¿nisunmanchu alman chayri espiritun llojsipusqanta?
Bibliapi willawanchej Jesuspa munasqa amigon Lázaro wañupusqanta. Jesustaj nerqa amigon puñushallasqanta. Juan 11:11-14 leeriychej, chantá yachakojta tapuriy:
¿Imawantaj Jesús wañuyta kikinchasqa?
¿Imaraykutaj Jesús nerqa wañusqas puñushallasqankuta?
¿Biblia imatachus wañusqasmanta nisqanpi creenkichu?
4. Imachus wañusqaswan kasqanta yachayqa kacharichiwanchej
Bibliapi willawanchej imachus wañusqaswan kasqanta. Chayta yachaspataj niña wañusqasta manchachikunchejchu. Eclesiastés 9:10 leeriychej, chantá yachakojta tapuriy:
¿Wañusqas imatapis ruwawasunmanchu?
Imachus wañusqaswan kasqanta yachaspaqa, niña wañusqaspaj ima costumbretapis ruwanchejchu, nitaj paykunapaj responsostapis churachinchejchu. Isaías 8:19; Apocalipsis 4:11 leeriychej, chantá yachakojta tapuriy:
¿Jehová Dios allinpajchu qhawanman wañusqaspaj ima costumbretapis ruwajtinku chayri almasmanta yanapata mañakojtinku?
Imachus wañusqaswan kasqanta yachayqa, Jehovaj chejnisqan costumbresta mana ruwanapaj yanapawanchej.
5. Imachus wañusqaswan kasqanta yachayqa sonqochawanchej
Runasqa ninku uj runa kausashaspa sajra imasta ruwan chayqa wañuspa ñakʼarinanta. Bibliatajrí mana chaytachu yachachin. Imachus wañusqaswan kasqanta yachayqa sonqochawanchej. Imaraykuchus wañusqasqa kausashaspa sajra imasta ruwarqanku chaypis mana sufrishankuchu. Romanos 6:7 leeriychej, chantá yachakojta tapuriy:
¿Imatá kay versiculopi niwanchej? Jina kajtin, ¿nisunmanchu sajra imasta ruwajkuna wañuspa sufrishasqankuta?
Jehová Diosta sumajta rejsispaqa, sutʼita reparanchej payqa wañusqasta mana ñakʼarichishasqanta. Deuteronomio 32:4; 1 Juan 4:8, leeriychej, chantá yachakojta tapuriy:
¿Imaynataj Diosninchej kasqa? Jina kajtin, ¿wañusqa runasta ñakʼarichinmanchu?
¿Imachus wañusqaswan kasqanta yachay sonqochawanchejchu? ¿Imaraykú chayta ninki?
WAKIN RUNAS NINKU: “Alma castiganawanta manchachikuni”, nispa.
Ajinata nisojkunaman, ¿Bibliamanta ima versiculostataj rikurichiwaj?
¿IMASTÁ YACHAKUNCHEJ?
Kaypi yachakunchej uj runa wañupun chayqa jallpʼaman tukupusqanta. Chantá yachakullanchejtaj wañusqasqa mana sufrishasqankuta, nitaj pitapis castigasqankuta.
Yuyarikunapaj
¿Wañusqas imatapis yachankuchu?
¿Imachus wañusqaswan kasqanta yachay yanapawasunmanchu?
¿Imachus wañusqaswan kasqanta yachay sonqochawanchejchu?
ASTAWAN YACHAKUNAYKIPAJ
¿Bibliapi alma palabra ima niytataj munan? Chayta yachanaykipaj kayta leeriy.
“¿Imataj alma?” (Chaytaqa Internetpi jw.org nisqapi tarinki)
Jehová Dios sajra runasta, ¿infiernopichu castigan? Chayta yachanaykipaj kay videota qhawariy.
¿Almasta manchachikunachu kanman? Chayta yachanaykipaj kayta leeriy.
Wañupuqpa espiritun ¿Pitapis yanapanchu?, chayri ¿ñakʼarichinchu? ¿Kanpunitaqchu? (Folleto)
Uj runataqa mayta kallpacharqa imachus wañusqaswan kasqanta yachay. Paymanta yachanaykipaj kayta leeriy.
“Biblia sutʼita, maychus kajtataj nisqan tʼukuchiwarqa” (Torremanta Qhawaj, 1 de febrero de 2015)