Ashkha kapuyniyojkunaqa pisi kapuyniyojkunata yanaparinku

Jehovaj testigosnenqa 200 kuraj nacionespi Diosmanta willashanku, llakiypi rikhurej hermanosninkutapis yanaparinku. Chaykunamanta 35 nacionespi kaj sucursalesqa, chay lugarpi tiyakoj hermanospa churasqanku qolqesitunkuwan pagakun tukuy gastosninkuta. Wakin nacionespirí, ¿maymantá qolqeta orqhonku hermanosninkuta yanapanankupaj?

Diospa Llajtanta Kamachejkunaqa mundontinmanta testigos imastachus necesitasqankuta qhawaykurinku Jehovata yupaychanallankupajpuni, hermanospa churasqanku qolqesitunkutapis allin yuyaywanpuni apaykachanku. Sichus uj sucursalpi hermanospa churasqanku qolqesitunkumanta puchun chayqa, waj sucursalman apachinku. Kaytaqa ruwakun ñaupa cristianos ruwasqankuman jina. Paykunaqa kapusqankuwan pisichikoj hermanosta yanaparerqanku, “ajinamanta ni piman imapis pisinanpaj” (2 Corintios 8:14).

Uj sucursalpa yanapayninta japʼispa, ¿imayná sientekunku qolqesitumanta pisichikoj hermanosninchej? Kusisqas kashanku. Tanzania nacionpeqa casi tukuy runas pisi qolqellawan kausakunku. Waj sucursalesmanta apachimusqanku qolqesituwanqa, Mafinga congregacionpa Tantakuna Wasita allincharqanku. Chay congregacionmanta hermanostaj nerqanku: “Tantakuna Wasita allinchasqankumantapacha, aswan ashkha runas tantakuyman jamushanku. Chayrayku Jehovaj llajtanta, mundontinmanta hermanostapis maytapuni agradecekuyku qolqesitunkuwan yanapariwasqaykumanta. Kunanqa may kʼachitu kashan Tantakuna Wasiyku”, nispa.

Coronavirus onqoy kasqanrayku Sri Lanka llajtapeqa wakin hermanospa mikhunanku pisiyarqa. Paykunamanta ujnin karqa hermananchej Imara Fernando, wawan Enosh ima. Waj suyusmanta hermanos qolqesituta apachimusqankuwan paykunata yanaparerqanku. Paykunataj uj tarjetitata ruwaspa kayta escriberqanku: “Maytapuni agradecekuyku tukuy hermanosta kay llakiy tiempopi munakuywan yanapariwasqaykumanta. Jehová Diosmanta mañakushallaykupuni kay qhepa pʼunchaykunapi tukuy hermanosta yanapanallanpajpuni. Diospa llajtanpi kasqaykumanta mayta kusikuyku”.

Hermanosqa maymanta kaspapis tukuy sonqo kapuyninchejwan yanapakunchej. Hermananchej Imaraj wawan Enoshqa uj cajitata ruwakorqa qolqesitunta tantananpaj, ajinamanta pisichikoj familiasta yanapananpaj. Hermananchej Guadalupe Alvarezpis qorikuyta yachallantaj. Payqa Mexicoj uj llajtitanpi tiyakun, chay lugarpi yaqha tukuy mana sueldoyojchu kanku, mashkha runaslla pisita ganakunku. Jinapis payqa tukuy atisqanta ruwan qolqesitunwan hermanosta yanapananpaj. Guadalupe nin: “Churakusqay qolqesituy pisilla kajtinpis waj hermanospa churasqankuwan tantaykuspaqa ashkha ruwakun, chay qolqewantaj pisichikoj hermanosta yanapakun. Jehovaman mayta agradecekuni munakuyniyoj, kʼachataj kasqanmanta”, nispa.

Uj sucursalqa kusiywan qolqesituta apachinku waj sucursalta yanapanankupaj. Brasil Sucursalta Kamachejkunamanta Anthony Carvalho hermanonchej nin: “Noqaykutapis ashkha watasta waj sucursales qolqesitunkuwan yanapawarqayku. Ajinata yanapawasqaykuwanqa Diospa llajtan astawan wiñarqa. Kunanqa noqaykupis atiykuña qolqesituykuwan waj sucursalesta yanapayta. Hermanospis sutʼita reparanku mundontinpi predicana kasqanta, chayrayku paykunapis Cristoj discipulosnin kasqankurayku qolqesitunkuta churaspa yanapakushallankupuni”, nispa.

¿Imaynatá pisichikuypi tarikoj hermanosta yanapasunman? Tantakuna Wasinchejpi “Jallpʼantinpi willakunanpaj” nisqa cajitaman qolqesitunchejta churaspa, manachayrí Internetpi donate.jw.org nisqaman apachisunman. Qolqesitunchejwan yanapakusqanchejqa Jehovapaj may valorniyoj.