Pisi imasllawan kausakuyta ajllarqayku

Madianwan Marcelawanqa Colombiapi Medellín llajtapi tukuy ima patapi kausakorqanku. Madianqa sumajta ganaj, chayrayku uj kʼachitu apartamentopi tiyakorqanku. Paykunaqa Jehovaj testigosnin kanku, 2006 watapitaj uj pʼunchaypaj jatun tantakuyman rerqanku. Chay tantakoyqa sutikorqa “Mantengamos el ojo sencillo”. Chay tantakuyta uyarispataj, imatachus kausayninkuwan ruwashasqankupi piensarerqanku. Paykunaqa ninku: “Ashkha discursospi parlarimorqanku Jehovata aswan sumajta sirvinapajqa pisi imasllawan kausakuna kasqanta. Asamblea tukukuyta repararqayku mana chaytachu ruwashasqaykuta. Noqaykoqa tukuy imata rantillaj kayku, ashkha manuyojtaj karqayku”, nispa.

Madianwan Marcelawanqa chay jatun tantakuypi repararqanku cambiananku kasqanta. Chaymantapachataj pisi imasllawan kausakuyta qallarerqanku. Paykuna ninku: “Gastosniykuta pisiyacherqanku, aswan juchʼuy apartamentoman riporqayku, autoykuta venderqayku, uj mototataj rantikorqayku”, nispa. Chantapis manaña jatuchaj tiendasman rejchu kanku, mana imatapis rantiyta munanankupaj. Runasman predicanankupajpis astawan tiempochakorqanku. Jehovata tukuy sonqo sirvej precursores especialeswantaj amigos ruwakorqanku.a

Pisi tiemponman Madianwan Marcelawanqa astawan yanapakuyta munaspa, campopi uj juchʼuy congregacionman riporqanku. Chay congregacionqa yanapata necesitasharqa. Chaypajtaj Madianqa trabajonmanta llojsiporqa. Jefanqa yuyarqa locoyapushasqanta. Chayrayku Madianqa entiendechikuyta munaspa payta tapurerqa: “Ashkha qolqeta ganaspapis, ¿kusisqachu kanki?”, nispa. Jefantaj nisqa mana kusisqachu kasqanta, astawanpis ashkha problemasniyoj kasqanta, nitaj allinchayta atisqanta. Madiantaj nisqa: “Kausayninchejpeqa mana ashkha qolqeta ganaychu aswan importante, manaqa imachus kusichiwasqanchejta ruway. Noqatawan señoraytawanqa runasman Diosmanta yachachiy astawan kusichiwayku. Chayraykutaj chayta ruwanaykupaj astawan tiempochakuyta munayku”, nispa.

Madianwan Marcelawanqa may kusisqapuni kashanku, imaraykuchus paykunapajqa Diosta sirviy kausayninkupi aswan importante. Paykunaqa 13 watastaña Colombiaj noroeste lugaresninpi, yanapata necesitaj congregacionespi yanapakushanku. Kunantaj paykunapis precursores especiales kanku.