2 rakʼiy
Jallpʼapi manaña ñakʼariy kaptin
1, 2. ¿Imaynatá wakin runas kawsaymanta yuyanku?
CHAYWANPIS, may chhika runas jukjinata yuyanku. Imaraykuchus, juk sumaq kawsayta suyanku. Maypichus, saqra kawsay, ñakʼariypis manaña kananta. Paykunaqa, saqra ruwaykuna juk chhikamantawan chinkananta, musuq allin kawsay kananta ima, suyallankutaq. ¡Chantapis, chay musuq kawsaypijinaña, kawsayta qallarichkasqankuta ninku!
2 Chay runasqa, chay musuq pachapi manaña jatuchaq maqanakuykuna, saqra ruwaykuna, mana chiqan ruwaykuna, nitaq wakchayay kananta, yuyanku. Chantapis, chay mu suq kawsaypiqa, manaña unquykuna, nanay, waqay nitaq wañuypis kanqachu. Chay musuq kawsaypi runaqa, pisimanta pisi juntʼa runaman tukunqa, wiñay wiñaypaqtaq, paraíso Jallpʼapi tiyakunqanku. Arí, ¡wañusqaspis kawsarimunqanku, wiñaypaqtaq kawsayta atinqanku!
3, 4. ¿Imaraykutaq chay runas, yuyasqankupi atienekunku?
3 Chay sumaq kawsaypi tʼukuriyqa, ¿musqhuyllachu kanman? Mana. Imaraykuchus, paykunaqa, chay Paraíso chayamunanpipuni iñinku (Hebreos 11:1). Chantá, ¿imaraykutaq jinata atienekunku? Tukuy atiyniyuq Ruwawaqninchik qunawanchikta nisqanrayku.
4 Diospa nisqanmanta, Biblia nin: “Tata Diosqa imatachus nerqa qonasuykichejta, chay allin imasta juntʼasqanta. Ni ima nisqampis qhepakunchu mana juntʼakuspaqa”. “Diosqa mana wañoj runa jinachu llullakunampaj [...] Nin chayqa, manachu ruwanqa? Parlan chayri, manachu juntʼanqa?” “Tukuy Atiyniyoj Tata Dios juraspa nillantaj: Cheqamanta imatachus yuyasqayqa juntʼakonqapuni, imastachus nisqasniypis ruwakonqapuni”, nispa (Josué 23:14; Números 23:19; Isaías 14:24).
5. ¿Ima tapuykunamantaq kutichikunqa?
5 Chaywanpis, Dios, mana ñakʼariyniyuq paraíso kananta munarqa chayqa, ¿imaraykutaq ñakʼariykuna kananta saqirqa? ¿Imaraykutaq suqta waranqa watataña saqra kaqta chinkachinanpaq suyanrí? Kay chhika watasña ñakʼariy kasqan, ¿manachu Dios, mana munakuwasqanchikta chayri mana kasqanta rikuchiwanchik?