LECCIÓN 05
Bibliaqa Diospa Palabranpuni
Diosqa Biblianejta parlariwanchej. Chayrayku Bibliaqa paymanta uj sumaj regalo. Jinapis ichá nishanki: “¿Imaynapí Biblia rikhurerqa? ¿Pitaj Bibliata ruwarqa?”, nispa. Chayta yachanapaj kay leccionta sumajta estudiarina.
1. ¿Imaraykutaj ninchej Biblia Diospa Palabranpuni kasqanta?
Imaraykuchus Bibliata qhelqajkunaqa, Diospa yuyayninta qhelqarqanku manataj paykunaj yuyayninkutachu. Chayrayku Biblia nin: “Runas espíritu santowana yuyaychasqa kaspa Diospa sutinpi parlarqanku”, nispa (2 Pedro 1:21). Arí, Diosqa espíritu santonnejta runasman willarqa imatachus Bibliapi qhelqanankuta (2 Timoteo 3:16). ¿Imaynatá chayta yachanchej? Bibliataqa 40 runas jina qhelqarqanku. Chay qhelqajkunamanta wakenqa escuelayoj, qhapajkuna, campo runas ima karqanku. Chantapis Bibliaqa 66 librosniyoj, 1.600 wataspi jinataj qhelqakorqa. Qallarikorqa Jesús niraj jamushajtin, 1513 watapi. Tukukorqataj 98 watapi Jesús jamusqanmanta qhepaman. Chay chhika unaypi 40 runas qhelqajtinkupis, enteron Bibliapeqa uj yuyaylla kashan. Chayrayku nisunman Bibliaqa Diospa Palabranpuni kasqanta (1 Tesalonicenses 2:13 leey).
2. ¿Pikunatataj Biblia yanapanman?
Bibliaj sumaj willaykunasnenqa yanapanman ‘tukuy nacionesta, tukuy ayllusta, tukuy laya parlayniyojkunata, tukuy laya runastapisʼ (Apocalipsis 14:6 leey). Chayrayku Diosqa, Palabranta may chhika parlaykunapi churachin. Ni mayqen libropis Biblia jinaqa chay chhika parlaykunapi kanchu. Casi tukuy runas maypi tiyakuspapis, ima parlayniyoj kaspapis, Bibliayoj kayta atinku.
3. ¿Imatataj Jehová Dios ruwarqa Biblia mana chinkananpaj?
Jehovaqa mana saqerqachu Palabran chinkananta. Bibliataqa animalespa qarankupi chayri papiro plantamanta ruwasqa hojaspi escriberqanku. Chaykunataj tiempowan maukʼayaporqanku, thantakaporqankutaj. Jinapis ashkha runasqa Bibliata jatunpaj qhawasqankurayku ashkha copiasta ruwarqanku. Paykunaqa sumajsituta copiarqanku. Atiyniyoj runas Bibliata chinkachiyta munajtinkupis, wakin runasqa kausayninkuta wañuy pataman churaspa Bibliata pakarqanku. Biblia nin: “Diosninchejpa palabrantajrí wiñaypaj”, nispa (Isaías 40:8).
ASTAWAN YACHAKUNA
Kaypi yachakusun imaynatachus Jehová Dios Bibliata ruwachisqanta. Yachakullasuntaj imatachus ruwasqanta Biblia mana chinkananpaj, tukuy runaspatataj kapunanpaj.
4. Bibliallataj willawanchej pichus Bibliata ruwachisqanta
VIDEOTA qhawariychej, chantá 2 Timoteo 3:16 leeriychej. Chaymantataj yachakojta tapuriy.
Bibliata runaslla qhelqajtinkupis, ¿imaraykutaj Diospa Palabran kasqanta ninchej?
¿Diospunichu Bibliata runaswan qhelqachinman karqa?
Patronqa trabajadorninta nin, cartapi imatachus escribinanta. Chayrayku chay cartaqa patronpata, manataj trabajadorninpatachu. Bibliawanpis kikillantaj. Runas escribejtinkupis, Bibliapeqa Diospa yuyaynin kashan.
5. Bibliata chinkachiyta munajtinkupis kunankama kashallanpuni
Bibliaqa Diospa Palabranpuni. Chayrayku payqa mana chinkachinankuta saqerqachu. Unaymantapachaña ashkha gobiernos Bibliata chinkachiyta munarqanku. Iglesiaspi yachachejkunapis mana munarqankuchu runas Bibliata leenankuta. Jinapis ashkha runasqa paykunata mana manchachikuspa, Bibliata pakarqanku. Wakenqa kausayninkutapis wañuy pataman churarqanku. Paykunamanta ujninta rejsinapaj VIDEOTA qhawariychej, chantá yachakojta tapuriy:
¿Imatataj wakin runas ruwasqanku Bibliata jatunpaj qhawasqankurayku? Chayta yachaspa, ¿manachu Bibliata astawan leeriyta munanchej?
Salmo 119:97 leeriychej, chantá yachakojta tapuriy:
Kay versiculopi nisqanman jina, ¿imaraykutaj ashkha runas kausayninkuta wañuy pataman churasqanku?
6. Bibliataqa tukuy runas leeyta atinku
Bibliaqa ni mayqen libro jina may chhika parlaykunapi kashan, casi tukuy runaspatataj tiyapun. Hechos 10:34, 35 leeriychej, chantá yachakojta tapuriy:
¿Imaraykutaj Dios munan Palabran ashkha parlaykunapi kananta?
¿Imataj Bibliamanta astawan tʼukuchisunki?
Mundontinmanta casi
tukuy runas
Bibliata parlayninkupi leeyta atinku.
Enteron Biblia chayri wakin librosnillan
3 mil
kuraj parlaykunapi tiyan.
5 mil millones
Bibliasña kunankama imprimikun.
Ni mayqen libropis chay chhikata imprimikunchu.
WAKIN RUNAS NINKU: “Bibliaqa runaspa ruwasqallan. Chantapis may unayniyoj”, nispa.
¿Ajinapunichu kanman, imatá qan niwaj?
¿Imaraykutaj ninchej Bibliaqa Diospa Palabranpuni kasqanta?
¿IMASTÁ YACHAKUNCHEJ?
Kaypi yachakunchej Bibliaqa Diospa Palabranpuni kasqanta. Diosqa Biblia kapunawanchejpaj mana chinkachinankuta saqerqachu.
Yuyarikunapaj
¿Imaraykutaj ninchej Biblia Diospa Palabranpuni kasqanta?
¿Imaynapitaj Biblia kunankama kashallanpuni? ¿Imatá niwaj Biblia ashkha parlaykunapi kasqanmanta, may chhika Biblias imprimikusqanmantawan?
Diosninchej Bibliata qhelqachipuwasqanchejta yachay, ¿kusichiwanchejchu?
ASTAWAN YACHAKUNAYKIPAJ
Biblia kunankama kapunawanchejpaj imastachus ruwakusqanta yachanaykipaj kayta leeriy.
“¿Imaraykutaj Biblia kunankama tiyan?” (¡Despertad!, noviembre de 2007)
Ashkha runas Bibliata chinkachiyta munajtinkupis, imaraykuchus mana chinkachiyta atisqankuta yachanaykipaj kayta leeriy.
“Bibliaqa kunankama kashallanpuni” (Torremanta Qhawaj, 4 kaj 2016)
Biblia waj parlaypi kananpaj imastachus wakin runas ruwasqankuta yachanaykipaj kay videota qhawariy.
Bibliamantaqa ashkha copiasta ruwarqanku, ashkha parlaykunamantaj churarqanku. Chayta ruwashaspa, ¿Bibliaj nisqanta cambiankumanchu karqa? Chaypaj kayta leeriy.
“Bibliapi qhelqakusqan, ¿kikillanpunichu?” (Chaytaqa Internetpi jw.org nisqapi tarinki)
a Espíritu santoqa Diospa kallpan chayri atiynin. Chaymanta astawan yachakusun 07 leccionpi.