YANAPA C
¿Imaynatá Wiñaypaj kusisqa kausakuy librowan yachachisunman?
Wiñaypaj kusisqa kausakuy librota wakichishaspaqa hermanosninchej ashkhata mañakorqanku, sumajtataj tʼukurerqanku ima yachachiykunatachus chay libroman churanankupi. Chay librowan estudioykita sumajta yanapanaykipajqa, kay urapi rikhurej yuyaychaykunaman jina ruway.
Niraj estudiachej rishaspa
1. Sumajta wakichikuy. Estudioyki imapichus yanapanata necesitasqanpi, imaynachus kausaynin kasqanpi, imapichus creesqanpi ima piensariy. ¿Imatachus estudiankichej chayta entiendeyta atillanqachu? ¿Chayman jina ruwaytapis atillanqachu? “Astawan yachakunaykipaj” nisqapi rikhurej yachaqanasta, videostapis qhawariy, piensariytaj imaynatachus chaykuna estudioykita yanapananpi. Ajinamanta estudiashajtiykichej chay yachaqanaswan, chay videoswan estudioykita yanapayta atinki.
Estudiachishaspa
2. Estudiayta qallarinaykichejpaj, tukuchanaykichejpajpis uj oracionta ruway. Jinapis estudioyki mana munajtenqa ama oracionta ruwaychu.
3. Ama anchata parlaychu. Estudiashankichej chay leccionpi imamantachus parlakushan chayllamanta parlay, estudioyki parlarikunantataj saqey.
4. Uj kaj, iskay kaj, kinsa kaj chayri tawa kaj nisqa tʼaqasta qallarishaspaqa, “Kaypi yachakusun” nispa qallarishan chay oracionta leeriy, chantá chay tʼaqamanta wakin leccionespa titulosninta willariy.
5. Uj kaj, iskay kaj, kinsa kaj chayri tawa kaj nisqa tʼaqata tukuytawan, “Yuyarikunapaj” nisqawan yanapachikuy estudioyki yachakusqanta yuyarikunanpaj.
6. Estudioykiwan sapa leccionta estudiashaspaqa kayta ruway:
Khuska leeriychej.
Wakin versiculospa ladonpi “leey” chayri “leeriychej” nishan, chay versiculosta tukuyninta leeriychej.
Necesitakojtenqa leccionpi rikhurej waj versiculostapis leerillawajchejtaj.
“VIDEOTA qhawariychej” nejtintaj chaypi rikhurej videota qhawariychejpuni (chayta ruwaychej video kapusojtin).
Tukuynin tapuykunasta ruway.
“Astawan yachakuna” nisqapi rikhurej dibujosmanta, fotosmanta parlariychej.
“Tarea” nisqa recuadrowan yanapachikuy estudioyki ñauparishasqantachus manachus reparakunanpaj. Chantapis Diosta yupaychaypi imastachus ruwananpi piensarinanpaj yanapariy. Ichapis “Tarea” nisqa recuadropi nisqanta ruwanman chayri waj imata ruwanman.
Estudioykita tapuriy: “Kay leccionta wakichikushajtiyki ‘Astawan yachakunaykipaj’ nisqamanta, ¿mayqen yachaqanataj chayri mayqen videotaj astawan gustasorqa?”, nispa.
Sapa estudiaspaqa uj leccionta tukunaykichejkama estudianaykichejpaj kallpachakuy.
Estudiachiytawan
7. Estudioykipi piensarillaypuni, Jehovamantataj mañakuy estudioyki ñauparinallanpajpuni, mañakullaytaj yachayta qosunanta estudioykita yanapanaykipaj.