¿Pitaj Diosta ruwarqa?

Uj tataqa qanchis watitayoj wawanman kayta nin: “Diosqa may jina unayña kay Jallpʼanchejta, imachus kay Jallpʼapi kajtawan ruwarqa, chantapis intita, killata, chʼaskasta ima ruwallarqataj”, nispa. Wawaqa tʼukulla qhepakun, chantá tatanta tapurin: “Tatáy, ¿pitaj Diosta ruwarqa?”, nispa.

Tatantaj nin: “Ni pí waway, Payqa unayñapuni karqa”, nispa. Wawaqa chaywan kusisqa qhepakun. Jinapis wiñasqanman jinaqa, imaynachus chay kasqanta yachaytapuni munan. Imajtinchus payqa yuyan ni pi jinallamanta rikhuriyta atisqanta. ¿Imayná chay kanmanri? Cielotapis, tukuy imatapis Dios rikhuricherqa. Chayrayku watejmanta tapurikun: “¿Pitaj Diosta ruwarqa?”, nispa.

Bibliaqa imaynatachá chay tata wawanman kuticherqa ajinallatataj kutichin. Moisés jinata qhelqarqa: “Tata Dios [...] manaraj orqos ruwasqa kashajtin, nitaj kay pacha, cielopis kashajtin, wiñaymanta wiñaykama qan Dios kanki”, nispa (Salmo 90:1, 2). Profeta Isaiaspis kayta nerqa: “Manachu yacharqanki, manatajchu uyarerqanki Tata Diosqa wiñaypaj kaj Dios kasqanta, tukuy kay pachatapis pay ruwasqanta?”, nispa (Isaías 40:28). Judaspa qhelqasqan cartapipis nin, Diosqa “kunanmantapacha wiñaypa wiñayninkama” kasqanta (Judas 25, Qheshwa Biblia).

Chay versiculospi nin jina, apóstol Pablopis Diosqa ‘wiñay Rey’ kasqanta nerqa (1 Timoteo 1:17). Nisunman, Diosqa unaymantañapuni kasqanta, wiñaypajpunitaj kananta (Apocalipsis 1:8). Diosqa mana qallariyniyojchu, nitaj tukukuyniyojchu. Nisunman ni pí Pay jina kasqanta.

¿Imajtin chayta mana entiendeyta atillanchejchu? Imajtinchus noqanchejqa mana unaytachu kausanchej, chayraykutaj tiempotaqa mana Jehová jinachu qhawanchej. Sutʼincharina, Diospajqa waranqa watas uj pʼunchay jinalla, imajtinchus Payqa wiñaymantañapuni kausarqa (2 Pedro 3:8). Kaypi tʼukuriy, uj langostaqa 50 pʼunchayllata kausan. Chay langosta, ¿yachanmanchu 70 chayri 80 watasta kausay imaynachus kasqanta? Mana, ¿icharí? Bibliaqa nin, noqanchejqa Diospa ladonpi uj langosta jinalla kasqanchejta. Nisunman, Diospaj ladonpi yachasqanchejqa ni imapis kasqanta (Isaías 40:22; 55:8, 9). Chayrayku mana tukuy ima rikusqanchejtapunichu entiendeyta atisun.

Dios unaymantañapuni kasqanta mana entiendeyta atispapis, kaypi tʼukuriy, pillapis Diosta ruwanman karqa chayqa, pichus rikhurichejqa tukuy imata ruwanman karqa. Jinapis Bibliaqa nin “tukuy kaj chhikata” Dioslla ruwasqanta, manataj wajchu (Apocalipsis 4:11). Chantapis unayqa niraj ni ima ruwasqa karqachu (Génesis 1:1, 2). Cielo jinallataj Jallpʼa rikhurinanpajqa, tukuy imata ruwajqa niraj ni imapis kashajtin karqaña. Jesusmanta angelesmantapis aswan ñaupajtaña karqa (Job 38:4, 6, 7; Colosenses 1:15). Arí, Diosqa niraj ni imata ruwashaspa sapallan kasharqa. Paytaqa ni pí ruwarqachu, imajtinchus paymanta wajqa ni pí karqachu.

Cielotaj, Jallpʼataj, noqanchejtaj sutʼita rikuchin wiñaymanta wiñaykama Dios kasqanta. Pichus tukuy kaj chhikata ruwaspa maychus kananman churarqa chay Diosqa, niraj ni ima ruwasqa kashajtin Pay karqañapuni. Mana ajina kajtenqa, wajkunaman kausayta mana qoyta atinmanchu karqa (Job 33:4).