TAPANMANTA | ¿PIKUNATAJ JEHOVAJ TESTIGOSNIN KANKU?
¿Imayna runastaj Jehovaj testigosnin kanku?
Jehovaj testigosnenqa Jallpʼantinpi kashayku, nitaj mayqen religionman chhapukuykuchu. Centralniykoqa Estados Unidospi. Jinapis ashkha Testigosqa waj lugarespi tiyakuyku. Chantapis 8 millones jina kayku, runasmantaj Bibliamanta yachachiyku 230 kuraj suyuspi, lugarespi ima. Ajinamanta Jesuspa nisqanta juntʼayku. Pay nerqa: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa (Mateo 24:14).
Maypi tiyakuspapis, suyoj leyesninta respetayku, kasukuykutaj. Jinapis mana kay pachaj ruwanasninpi chhapukuykuchu. Ajinamanta Jesús, cristianosman “mana kay pachajtachu kankichej” nisqanta kasukuyku. Chantapis mana politicaman, nitaj guerraman satʼikuykuchu (Juan 15:19; 17:16). Chayraykutaj Iskay kaj Guerra Mundialpi Jehovaj testigosninta carcelman wisqʼaykorqanku, maqarqanku, wañucherqanku ima. Alemaniamanta uj runa, pichus ñaupajta cura karqa, jinata nerqa: “Jehovaj testigosnillan chay tiempopi (Tercer Reich) conciencianku llimphu kananpaj mana guerraman chhapukusqankuta ninkuman”, nispa.
“[Jehovaj testigosnenqa] mana sajra imasta ruwankuchu. Paykuna jina runasta kamachinankupaj ajllasunman. Jinapis mana atisunmanchu. [...] Imajtinchus kamachejkunata jatunpaj qhawaspapis, paykunaqa creenku Diospa Reinollan tukuy llakiykunata chinkachinanta.” (República Checa suyumanta, Nová Svoboda periódico)
Jinapis mana wajkunamanta karunchakuykuchu. Jesusqa yachachisqasninpaj Diosmanta jinata mañaporqa: “Mana mañakunichu paykunata kay pachamanta orqhokapunaykita”, nispa (Juan 17:15). Chayrayku tukuy runas jinallataj llankʼayku, rantikoj riyku, escuelamanpis riyku.