TAPANMANTA | ¿PIKUNATAJ JEHOVAJ TESTIGOSNIN KANKU?
¿Imapí Jehovaj testigosnin creenku?
Jehovaj testigosnenqa creeyku “Diosmanta tukuy Qhelqasqaqa paypa yuyaychasqan kaspa, may sumaj” kasqanta (2 Timoteo 3:16). Bibliata estudiayku Diosmanta yachakunaykupaj, kusisqa kausakunaykupajtaj.
Biblia nin: “Yachachuncu kan, Jehová sutiyoj, Kanlla Altísimo caskayquita tucuy caypacha patapi” (Salmo 83:18, Biblia Quechua de Cuzce). Chayrayku kʼata Dios Jehovallata yupaychayku. Chantapis testigosnin kasqaykurayku sutinta wajkunaman willanapaj kallpachakuyku (Isaías 43:10-12).
Cristianos kasqaykurayku Jesús, “Diospa Churin”a kasqanta creeyku, pichus Jallpʼaman jamorqa, Mesiastaj karqa (Juan 1:34, 41; 4:25, 26). Jesusqa wañupusqantawan janaj pachaman kutiporqa (1 Corintios 15:3, 4). Chantataj Diospa Reinonpi Rey churasqa karqa (Apocalipsis 11:15). Chay Reinoqa kamachishanña, Jallpʼatataj Paraisoman tukuchenqa (Daniel 2:44). Biblia nin: “Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku” (Salmo 37:11, 29).
“Paykunaqa Bibliata leespa, Dios parlapashasqanta creenku. Chayrayku kausayninkupi chʼampay kajtin, Diospa Palabranpi yanapata maskʼanku. [...] Paykunapajqa Diospa Palabran kausayniyoj.” (Alemania, Sacerdote católico Benjamin Cherayath, Münsterländische Volkszeitung periódico)
Jehovaj testigosnenqa creeyku Bibliaj yuyaychasqan kay tiempopi runasta yanapananta (Isaías 48:17, 18). Chayrayku Bibliaj nisqanta kasukuykupuni. Bibliaqa nin yuyayninchej, cuerponchej ima llimphu kananta, chayrayku mana cigarrota pitaykuchu, nitaj drogasta ujyaykuchu (2 Corintios 7:1). Bibliaqa juchachan machayta, khuchichakuyta, suwakuyta ima, chaykunatataj mana ruwaykuchu (1 Corintios 6:9-11).
a Bibliaqa nillantaj Jesús, “Diospa kʼata Churi[n]” kasqanta, imajtinchus Jehovaqa paytaraj ñaupajta mana pejpa yanapaynillanwan ruwarqa (Juan 3:18; Colosenses 1:13-15).